Read Chimborazo Highland Quichua JEREMÍAS 48 Bible Online

JEREMÍAS 48 - Chimborazo Highland Quichua bible

JEREMÍAS 48

¹Tucuita Mandaj, israelcunapaj Diosca, Moab llajtamantaca cashnami nin: “¡Aij Nebo pueblolla, cunanca tucurishcamari! Quiriataim pueblotapish ñamari yaicushcacuna. Misgab pueblopi causajcunapish manchaihuan musparicunmari.

²Cunanca Moabpi causajcunaca, ña mana jatun tucungacunachu. Paicunata p'iñajcunaca Hesbón pueblopimari: Jacuchij chai llajtata tucuchishunchij nishpa yuyarinacushca. Madmena pueblolla, canpish tucuringuillatajmi. Canpi causajcunataca espadahuanmari huañuchigringacuna.

³Horonaim pueblotapish jatun llaquita rurashpamari tucuchicuncuna. Jatunta caparirishpa huacashcami uyaricun.

⁴Moabpi causajcunataca jatun llaquimari japishca. Uchilla huahuacunapish caruman uyarijtamari huacacuncuna.

⁵Luhit pueblo huichitaca jatunta caparirishpami, huacashpa huichiyangacuna. Horonaim pueblo uritapish p'iñajcuna uyajta caparirishpami, huacaihuan uriyarcacuna.

⁶Miticunaman callpaichigari, callpai tucujcunallapish quishpirichigari. Shitashca pambacunapi retama yura shinallapish causagrichigari.

⁷Cancunaca imalla charishcallapi, cullquillapimari shunguta churarcanguichij. Chaimantami cancunapish shujtajpaj maquipi urmanguichij. Cancunapaj Quemos shuti diospish paipaj curacunandij, paipaj mandajcunandij prezu apashca cangami.

⁸Shujtaj llajta runacuna shamushpami, tucui pueblocunata tucuchinga. Shuj pueblollapish mana alli saquiringachu. Pugru pambacunapish, loma jahua pambacunapish Mandaj Dios nishca shinallataj, ima illajmi saquiringa.

⁹Moab llajtaca tucui tucuchishca cagrinca, shuj runallapish illaj saquirigrinca. Jatarishpa caruta richun alasta cuichigari” ninmi.

¹⁰Mandaj Dios mingashcata mana cushicuihuan ruraj runaca, llaqui tucushca cachun. Paipaj espadahuan mana huañuchigrijpish, llaqui tucushca cachun.

¹¹Moab runacunaca callarimantapachami sumajta causarcacuna. Vinoca shuj puñullapi unita tiyashpaca, p'ucurishpa mishquijllami tucun, mishquijlla ashnaipish mana anchurinchu. Vinota mana shujtaj shujtaj puñucunaman pasachishca shinami paicunaca mana maijan llajtaman prezu rircacuna ninmi.

¹²Mandaj Diosca cashnapishmi nin: “Uni huatacunata shuj puñullapi tiyacushca vinota shujtaj puñucunapi churachun shuj runacunata cachagrinimi. Chai punlla chayamujpi paicuna shamushpami, chai vinotaca shujtaj puñucunapi churangacuna. Vino tiyacushca cara capachucunatapish chushajyachishpaca, tucui lliquingacunami.

¹³Chashna rurajpica Moab llajtapi causajcunaca, Quemosta yanga charishcamanta pingai tucungacunami. Israelcuna Bet-elpi shunguta churashpa causashca cashpapish, llaqui tucushpa pingai tucushca shinallatajmi pingaringacuna.

¹⁴¿Cunanca ima shinataj: Ñucanchijca alli fuerzasapa runacunami canchij, alli macanacuj c'ari c'aricunami canchij ninguichigari?

¹⁵Ñamari Moab llajtaca tucuchishca siricun, tucui pueblocunatamari urmachishcacuna. Huambraraj sinchi runacunataca tucuicunatamari cungata p'itishpa huañuchishcacuna” ninmi Jatun Mandajca, paica tucuita Mandaj Dios shutimi.

