Read Chimborazo Highland Quichua JEREMÍAS 4 Bible Online

JEREMÍAS 4 - Chimborazo Highland Quichua bible

JEREMÍAS 4

¹Mandaj Diosca cashnami nin: “Israelcunalla, ñucapajman tigrarishpaca, shungumantataj cutiringuichij. Ñuca ñaupajmantaca, cancuna rurashca millanana dioscunata anchuchichij. Ña ama ashtahuan caiman chaiman callpacuichijllachu.

²Chaimantaca mana nij tucushpalla, alli yuyaihuantaj, tucui shunguhuantaj: Mandaj Diosca causacunmi nichigari. Chaipica shujtaj llajtacunapi causajcunapish, ñucamantamari allicunata chasquingacuna. Ñucahuanmari cushicungacuna” ninmi.

³Mandaj Diosca, tucui Judá llajtapi causajcunatapish, Jerusalenpi causajcunatapish cashnami nin: “Allpacunata yapushpa chagracunata ruraichij. Ña ama casha chaupicunapi tarpuichijchu.

⁴Judá llajtapi, Jerusalén pueblopi causaj runacunalla, cancuna charishca aicha mirga carata p'itij shinaca, cancunapaj shungumanta tucui millai yuyaita anchuchishpa, ñuca, Mandaj Diospajlla tucuichij. Ñataj cancuna millaita rurashpa causashcamantaca, yallitaj p'iñariman. Ñuca p'iñarijpi nina lunyajpica, pi mana huañuchi tucungachu.

⁵Judá llajtapipish, Jerusalenpipish huillaichigari. Trompetacunapi tocashpa tucui llajtapi yachaj chayachichigari. Tucuicuna tandanacushpa, jatun pircayuj pueblocunaman yaicuichigari nishpa caparichij.

⁶Sión pueblopi miticunaman callpamuchun banderata alzaichigari. Janaj llajtamantamari jatun llaquita cachagrini, ama uniyaichijchu. Chaica cancunataca tucuchingamari.

⁷Leonmari sachamanta llujshimucun. Llajtacunata tucuchijmari caiman shamungapaj ñanpi yaicushca. Cancunapaj llajtata tucuchingapajmari pai tiyanamanta llujshimushca. Cancunapaj tucui pueblocunamari shuj runallapish illaj, shitashca saquiringa” ninmi.

⁸Mandaj Diosca, ñucanchijhuanca p'iñarajmi, manaraj alli tucushcachu. Chashna cashcamantaca cañamazuta churarishpa, aij nishpa huacaichigari.

⁹Mandaj Diosca cashnapishmi nin: “Chai llaqui punlla chayamujpica jatun mandajpish, pai churashca mandajcunapish manchaihuan upayangacunami. Curacunapish imata mana shimi llujshi tucungacunachu. Huillajcunapish manchaihuan chujchungami” ninmi.

¹⁰Chashna nijpimi, ñucaca cashna nircani: “¡Aij, aij! Mandaj Dioslla, cai Judá runacunatapish, Jerusalén pueblopi causajcunatapish: Sumaj causaitami charinguichij nircanguimari. Chashna nishpaca yallitajmari umashcangui. Cunanca ñucanchijtaca, ñamari espadata cungapi churashpa charicuncuna” nircanimi.

¹¹Chai llaqui punllacunapica, tucui cai Judá runacunapish, Jerusalenpi causajcunapish cashnami nishca cangacuna: “Ñuca agllashcacunapajmanca, shitashca pamba lomacunata purij huairamari shamushca. Chai huairaca ñucullata apashpa, chuya granota saquingapajca, mana shamunchu.

¹²Ñucaca, paicunata sinchita llaquichingapajmi yallitaj sinchi huairata cachani” nishcami cangacuna.

¹³P'iñaj runacunaca, acapana shina callpaj carretacunapimi, p'uyu amsayashpa shamuj shina chayamungacuna. Paicunapaj caballocunapish, aguilata yalli callpajcunami. ¡Aij ñucanchijlla, imachari tucushun! ¡Ñucanchijtaca tucuchichunmari chai runacunapaj maquipi churashca!

¹⁴Jerusalenpi causajcunalla, ¿maicamataj millaita rurana yuyailla canguichigari? Cancunata quishpichichun nishpaca, shungumanta tucui millai yuyaita maillarichigari.

