Read Chimborazo Highland Quichua JEREMÍAS 7 Bible Online

JEREMÍAS 7 - Chimborazo Highland Quichua bible

JEREMÍAS 7

¹Mandaj Diosca, Jeremiastaca cashnami nirca:

²“Ñuca Mandaj Diospaj huasi pungupi shayarishpa, cashna nishpa cai shimicunata huillagri: Judá llajtapi causajcuna, cancunaca tucuicunami cai punguta yaicushpa, Mandaj Diostaca adoranguichij. Cunanca pai Mandaj Dios ima nishcata uyaichigari.

³Tucuita Mandaj, can israelcunapaj Diosca cashnami nin: Cancunapaj causaita allichishpa, allita ruraichigari. Chashna allichirijpica, cancunataca cai llajtapi causachun saquishami.

⁴Caica Mandaj Diospaj huasimari, caica Mandaj Diospaj huasimari, caica Mandaj Diospaj huasimari nishpa cancunata inquitajcunapica, ama shunguta churaichijchu.

⁵Ashtahuanpish cancunaca causaita allichishpa, allita ruraichij. Tucui shunguhuantaj caishuj chaishujhuan alli caichij.

⁶Mana cancunapura cajcunatapish, yaya mama illaj huahuacunatapish, viudatapish ama imatapish quichushpa llaquichichijchu. Cai llajtapica manapish ima millaita ruracujcunataca, ña ama japishcahuan huañuchishpa yahuarta jichaichijchu. Shujtajcunapaj dioscunatapish ña ama catichijchu. Cancunapaj llaquipajllatajmari chaicunataca ruracunguichij.

⁷Chaicunata saquijpica, cancunapaj ñaupa yayacunaman huiñaipaj cushca cai llajtapi causachun saquishami.

⁸Cancunaca manapish alli causaita cuipaj, llulla shimicunahuan inquitashcallamari causacunguichij.

⁹Chaimantami shuhuashpa, huañuchishpa, huainayashpa, llullangapaj ñuca shutita rimashpa, Baalmanpish inciensota cushpa rupachinguichij. Cancuna mana rijsishca, shujtajcunapaj dioscunatapishmi catinguichij.

¹⁰Chashna rurashca jahuamari, ñucata mañana cai huasiman shamushpaca: Caipitajca ima mana manchachingachu ninguichij. Chashna nishpaca, ñuca mana ricunachishcallatatajmi ashtahuan ruranguichij.

¹¹¿Ñucata mañana cai huasica cancunapaj ricuipica, shuhuacuna causana jutcuchu imatagari? Ñucaca cancuna imallata ruracujtaca ricucunimi. Mandaj Diostajmi chashna nini.

¹²Ñucaca ñaupaca, Silo pueblopimi causarcani. Ñuca agllashca israelcuna millaita rurashcamanta, chai pueblota ñuca imata rurashcata ricugrichigari.

¹³Cancunapish cai tucui millaitami rurashpa causanguichij. Shina cajpipish ñucaca sarun huatacunamantami cancunataca punllanta rimani. Ashtahuanpish cancunaca manataj uyanguichijchu. Cayajpipish manataj cutichinguichijchu.

¹⁴Chashna rurashcamantaca ñucata mañana cai huasitapish, Silo pueblota shinallatajmi ruragrini. Cancunapaj ñaupa yayacunaman cushcamanta, cancunapaj shunguta churashca cai huasitaca urmachishatajmi.

¹⁵Efrainpaj huahua huahuacunataca tucuicunatami ñuca ñaupajmanta llujshichishpa cacharcani. Cancunatapish chai cancunapaj huauquicunata shinallatajmi, ñuca ñaupajmanta llujshichishpa cachasha ninmi.

¹⁶Canca cai runacunamantaca ama mañaichu. Ama paicunamantaca caparishpa ñucata mañaichu, ama saquipailla nichu. Paicunamanta mañashcataca mana uyashachu.

¹⁷Tucui Judá llajtapi, Jerusalén pueblo callecunapi cai runacuna ima shina millaita rurajtaca ¿manachu ricungui imatagari?

¹⁸Huahuacunaca, yantatami pallashpa cuncuna. Yayacunaca, ninatami japichincuna. Huarmicunaca, cutata chapushpa tandata rurashpami, jahua pachata jatun mandaj nishca huarmi diosman cuncuna. Shinallataj shujtaj dioscunamanpishmi cuncuna. Chashna rurashpami, ñucataca yallitaj p'iñachincuna.