¹⁶Moab llajtapaj llaquica caillapimari. Ñallamari jatun llaqui chayamugrin.

¹⁷Paipaj muyundijpi cajcunaca tucuicuna llaquirichigari. Paita rijsijcunaca tucuicuna: Sinchi, sumaj varamari carca, ¿ima shinataj p'aquirircari? nichigari.

¹⁸Dibón pueblopi causajcunalla, jahuaman sumajpi tiyacushcamanta uriyashpa, yutul pambapi tiyarichigari. Moab llajtata tucuchigrijca, ñallamari cancunapaj jatun torrecunata urmachingapaj chayamugrin.

¹⁹Aroer pueblopi causajcunalla, ñanpi shayarishpa ricuichigari. Quishpirishpa miticunaman ricujcunataca: ¿Imataj tucurcanguichij? nishpa tapuichigari.

²⁰Moab llajtamari, jatunta llaquichijpi yallitaj pingai tucushca. Jatunta caparirishpa huacaichigari. Moab llajta llaqui tucushcataca, Arnón yacu uripi causajcunamanpish huillaichigari ninmi.

²¹Loma jahua pambapi caj pueblocunapajmari jatun llaqui chayamushca. Holón, Jahaza, Mefaat,

²²Dibón, Nebo, Bet-diblataim shuti,

²³Quiriataim shuti, Bet-gamul shuti, Bet-meón shuti,

²⁴Queriot shuti, Bosra shuti pueblocunapajmari llaqui shamushca. Moab llajta pueblocunapajca c'uchullapi cajcunapajpish, carupi cajcunapajpish, tucui pueblocunapajllatajmi jatun llaqui shamushca.

²⁵Mandaj Diosca: “Jatun nishca Moab llajtaca tucurishcamari, paipaj rigra p'aquirishpamari urmashca” ninmi.

²⁶Moab llajta runacunaca, Mandaj Diostamari jatun tucushpa c'ariyashcacuna. Machashpa shungu tigrashca jahuallapitaj singuchun machachichigari. Paicunatapish shungu tigrashcata shina, tucuicuna millashpa asishca cachun.

²⁷Moab runacunalla, israelcunataca shuhuacujta japishca shinamari cancunaca chanzata rurashpa asircanguichij. Paicunata yuyarishpaca yangapi churashpamari, asij carcanguichij. Cancunapish chashnallatajmari tucunguichij.

²⁸Moab llajtapi causajcunalla, pueblocunamanta llujshishpa, rumi c'acacunapi causagrichigari. Palomacuna jatun jutcu patacunapi tazinta rurashpa tiyarij shina causagrichigari.

²⁹Moab runacuna jatun tucushca cajtaca uyashcanguichijllatajmi. Paicunaca yallitaj jatun tucushca, c'ari c'ari tucushca, pita mana manchaj, pita mana cazuj tucushcacunami.

³⁰Mandaj Diosca cashnami nin: “Ñucaca paicunata manchanayajta p'iña tucushca cajtapish rijsinimi. Shina cashpapish imata mana rurai tucungacunachu. Paicuna jatun tucushcapish yangallami canga” ninmi.

³¹Chaimantami ñucaca Moab llajtamantaca, aij nishpa huacagrini. Tucui Moab llajtapi causajcunamanta, Kir-hares pueblopi causajcunamantaca, jatunta caparirishpami huacagrini.

³²Sibma shuti pambapi tiyaj uva chagralla, canmantaca Jazer pueblopi causajcunamanta shinallataj caparirishpami huacasha. Cambaj ramacunaca jatun cucha ch'imbanijcamamari jatunyarca. Jazer cuchacamamari ñahuiyashpa huiñarcangui. Chashna sumajta huiñashpa p'ucushcata tandanalla cajpimari, tucuchij chayamushpa chingachinga.

³³Moab llajtapica, chagra pambacunapi cushicushpa caparirina illangami. Vinota rurangapaj uvata capina tanquecunapipish vino illangami. Cantashpa uvata sarunaca tucuringami, ima cantopish mana tiyangachu.

