Read Chimborazo Highland Quichua JEREMÍAS 51 Bible Online

JEREMÍAS 51 - Chimborazo Highland Quichua bible

JEREMÍAS 51

¹Mandaj Diosca cashnami nin: Babilonia llajtatapish, chaipi causaj, ñucata c'ariyaj runacunatapish llaquichichun jatun huairatami cachagrini.

²Trillashpa huairachijcuna shina, chushaj llajtata saquichunmi, Babiloniamanca paicunata p'iñajcunata cachagrini. Paipaj jatun llaqui chayamui punllapica, tucui ladomantami paita llaquichingapaj jataringacuna.

³Arcohuan shitacujtapish, fierro churanata churarishca c'ari c'arita shayacujtapish: “Chairaj runataca shujllatapish ama saquichijchu, paicunapaj tucui soldadocunata huañuchichijlla nishami” ninmi.

⁴Caldeocunaca lanzacunahuan satishcami callecunapi huañushpa urmangacuna.

⁵Israelcunatapish, Judá runacunatapish paicunapaj Diosca mana shitashcachu. Cusa huañujpi viuda saquirij huarmi shinaca, mana saquirishcacunachu. Juchahuan llajtata mapayachishpa, paicunapaj jucha illaj Diosta p'iñachishca cajpipish, tucuita Mandaj Diosca mana saquishcachu.

⁶Babiloniamanta llujshishpa callpaichigari. Cancunapaj causaillatapish quishpichichigari. Chai llajta runacuna millaita rurashcamantami, Mandaj Diosca llaquichigrin. Paicunata llaquichina punllamari chayamushca. Paicunaman cuna cashcatamari cugrin.

⁷Babilonia llajtataca, vinohuan junda curi copata shinami Mandaj Diosca, paipaj maquipi charicurca. Chai copamantami tucui llajtacunapi causajcunaman vinota ubyachirca. Chaita ubyashpaca, tucuicunami machashpa urmarcacuna.

⁸Shina cashpapish Babilonia llajtaca, paipaj maquimanta ñapish urmashpa ñuturishcallamari. Paimanta huacaichigari, bálsamo aceiteta mashcaichigari. Chaihuan jambijpica, paipaj chugricuna alliyangapishchari.

⁹Babilonia llajtataca ñami jambinchij. Shina cajpipish, manataj alliyanchu. Tucuicuna shitashpa ñucanchij quiquin llajtacunaman jacuchijlla. Jahua pachaman chayajtami millaita rurashcacuna. Paicunapaj juchaca p'uyucamami chayashca.

¹⁰Ñucanchijtaca Mandaj Diosmari mana shitashca cashcata ricuchishca. Ñucanchijta Mandaj Dios mitsashcataca, jacuchij Siónpi parlashunchij.

¹¹Mandaj Diosca Babilonia llajtataca, paipaj huasita urmachishcamantamari, jatunta llaquichisha nishca. Chaimantamari Media llajtata jatun mandajcunataca, Babiloniata llaquichina yuyaita cushca. Media soldadocunalla, puntajlla caspicunata alli p'ichaichigari, escudocunatapish rigrapi aparichigari.

¹²Babilonia pueblo muyundij jatun pircapi banderata shayachichigari. Ama llujshichun, alli cuidaj soldadocunata churaichij. Alli allichirishca chapaichigari. Mandaj Diosmari pai munashca shina llaquichinata yuyarirca. Babiloniapi causajcunata chashna llaquichisha nishcataca pajtachingatajmi.

¹³Jatun yacucuna chaupipi causajcunalla, cancunaca achcata charijcunami canguichij. Cancunapajca huañuimi chayamushca, cancuna jahuanpi jahuanpi charijyashca tucurinamari chayamushca.

¹⁴Tucuita Mandaj Diosca: “Ñucaca canta p'iñajcunataca langostacunata shina ñahui amsayanatami apamugrini. Paicunami caparirishpa canhuan macanacungapaj shayaringacuna” nircami. Paipaj shutillamantatajmi chaitaca rurashatajmi nirca.

¹⁵Paimari tucuita rurai tucuj cashpa, cai pachata rurarca. Jatun yachaj cashpami, tucui cai pachataca sinchita churarca. Alli yuyaiyuj cashpami, jahua pachatapish linsota shina churarca.

¹⁶Pai mandajpimi yacucunapish jahua pachapica, culun nishpa uyarin. Huairatapish huaquichishcamantami llujshichin, p'uyutapish cai pacha tucurimantami huichiyachin. Shinallataj paimi achij nichishpa tamyachin.