¹⁵Ñamari Dan llajtapi llaqui tiyashcata caparishpa huillanacushca uyaricun. Efraín urcupipish ñamari jatun llaqui tiyashcata caparinacucun.

¹⁶Jerusalenpipish, shujtaj llajtacunapipish: “Caru llajtamantamari chapaj soldadocuna shamuncuna. Judá llajta pueblocunapi causajcunata caparirishpa rimangapajmari shamuncuna” nishpa huillaichigari.

¹⁷Mandaj Diosca cashnami nin: “Cancunallataj ñucata mana cazushcamantami, chai soldadocunaca chagrata cuidacuj runacuna shina tucui pueblo muyundijta chapacuncuna.

¹⁸Cancuna millaita rurashpa causashcallatajmi cancunataca cai llaquipi churashca. Cancunapaj millai causaillatajmi shunguman chayajta jayajta ubyachinga” ninmi.

¹⁹¡Aij ñuca shungulla! ¡Aij ñuca shungulla! Ñuca shungu angucuna nanaihuan p'itirigrinca. Ñuca shunguca manchanayajta saltacunca. Jatun macanacuipaj trompetapi tocashcapish, caparishcapish uyarijpica, maitataj ñuca almaca upalla cangari.

²⁰Jahuanpi jahuanpi jatun llaquicuna shamunatamari huillancuna. Tucui llajtamari ima illaj llaquinayaj saquiricun. Ñucanchij carpa huasicunataca, shamushcahuan linsocunata lliquishpami urmachicuncuna.

²¹¿Maicamachari bandera alzashcata ricusha, trompeta tocashcata uyasha?

²²Ñuca runacunaca alli yuyaihuan canapaj randica, imatapish mana uyashun nij rumi shungucunamari. Allitaca imata mana yachancunachu, millaita ruranapajtajcarinpish jatun yachajcunamari.

²³Cai llajtata ricujpica, chushaj allpallami ricurirca. Jahua pachata ricujpipish, amsallami carca. Ima achijyachij mana ricurircachu.

²⁴Urcucunata ricujpipish chujchucurcami. Tucui lomacunapish, chushajllami saquirishca carca.

²⁵Tucui muyurishpa ricujpipish, maipi shuj runallapish mana ricurircachu. Huairata purij pajarocunacamami mancharishpa, maitatajshi rishca carca.

²⁶Chagracuna tiyashca pambacunata ricujpipish, shitashca pambacunallami ricurirca. Mandaj Dios yallitaj p'iñarishpami, pueblocunatapish paipaj ñaupajmanta tucui chingachishca carca.

²⁷Ñaupamanmi Mandaj Diosca cashna nirca: “Tucui llajtatami chushajllata saquisha. Shina cashpapish, tucuitajca mana chingachishachu.

²⁸Chai llaqui shamujpica, allpaca yanata churarishca shinami saquiringa. Jahua pachapish amsayangami. Chaitaca ñucatajmi chashnami rurasha nircani. Chashna ruranata yuyarishcataca, mana shujtajyachishachu. Ama chashna rurasha nishpa, mana saquishallachu” nircami.

²⁹Caballocunapi tiyarishca soldadocunapish, puntajlla caspicunata shitajcunapish manchanayajta c'ulun nishpa shamujta uyashpami, pueblopi causajcunaca tucuicuna llujshishpa jatun sachacunapi, c'aca jahuacunapi miticugrircacuna. Tucui pueblocunamanta chashna llujshishpami, shujllapish mana saquirishpa shitashcata saquircacuna.

³⁰Canpish tucuchishca canguillatajmi, ¿imatashi rurangui? Sumaj pucajlla churanata churarishca cashpapish, curimanta rurashca sumaj aparinacunahuan allichirishca cashpapish, cambaj ñahui patacunata yanajllata rurashca cashpapish, imata mana rurai tucunguichu. Yangallamari sumajta allichiringui. Cunanca canta c'uyajcunaca p'iñancunami. Ashtahuanpish cantaca huañuchingapajmari mashcacuncuna.

³¹Punta cutin huachana nanaihuan caj huarmi shina capariricujtami uyarcani. Sión urcupi causajcunamari caparirishpa huacacun. Maquicunata chutashpamari: “¡Aij ñucalla, cunantajca imachari tucusha! Cai huañuchij runacuna huañuchigrinca” nishpa capariricun.