Read Chimborazo Highland Quichua JEREMÍAS 43 Bible Online

JEREMÍAS 43 - Chimborazo Highland Quichua bible

JEREMÍAS 43

¹Paicunata Mandaj Diosmi, Jeremiastaca tucui chai shimicunataca paicunaman huillachun mingarca. Chaimantami Jeremiasca chai shimicunataca tucui paicunaman callarishpa huillarca. Chaita tucui huillajpica,

²Osaiaspaj churi Azariaspish, Careapaj churi Johananpish, tucui caishuj jatun tucushca runacunapishmi Jeremiastaca cashna nircacuna: “Canca llullacunguillami. Maitataj ñucanchijta Mandaj Diosca: Ama Egipto llajtapi causagrichijchu nigri nishpaca cachashca cangari.

³Ashtahuanpish Neriaspaj churi Barucmari ñucanchijta caldeocunapaj maquipi churashpa huañuchingapaj, mana cashpaca Babilonia llajtaman prezu apachingapaj cantaca chashna nichun cachashca canga” nircacunami.

⁴Chashna nishpami Careapaj churi Johananpish, chaipi caj soldadocunata tucui mandajcunapish, tucui caishujcunapish Mandaj Dios Judá llajtallapitaj saquirichun nishpa mandashcataca mana cazurcacuna.

⁵Ashtahuanpish Careapaj churi Johananpish, caishuj mandaj soldadocunapishmi saquirishca tucui Judá runacunata tandachircacuna. Chaicunaca tucui caishuj llajtacunamanta Judá llajtaman tigrashpami, paicuna maillamanta llujshishpa rishcallapitaj causacurcacuna.

⁶Tucui chai c'aricunata, huarmicunata, huahuacunata, jatun mandajpaj ushushicunatapish, cuidaj soldadocunata mandaj Nabuzaradán, Ahicampaj churi Gedaliashuan saquishcacunatapish tucuicunatami tandachircacuna. Ahicampaj yayaca Safanmi carca. Shinallataj Dios ima nishcata huillaj Jeremiastapish, Neriaspaj churi Baructapishmi tandachircacuna.

⁷Mandaj Dios mandashcata mana cazushpami, tucui chaicunata pushashpa Egipto llajtaman rircacuna. Chashna rishpaca, Tafnes pueblomanmi chayarcacuna.

⁸Chai Tafnes pueblopi cajpimi, Mandaj Diosca Jeremiastaca cashna mandarca:

⁹“Cambaj maquicunahuan jatun rumicunata japi. Chai rumicunataca cai Tafnes pueblopi faraonpaj huasi ch'imbapurapi caj ladrillota rurana lodopi pambai. Tucui Judá runacuna ricucujpi chashna rurangui.

¹⁰Chashna rurashpaca cashna ningui: Tucuita Mandaj, israelcunapaj Diosca cashnami nin: Babilonia llajtata jatun mandaj, ñucata servij Nabucodonosortaca caimanpish pushamugrinimi. Paica ñuca pambashca cai rumicuna jahuapimi, paipaj jatun tiyanata churashpa tiyaringa. Cai jahuapimi paipaj sumaj carpa huasita shayachinga.

¹¹Pai shamushpami cai llajtapi causajcunataca llaquichinga. Cai llajta runacunaca ungüihuan huañuna cajcunaca, ungüihuanmi huañungacuna. Prezu apana cajcunaca, prezumi ringacuna. Espadapi huañuna cajcunaca, espadapimi huañungacuna.

¹²Cai Egipto llajta dioscunapaj huasicunataca, ninata japichishpami tucui rupachinga. Chai dioscunataca llujshichishpa paipaj llajtamanmi apanga. Chashna rurashpami cai Egipto llajtataca, michij runa paipaj jahua churanata chaspij shina, tucuita tucuchishpa ima illajta saquinga. Chashna rurashpaca paica ima mana tucushpa, paipaj llajtaman sumajta tigrangallami.

¹³Shinallataj cai Egipto llajtapi caj Bet-semes pueblopi tiyaj suni jatun rumicunatapish tucuimi ñutunga. Tucui cai Egipto llajta dioscunapaj huasicunatami rupachishpa saquinga ninmi ni” nircami.