¹⁹Paicunamari ñucataca p'iñachincuna. Chashna rurashpaca, paicunallataj jatunta pingai tucungapajmari llaquipi yaicuncuna” ninmi Mandaj Diosca.

²⁰Chashna cashcamantaca, Mandaj Diosca cashnapishmi nin: “Cunantajca jatunta p'iñarishpami, cai llajtapica jatun llaquita talligrini. Runacunapaj jahuapi, animalcunapaj jahuapi, yuracuna jahuapi, grano chagracuna jahuapimi mana huañuj lunyacuj ninata shina shitagrini” ninmi.

²¹Tucuita Mandaj, can israelcunapaj Diosca cashnapishmi nin: “Cancunaca mashna animalcunatapish huañuchicuichijlla, tucui rupachicuichijlla. Chai aichacunataca amijta micucuichijlla.

²²Ñucaca, cancunapaj ñaupa yayacunata Egipto llajtamanta llujshichimushpaca: Animalcunata ñucaman cushpa huañuchinguichij, tucui rupachinguichij nishpaca, mana mandashcanichu.

²³Ashtahuanpish cashna nishpami mandarcani: Cancunaca ñuca rimashcata cazunguichij. Cancuna cazujpica, cancunapaj Dios cashami. Cancunapish ñuca agllashca runacunami canguichij. Ñuca imalla mandashcata chaitataj rurashpaca, allimi causanguichij nircanimi.

²⁴Chashna mandajpica mana cazurcacunachu, mana uyashun nircacunallapishchu. Ashtahuanpish paicuna yuyashca shina causashpami, millai ch'ahuan shungucuna tucurca. Chashna tucushpami, ñaupajman rinapaj randica, huashaman rircacuna.

²⁵Cancunapaj ñaupa yayacunata Egipto llajtamanta llujshichimushcamantapacha cunancamami, ñucata servij tucui huillajcunata huasha huasha cachashpa huillachini.

²⁶Shina cajpipish manataj uyancunachu, manataj cazuncunachu. Ashtahuanpish ashtahuan sinchi shungucuna tucushpami, paicunapaj yayacunatapish yalli millaita rurancuna.

²⁷Cunan can cai shimicunata nijpipish, mana uyangacunachu. Cayajpipish, mana cutichingacunachu.

²⁸Chashna cashcamantaca cashna ningui: Cai llajta runacunaca, paicunata Mandaj Diosta mana cazuj runacunami. Imata jarcashpa yachachishcatapish, mana chasquishun nincunachu. Paicunapaj shimimantaca mana llullaj shimicunaca tucui chingarishcami ningui” nircami.

²⁹Jerusalenpi causajcuna, Mandaj Diosca cancunataca paita p'iñachij huahuacuna cajpimari p'iñarishpa shitashca. Cancunapaj uma ajchata rutushpa pambapi shitaichij. Lomacunaman huichiyashpa caparishpa huacaichij.

³⁰Mandaj Diostajmi cashna nin: “Judá runacunaca ñuca ñaupajpimi millaita rurancuna. Ñucata mañana huasitaca, millanana dioscunata chai ucupi churashpamari mapayachincuna.

³¹Hinompaj churipaj pugru pambapi caj Tofet huaicucunapipish altarcunata rurashpami, paicunapaj churicunata, ushushicunata rupachincuna. Chaitaca manamari mandarcanichu. Chaita rurachun ninataca, mana yuyashcanillapishchu.

³²Paicuna chaita rurashcamantaca, ñuca Mandaj Diostajmi cashna nini: Shuj jatun llaqui punllami chayamugrin. Chai punllapica, chai pambaca ña mana Tofet nishca cangachu. Hinompaj churipaj pugru pamba nishcapish mana cangachu. Ashtahuanpish jatun Huañui Pamba nishcami canga. Huañushcacunatapish maipi pambana illajpimi, chai Tofetllapitaj shitangacuna.

³³Cai runacuna huañushca aichacunataca pi mana pambaipaj tiyajpimi, huairata purij pajarocuna, sacha animalcuna micunga. Chai animalcunata manchachijllapish, pi mana tiyangachu.

³⁴Chashna rurashpami, Judá llajtamantapish, Jerusalén pueblo callecunamantapish asishpa cushicuihuan cantanataca chingachisha. Shinallataj cusayuj, huarmiyuj tucushca punlla cantanatapishmi chingachisha. Tucui llajtatami shitashcata saquisha” ninmi.