Read Chimborazo Highland Quichua JEREMÍAS 42 Bible Online

JEREMÍAS 42 - Chimborazo Highland Quichua bible

JEREMÍAS 42

¹Soldadocunata tucui mandajcunapish, Careapaj churi Johananpish, Osaiaspaj churi Jezaniaspish, tucui chaipi cajcunallataj jatuncunamanta uchillacunacamami,

²Dios imalla nishcata huillaj Jeremiaspajman c'uchuyashpa cashna nircacuna: — Ñucanchijca canta shuj mañanahuanmi shamunchij, chaitaca ama mana nipangui. Ñucanchijca achcacuna cashca cashpapish, cai ashallacunami saquirishcanchij. Chaitaca canllataj ricunguimi. Chashna cashcamantaca canta Mandaj Diostaca, caipi saquirishca tucui ñucanchijmanta mañapai.

³Paita mañajpimari, canta Mandaj Diosca ñucanchijmanca maiman rinata ricuchinga, imata ruranatapish huillanga — nircacunami.

⁴Shina nijpimi Dios ima nishcata huillaj Jeremiasca: — Cancuna nishcata ruragrinimi. Cancunata Mandaj Diostaca cancuna nishca shinallataj mañagrinimi. Pai Mandaj Dios cancunaman imata huillachun nijpipish, imata mana pacashpa chaitatajmi cancunamanca huillasha — nircami.

⁵Chashna nijpica, paicunaca Jeremiastaca cashnami nircacuna: — Canta Mandaj Dios ñucanchijman imata huillachun canta cachajpipish, ñucanchijca chaitatajmi rurashun. Ñucanchij nishca shinataj mana rurajpica, Mandaj Diosllataj ñucanchijta ricuchun.

⁶Cantaca ñucanchijta Mandaj Diosta tapuchunmi cachanchij. Ñucanchijpaj alli cachun, mana alli cachunpish, pai mandashcatami cazushun. Ñucanchijta Mandaj Diosta cazushpamari, alli causaita japishun — nircacunami.

⁷Chashna nishcamantaca chunga punllapimi, Mandaj Diosca paicunaman imalla huillana cashcata Jeremiasta mandarca.

⁸Chaimantami paica Careapaj churi Johanantapish, paihuan caj soldadocunata tucui mandajcunatapish, chaipi cajcunataca jatuncunamanta uchillacunacama cayashpa,

⁹cashna nirca: “Ñucataca cancunata Mandaj Diospaj ñaupajpi cancunamanta mañachunmi cacharcanguichij. Can israelcunata Mandaj Diosca cashnami nin:

¹⁰Cancuna cai llajtallapitaj casijlla saquirijpica, llajta cachun cutin shayachishami. Cutinca ña mana urmachishachu. Alli tarpushpa, cutinca ña mana aisashpa shitashachu. Cunan cancunata cashna llaquichishcataca, ñucallataj nanarishpa llaquirinimi ninmi.

¹¹Mandaj Diosca cashnapishmi nin: Babilonia llajtata jatun mandajpaj ñaupajpi ricurinataca, ama manchaichijchu. Paitami cancunaca yallitaj manchanguichij. Paipaj maquimanta quishpichingapaj, cacharichingapajca ñucamari cancunahuan casha, ama manchaichijchu.

¹²Ñucaca cancunataca llaquishamari, paimanpish cancunata llaquina yuyaita cushamari. Chashna rurajpica, paica cancunapaj llajtaman tigrachingallamari ninmi.

¹³Ashtahuanpish mana cai llajtapi causashun nishpa, Mandaj Dios mandashcatapish mana cazushpa,

¹⁴cashna ninguichijchari: Egipto llajtaman rishuntaj ninchijmi. Chaipica jatun macanacuitapish mana ashtahuan ricushunchu, macanacuiman llujshichun trompetapi tocashcatapish mana uyashunchu, yaricaipish mana tiyangachu. Chaipimi sumajta causashun ninguichijchari.

¹⁵Cai ashacunalla saquirishca Judá runacuna, cancuna chashna yuyacushpaca, Mandaj Dios rimashcata uyaichij. Tucuita Mandaj, israelcunapaj Diosca cashnami nin: Cancuna Egipto llajtaman rinata yuyarishpa, chai llajtapi causagringuichijllatajchari.

¹⁶Chashna rurajpica, espadahuan huañuchingami nishpa cancuna manchacushca runacuna, chai Egipto llajtapipish cancunataca espadahuan huañuchigringallatajmi. Cancuna yaricaihuan huañunata manchashpa rishpapish, Egipto llajtapipish yaricaillahuantajmi huañugringuichij. Chaipimi cancunaca huañunguichij.

¹⁷Egipto llajtaman rinata yuyarishpa chaipi causagrijcunaca, tucuicunami espadapipish, yaricaihuanpish, jatun ungüihuanpish huañunguichij. Shujllapish mana causaj saquiringuichijchu. Ñuca cancunapaj cachashca tucui llaquicunamantaca, shujllapish manataj quishpiringuichijchu ninmi.

¹⁸Tucuita Mandaj, israelcunapaj Diosca cashnapishmi nin: Cancuna Egipto llajtaman rijpica, Jerusalenpi causajcunata ñuca yallitaj p'iñarishpa jatunta llaquichishca shinallatajmi, cancunatapish yallitaj llaquichisha. Chaipimi cancunaca tucuicuna millanachina, mancharina, shujtajcunatapish paicuna shina tucushca alli canman nina, chanzata rurashpa asina tucunguichij. Cai llajtataca, manataj cutin ricunguichijchu ninmi.

¹⁹Judá runacuna, cai ashacunalla saquirishca cancunataca: Ama Egipto llajtaman richijchu nircami Mandaj Diosca. Caitaca alli uyaichij, cunantajmi cancunaman alli huillani.

²⁰¿Imamantataj cancunallataj cashna yallitaj umaringuichigari? Cancunallatajmari ñucataca: Ñucanchijta Mandaj Diosta ñucanchijmanta mañapai. Chaimantaca ñucanchijta Mandaj Dios imata mandajpipish, chaitataj huillahuai. Ñucanchijca pai mandashcatami rurashun nircanguichij.

²¹Chashna nishcamantamari, cancunata Mandaj Dios cancunaman imallata huillachun mingashcataca tucuita huillani. Cunanca ashtahuanpish pai imallata mandashcataca manamari cazunguichijchu.

²²Chaimanta cancuna causagrinata munashca llajtapica espadapipish, yaricaihuanpish, jatun ungüihuanpish huañunguichijtajmi. Chaitaca cunantajmi cancunaman huillani” nircami.