¹⁷Runacunaca tucuicunami upa tucuncuna, ima alli yuyaitaca mana charincunachu. Dioscunata rurajcunapish, paicuna rurashca dioscunaca yanga cashcamanta pingarincunami. Chai dioscunaca mana samaita charincunachu.

¹⁸Chai dioscunaca chanzata rurashpa asina yanga dioscunallami. Jatun llaqui chayamui punllacunapica chingarinllami.

¹⁹Jacobopaj Diosca manamari chaicuna shinachu, paica tucuita Rurajmari. Paica tucuita Mandaj Dios shutimari. Israelcunaca pai mandana vara cachun agllashcacunamari.

²⁰“Babilonia runacunalla, cancunatami ñuca macana martillo shina, ima shujtaj macanacunata shina charisha. Cancunahuanmi tauca llajta runacunata tucuchisha. Cancunahuanmi llajtacunata urmachircani.

²¹Cancunahuanmi caballocunatapish tiyarijcunandijta huañuchisha. Cancunahuanmi carretacunatapish, chaicunapi purijcunandijta tucuchisha.

²²Cancunallahuantajmi c'aricunatapish, huarmicunatapish tucuchisha. Cancunahuanmi yuyajcunatapish, chairajcunatapish tucuchisha. Cancunahuanmi mosocunatapish, solteracunatapish tucuchisha.

²³Cancunallahuantajmi michijcunatapish, canlla ovejacunandijta tucuchisha. Cancunahuanmi chagrata rurajcunatapish, paicunapaj yapuj huagracunandijta huañuchisha. Cancunallahuantajmi q'uipucunatapish, mandajcunatapish tucuchisha” ninmi.

²⁴Mandaj Diosca cashnami nin: “Babiloniapi causajcunatapish, tucui Caldea llajtapi causajcunatapish Siónpi tucui laya llaquicunata rurashcamantami, cancuna ricucujllapitaj llaquichigrini” ninmi.

²⁵Mandaj Diosca cashnapishmi nin: “Tucui llajtacunata tucuchij urculla, cantaca japinamari tiyacuni. Ñuca maquihuan huajtashpami, cantaca rumi c'aca urita singuchisha. Rupachishpa, yana urcullatami saquisha.

²⁶Can urmashca q'uipaca, huasita shayachinapaj callari esquinapi churangapaj shuj rumillatapish pi mana japingachu. Cutin pircai callaringapaj, shuj rumillatapish pi mana mashcangachu. Huiñaitami shitashca saquiringui” ninmi Mandaj Diosca.

²⁷Tucui cai pachapi banderata alzaichigari. Chai pueblopi causajcunahuan macanacungapaj, trompetapi tocashpa tucui llajtacunamanta tandanacuichigari. Tucui runacuna paicunahuan macanacungapaj. Ararat, Mini, Askenaz shuti llajtacunamanta tandanacuichigari. Chai pueblopi causajcunahuan macanacuipi alli pushachun, alli mandajta churaichigari. P'iña langostacunatajlla caballocunapi tiyarishca huichiyamuichigari.

²⁸Media llajtata jatun mandajcuna, cancuna churashca mandajcunandij, tucui mandaj soldadocunandij, cancuna mandacun tucui llajtacunapi causajcunandij allichirichigari. Babiloniapi causajcunahuan macanacunaman llujshirichigari.

²⁹Mandaj Diosca, Babilonia llajtata llaquichisha nishcataca pajtachigrinmari. Chai llajtataca shuj runallapish illaj, shitashcatamari saquinga. Chaita rurajpica, cai pachapish chujchushpa llaquillamari saquiringa.

³⁰Babilonia llajta c'ari c'ari soldadocunaca, mana macanacui tucushpa saquincunamari. Fuerza illajpimari, jatun torrecunapi huichcarincuna. Huarmicuna shinamari tucuncuna. Paicunapaj huasicunaca rupacunmari, pueblo pungu aldabacunapish p'aquishcamari.

³¹Babilonia pueblota jatun mandajpajmanca quillcacunata apajcunapish, maquin maquinmi quillcacunata chayachingacuna. Huillajcunapish huashan huashan chayashpami: P'iñajcunaca ñami mishashpa tucui ladota puebloman yaicuncuna nishpa huillangacuna.