³⁴Hesbón pueblopi causajcunaca, Eleale puebloman uyarijtamari caparirishpa huacarcacuna. Jahaza pueblocamapishmi uyarirca. Nimrim shuti yacucunapish chingachishca cangami. Chaimantami Zoar pueblopi causajcunapish quimsa huatayuj vaquilla yacunachicuj shina, Horonaim puebloman uyarijta huacarcacuna.

³⁵Mandaj Diosca cashnami nin: “Moab llajtapi causajcunaca lomacunapimi paicunapaj dioscunaman cuna cashcata cushpa rupachircacuna. Inciensotapish cushpami rupachircacuna. Chaimantami paicunataca tucuchisha” ninmi.

³⁶Moab llajtapi causajcunapish, Kir-hares pueblopi causajcunapish paicuna tucui imalla charishcacunandijmi chingaringa. Chaimantami paicunamantaca flautapi p'ucuj shina llaquijlla shungu llujshini. Tauca flautacunapi p'ucushca uyarij shinami shungu llujshini.

³⁷Tucuicunamari uma ajchata rasparingacuna, barbastapish p'icharishpami, tucuicuna cañamazuta churaringacuna. Maquicunapish chugri chugrimi cangacuna.

³⁸Mandaj Diosca cashnami nin: “Ñucami Moab llajtataca yalli maucayashca puñuta ñutuj shina llaquichisha. Chaimantami Moab runacunaca tucui huasi jahuacunapipish, callecunapipish caparirishpa huacangacuna” ninmi.

³⁹Jatunta llaquirishpa huacaichigari. Moab llajtaca jatunta llaquichishcamari saquiringa. Macanacungapaj shayarishpapish huashaman tigrashpa callpashpamari, yallitaj pingai tucungacuna. Moab llajtaca paipaj tucui muyundijpi causajcunapajca chanzata rurashpa asinapish, mancharinapishmi canga.

⁴⁰Mandaj Diosca cashnamari nin: “Alasta chutashpa águila shamuj shinami, Moab llajtataca llaquichinaman shamunga.

⁴¹Chashna shamushpami tucui pueblocunata mishanga, tucui jatun torrecunayuj pueblocunatapishmi mishashpa japinga. Chai punllaca Moab runacunaca ashtahuan c'ari c'aricunapish, huachana nanaihuan caj huarmi shinami cangacuna.

⁴²Moab runacunaca ñuca, Mandaj Diostamari jatun tucushpa c'ariyarcacuna. Chaimantami paicunaca tucuchishca cangacuna, ña mana llajta shina cangachu.

⁴³Mandaj Diostajmi caitapish nini: Moab llajtapi causajcunalla, cancunataca yallitajmi manchachingacuna. Urmana jutcutapish rurangacunami, tsagnarinatapish churangacunami.

⁴⁴Manchaihuan miticunaman callpashpapish, jutcupimi urmanguichij. Jutcumanta llujshishpapish tsagnarishpa japi tucunguichijllami. Ñucatajmi Moab llajta runacunapajca jatun llaqui huatata apamugrini. Chaimantami chashna tucunguichij” ninmi Mandaj Diosca.

⁴⁵Shaicushca callpacujcunaca, Hesbón pueblopimi miticugrircacuna. Ashtahuanpish Hesbón pueblomantaca lunyacuj ninamari llujshinga. Sehonpaj pueblo chaupimanta nina llujshishpami, Moab llajtataca mirga urita rupachinga. C'ari tucushpa caparirijcunaca umacamamari rupangacuna.

⁴⁶¡Aij, Moab llajtapi causajcunalla, Quemos diospaj cajcunaca chingarishcanguichijmari! Cancunapaj churicunatapish, ushushicunatapish shujtaj llajtamanmari prezu aparcacuna.

⁴⁷Mandaj Diosca cashnami nin: “Shina cajpipish q'uipa punllacunapica Moab llajtamanta prezu apashcacunata tigrachimushami” ninmi. Moab llajtata llaquichinata huillashca shimicunaca caicamallami.