Read Chimborazo Highland Quichua JEREMÍAS 8 Bible Online

JEREMÍAS 8 - Chimborazo Highland Quichua bible

JEREMÍAS 8

¹Mandaj Diosca cashnapishmi nin: “Chai punllacunapica Judá llajtata jatun mandajcunapaj tullucunatapish, caishuj mandajcunapaj tullucunatapish, curacunapaj tullucunatapish, huillajcunapaj tullucunatapish, Jerusalenpi causajcuna huañushca tullucunatapishmi pambashca siricunmanta llujshichishpa shitangacuna.

²Chai tullucunataca intipish, lunapish, jahua pachapi tiyaj tucui luzerocunapish yurajyachishca sirichunmi shitangacuna. Paicuna causacushpaca chaicunatami c'uyarcacuna, chaicunatami servircacuna, chaicunatami catircacuna, chaicunatami cungurishpa imatapish tapujcuna carca. Pi mana pallashpa pambangacunachu. Ashtahuanpish majada shinami allpa jahuapi siringa.

³Chai millai runacunapuramanta saquirijcunatapish caita, chaitami prezu cachasha. Chaicunapish maipi cashpapish causanata munanapaj randica, huañunatami munangacuna” ninmi. Tucuita Mandaj Diostajmi chashna nin.

⁴Cashnapish ningui: “Mandaj Diosca cashnami nin: Maijanpish urmashpaca ¿manachu cutin jatarin? Ñanta chingachijpish ¿manachu ñanta mashcashpa cutin tigran?

⁵Chashna cashcamantaca ¿imamantataj cai Jerusalenpi causajcunaca, huiñaita ñucahuan p'iñarishpa, manataj ñucapajman tigrancunachu imamí?

⁶Ñucaca callarishpamari, tucuita uyacuni. Manamari shujllapish millaita rurashcamanta llaquirishpa cutirinchu. ¿Caitaca imatataj ruracunichu imamí? nishpallapish mana tapurinca. Allitaca pi mana rimanchu. Tucuicunamari paicunapaj quiquin ñantaca, frenota cacharijpi macanacuiman caballo callpashpa yaicuj shina purincuna.

⁷Cigüeñacunapish, jahua pachata ricushpa ima quillapi shujtajman rina cashcata yachanmi. Urpicunapish, grullacunapish, golondrinacunapish ima quillapi quiquin llajtaman tigranata yachancunami. Ashtahuanpish ñuca agllashca cancunaca, Mandaj Dios ñuca mandashcataca mana rijsinguichijchu.

⁸Chashna cashca jahuaca ¿ima nishpataj cancunaca: Ñucanchijca jatun yachajcunami canchij. Mandaj Dios mandashcataca ñucanchijmari charinchij ninguichigari? Chai shimicunataca quillcajcunamari llullahuan mirachishpa quillcashcacuna.

⁹Ñuca, Mandaj Diospaj shimita p'iñajcunaca ¿ima jatun yachajcunatagari? Chai yachajcunaca jatunta pingarishpa mancharishpa, upayashpami saquiringacuna.

¹⁰Paicunapaj huarmicunatapish, chagracunatapish cai llajtata quichunaman shamujcunamanmi cugrini. Jatuncunamanta callarishpaca, ashtahuan uchillacunacamami jahuanpi jahuanpi charinallata yuyancuna. Ñucamanta huillajcunamanta callarishpa, curacunacama tucuicuna umajcunami.

¹¹Ñuca agllashcacuna chugririshcataca: Ñami sumaj causai tiyagrin, ñami sumaj causai tiyagrin nishpami, nanaita cungachisha nincuna. Ashtahuanpish sumaj causaica mana tiyanchu.

¹²Millaicunata rurashcamantaca ¿pingarincunachu imatagari? Mana yangamanta nicunichu, paicunaca manataj pingarincunachu. Ashallatapish mana pingarincunachu. Pingarina ima cashcatapish mana yachancunachu. Chaimanta ñuca llaquichi punllapica, caishujcuna shinallatajmi urmangacuna” ninmi Mandaj Diosca.

¹³Mandaj Diosca cashnapishmi nin: “Ñucaca tucuitamari chaquichigrini, uva chagrapipish shuj uva granollapish mana saquiringachu. Higo yuracunapipish shuj granollapish mana saquiringachu. Yura p'angacunacamami chaquishpa urmanga. Imallata paicunaman ñuca cushcacunaca shujtajcunapajmi tucunga” ninmi.

¹⁴Ñucanchijta Mandaj Diostamari juchahuan p'iñachishcanchij. Chaimantamari paica hielhuan chagrushca yacuta ubyachishca. Chashna cashcamantaca ¿imapajtaj caipica tiyacushunri? Tucui ñucanchijta huañuchichunca tandanacushpa, jatun pircacunayuj pueblocunaman jacuchijlla.

¹⁵Sumaj causaitamari shuyacurcanchij. Ashtahuanpish ima alli mana tiyanchu. Cai jatun nanaita jambichunmari shuyacurcanchij. Ashtahuan mancharina llaquillami tiyan.

¹⁶P'iñajcunaca ñamari shamuncuna. Paicunapaj caballocunaca ñamari p'ucurishpa Dan llajtata shamucun. Chai caballocunaca allpa chujchujtamari huacarishpa callpamuncuna. Paicuna chayamushpaca allpapi tucui imalla tiyajtami tucuchicun. Tucui pueblocunatapish, chaicunapi causajcunatapishmi tucuchicun.

¹⁷Mandaj Diosca cashnami nin: “Ñucamari cancunata llaquichichunca, huañuchij culebracunata cachani. Chaicunataca imahuan mana muspachi tucunguichijchu. Chaicunamari cancunataca canishpa tucuchinga” ninmi.

¹⁸Cai jatun nanaihuanca, ñuca shunguca imatajshi tucugrij yuyachinca.

¹⁹¡Aij, ñuca llajtapi causajcunalla! Manchanayajta caparirishcamari carucunamanta uyaricun. “¿Mandaj Diosca Sionmantaca illanchu imatagari? Sionta Jatun Mandajca ¿ñachu mana chaipi tiyacun imatagari?” nincunamari. Mandaj Diosca: “¿Imamantataj rurashcalla shujtaj yanga dioscunata cungurishpa ñucata p'iñachircacuna?” nircami.

²⁰Ñapishmari chagracunata tandana usya punllacunapish tucurin. Shina cajpipish ñucanchijpajca, quishpirina mana tiyanca.

²¹Ñuca llajtapi causajcuna llaquita apacujpimari, ñucapish jatun llaquihuan cani. Llaquihuan, manchaihuan yuyai amsayashcamari cani.

²²Galaad llajtapica ¿bálsamo aceite tiyanchu imashi? ¿Manachu maijan jambij tiyanga imashi? ¿Imamantataj ñuca llajtapi causajcunaca, ima jambihuan manataj alliyanchu imamí?