³²Paicunata p'iñajcunaca jatun yacuta ch'imbanallacunapipish cuidacunmari. Baluarte nishca macanacunacunatapish rupachincunamari. Soldadocunaca jatun manchaihuan chujchucunmari.

³³Tucuita Mandaj, israelcunapaj Diostajmi cashna nin: “Babilonia puebloca granota trillana pamba shinami. Ñallami chagrata tandana punllapish chayamugrin” ninmi.

³⁴“Babilonia llajtata jatun mandaj Nabucodonosormi, ñucataca ñutushpa tucui micurca. Chashna rurashpami, ñucataca chushajlla vasota shina saquirca. Jatun manchanana animal shamushpa huijsa jundata micuj shinami, ñuca charishca ima sumajcunataca tucuchirca. Chashna micushpaca, ñucataca llujshichishpami shitarca.

³⁵Ñucata chashna llaquichishcamantaca, jatunta llaquichishcataj cachun. Ñucanchij familiacunapaj yahuarmantaca, caldeocunaca llaquita apachuntaj” ningacunami. Sión urcupi caj Jerusalenpi causajcunami chashnaca ningacuna.

³⁶Chaimantami Mandaj Diosca cashna nin: “Ñucami canmanta shayarigrini. Canta llaquichishcamantaca, paicunatapish llaquichigrinimi. Paicunapaj jatun yacutapish, uchilla huaicu yacucunatapish tucuimi chaquichigrini.

³⁷Babilonia pueblopish, rumi montonllami saquiringa. Chaipica chacal animalcunallami causanga. Chashna shitashca saquirishcamantaca tucuicuna mancharinapish, chanzata rurashpa asinapishmi canga.

³⁸Jatun leoncuna huacaricuj shina tucuicunami capariringacuna. León huacaricuj shina purincuna. Huacaricuj malta leoncuna huacaricuj shinami puringacuna.

³⁹Paicuna cunujlla tiyacujpimi, ñucaca jatun micuita rurashpa machachigrini. Chashna machashpa cushicushpami, huiñaita mana rijcharingapaj dormingacuna. Mandaj Diostajmi chashna nini.

⁴⁰Paicunataca huañuchingapaj charicushca malta c'ari ovejacunata, carnerocunata, jatun c'ari chivocunata shina callarishpami huañuchichisha.

⁴¹Tucui cai pachapi causajcuna alli nishca Babilonia llajtaca ¿ima shinataj shujtajcunapaj maquipi urmarcachu imamí? ¿Ima shinataj tucui llajtacunapi causajcuna mancharina tucurcachu imamí?

⁴²Mama cucha yacumari Babilonia jahuata shamushca. Manchanayajta jahuata jatarishpamari, tucuita millpushca.

⁴³Tucui chai llajta pueblocunamari shitashca saquirishca. Imapish illaj, chaquishca allpallamari. Chai shitashca allpapica, pi mana causangachu. Chaitaca pi mana puringallapishchu.

⁴⁴Babilonia llajtapaj Bel shuti diostaca, ñuca japishpaca llaquichishatajmi. Imallata micushcataca, huijsamanta llujshichishami. Cutinca ña mana shujtaj llajtacunamanta paipajman ringacunachu. Babilonia pueblo muyundij jatun pircapish ñallamari urmanga.

⁴⁵Ñuca agllashcacuna chaimanta llujshichigari. Tucuicuna cancunapaj causaita quishpichichigari. Ñuca, Mandaj Diosmari jatunta p'iñarishpa chai pueblotaca llaquichigrini.

⁴⁶Huatan huatan jatun llaquicuna uyarijpipish, cancunaca ama manchanguichijchu, ama mancharinguichijpishchu. Chai llajtapica jatun llaquicunami tiyanga. Shuj llajtata mandajca, caishuj llajtata jatun mandajhuanmi macanacunga. Chashna jatun huañunacuimi tiyanga.

⁴⁷Shamuj punllacunapica, Babiloniapi tiyaj tucui dioscunatami ñutusha. Tucui chai llajtapaj jatun pingaimi canga. Tucuicunami chaillapitaj huañuchishca cangacuna” ninmi.

⁴⁸Mandaj Diostajmi cashnapish nin: “Janaj llajtamantami Babiloniata tucuchinaman shamungacuna. Paicuna shamushpa Babiloniata urmachijpica, jahua pachapish, cai pachapish, chaicunapi imalla tiyajcunapishmi jatun cushicuihuan cantangacuna.

⁴⁹Babiloniapi causajcunami huañuchircacuna. Paicunamantami chai runacunaca, tucui cai pachapi paicuna huañuchishca shinallataj huañungacuna” ninmi.

⁵⁰Espadapi huañunamanta quishpirishcacunaca ama uniyashpa, utca callpaichigari. Mandaj Diostaca cancunapaj tucui causaipi yuyarishpa causanguichij. Jerusalentapish pajta cungaringuichijman.

⁵¹Cancunaca: “Ñucanchijca c'amijpi, pingaihuanmari canchij. Maitajshi runacuna shamushpamari Mandaj Diospaj huasipica, paipaj ch'icanchishca ucucama yaicurcacuna. Chaimantamari ñahuita maipi mana churaipajta pingai tucunchij” ninguichijmi.

⁵²Chaimantami Mandaj Diosca cashna nin: “Shamuj punllacunapica, Babiloniapi causajcunapaj tucui dioscunatami ñutusha. Chai tucui llajtapimi, chugririshca runacuna capariringacuna.

⁵³Babilonia llajtapi causajcunataca, jahua pachaman huichiyajpipish, chaipi jatun torrecunata rurajpipish, chaipi tucuchichun paicunata p'iñajcunata cachashallami” ninmi Mandaj Diosca.

⁵⁴Caldeocuna causan Babilonia llajtapica, jatun llaquihuan caparirishcamari uyaricun.

⁵⁵Mandaj Diosmari chai llajtataca llaquichicun. Chaipi causajcuna yallitaj jatun tucushca cashcataca tucuchicunmari. Paicunata p'iñajcunaca mama cucha yacu jatarishca shinami uyaringa. Yacu manchanayajta huajiacuj shinami capariringacuna.

⁵⁶Chai p'iñajcunami Babiloniata urmachingacuna. Paipaj c'ari c'ari soldadocunatapish prezu japingacunamari. Mandaj Diosca, shujtajta llaquichijcunataca llaquichijmi. Chaimantami Babiloniapi causajcunamanca, paicunaman cuna cashcata cunga.

⁵⁷Tucuita Mandaj Dios shuti Jatun Mandajca: “Paipaj mandajcunata, jatun yachajcunata, mandaj soldadocunata, charij runacunata, c'ari c'aricunata tucuicunatami machachisha. Huiñaita ama rijcharingapajmi dormishpa saquiringacuna” ninmi.

⁵⁸Tucuita Mandaj Diosca cashnapishmi nin: “Babilonia pueblo muyundijta shayacuj jatun ancho pircaca tucui urmachishpa, pambapi shitashcami canga. Chai pircapi caj jatun pungucunapish ushpallami saquiringa. Tucui llajtacunamanta shamushca runacuna shaicuita trabajashcaca ninapajlla, yanga trabajashcami tucunga” ninmi.

⁵⁹Judá llajtata jatun mandaj Sedequías samarinata ricujca, Neriaspaj churi Seraiasmi carca. Neriaspaj yayaca Maasiasmi carca. Sedequiasca ñami chuscu huatata Judá llajtata mandacurca. Chai huatami paica Seraiasdijllataj Babilonia llajtaman rirca. Chaiman ricujpimi Jeremiasca, Seraiasmanca shuj quillcata cushpa cacharca.

⁶⁰Babilonia llajtapaj imalla llaquicuna shamuna cashcata Dios huillashcataca, tucuitami Jeremiasca shuj libropi quillcarca. Ña quillcashca tiyacushcamantami, tucuita mushujpi quillcarca.

⁶¹Chai q'uipaca Jeremiasca, Seraiastaca cashnami nirca: “Babiloniaman chayashpaca, tucui cai shimicunata rezangui, pajta cungaringuiman.

⁶²Ña rezashpaca: Mandaj Dioslla, canmari cai Babilonia llajtataca shuj runallapish illaj saquirijta tucuchisha nishcangui. Runacunapish animalcunapish illajta, huiñaita shitashcatami saquisha nishcangui ningui.

⁶³Cai quillcata ña tucui rezashca q'uipaca, shuj rumipi huatashpa, Éufrates yacu chaupipi shitangui.

⁶⁴Chaipi shitashpaca: Cai Babilonia llajtaca, chashnami ñuca cachashca jatun llaquipica huashicunga. Chai llaquimantaca cutinca ña mana jataringachu. Tucuimi chingaringa ningui” nircami. Jeremías huillashca shimicunaca caicamallami.