Read Chimborazo Highland Quichua JEREMÍAS 9 Bible Online

JEREMÍAS 9 - Chimborazo Highland Quichua bible

JEREMÍAS 9

¹Ñuca uma pugyu tucujpica, ñuca ñahuicunamanta yacu huiñacuj shina huiqui llujshicujllapica, ñuca llajtapi causajcuna huañushcamantaca, tutapish punllapish huacacuimanllachari.

²Mana cashpaca shitashca pambapi ñanta purijcuna llandurina shinallatapish ñuca causanapaj maijan cujpica, ñuca llajtapi causajcunata saquishpa chaimanchari riman. Chaipitajca paicunamanta ch'icanyaimanmi. Paicunaca tucuicuna huainayajcuna, mana cazujcunamari.

³Mandaj Diosca cashnami nin: “Paicunapaj c'alluhuanca puntajlla caspita arcohuan shitaj shinamari llullancuna. Cai llajtapi charijyashpapish, ima allitaca mana rurancunachu. Ashtahuanpish ashtahuan millaicuna tucushpami, ñucataca ña mana rijsincuna.

⁴Maijanpish: Ñucahuan apanacujhuanmi cani nishpa, ama cungailla purichun. Quiquin huauquillapitajpish ama shunguta churachun. Huauquillatataj umanllacunami, alli apanacujcunapish llullashpa llaquipi churanllacunami.

⁵Mana llullaca, shujllapish mana tiyanchu. Tucuicuna caishuj chaishuj umanacunllami. Paicunapaj c'alluca llullangapajca, mana huatarinchu. Millaita ruranallapimi yuyaita churancuna.

⁶Tucui laya umarishpami causacuncuna. Chashna yallitaj umajcuna cashpami, ñucataca mana paicunapaj Dios cashcata rijsishun nincuna” ninmi Mandaj Diosca.

⁷Chashnacuna cajpimi, tucuita Mandaj Diosca cashnapish nin: “Ñuca agllashcacunataca imata ashtahuan mana rurai tucunichu. Cunanca ninapi churashpami, tucui mapata anchuchigrini.

⁸Paicunapaj c'alluca llullashpa umangapajca, filosapa espada shinami. Shimihuanca apanacujcunapurapish sumajtami rimanacuncuna. Ashtahuanpish shungupica, ima llaquita ruranallatami yuyarincuna.

⁹Chashna rurashcamantaca ¿manachu llaquichisha imatagari? Chashna millai runacunataca ¿manachu p'iñarishpa ñacachisha imatagari?” ninmi Mandaj Diosca.

¹⁰Urcucunapimi caparishpa huacasha. Chaquishca pambacunapipishmi huacagrisha. Cunanca chai michina pambacunataca, maijan purishpallapish mana ricurinca, huagracuna huacashcapish mana uyarinchu. Sacha animalcunapish, huairata purij pajarocunapishmari mancharishpa maitatajshi rishcacuna.

¹¹Jerusalén pueblotaca rumi montonllatami saquisha. Judá llajtapi caj tucui caishuj pueblocunatapish chacal nishca animalcuna causanallatami rurasha. Shuj runallapish mana chaipi causangapaj saquiringachu.

¹²¿Imamantataj cai llajtapi tucui ima tiyashcacunaca chingachishca cangari? ¿Imamantataj shitashca pamba shina saquirinri? Cunanca maijan purishpallapish, mana ricurinca. ¿Pitaj imamanta cashna tucushcata yachaipaj alli yuyaiyuj canguichigari? Caishujcunaman huillachun Mandaj Diosca ¿maijanman imata huillarcachu imatagari?

¹³Mandaj Diosllatajmi cashna nin: “Ñucaca paicunapaj maquipimi mandashcacunata curcani. Chaitamari saquincuna. Ñuca rimajpipish, mana uyancunachu. Mana ñuca mandashca shina causancunachu.

¹⁴Ashtahuanpish paicunapaj shungu yuyashcatami rurarcacuna. Paicunapaj yayacuna yachachishca shinallataj, Baalcunatamari catircacuna” ninmi.

¹⁵Chaimanta cunanca tucuita Mandaj, can israelcunapaj Diostajmi cashna nin: “Cai runacunamanca ajenjotami cashtuchigrini, hielhuan chagrushca yacutami ubyachigrini.

¹⁶Shinallataj paicunapaj yayacunapish, paicunapish mana rijsishca llajtacunamanmi paicunataca caita chaita cachagrini. Maipi cajpipish, tucuringacamami espadahuan huañuchichisha” ninmi.

¹⁷Tucuita Mandaj Diosca cashnapishmi nin: “Caita alli uyaichij. Cancunamanta huacachun, huacaj huarmicunata cayaichij. Ima shinalla huacanata alli yachajcunata cayanguichij” ninmi.

¹⁸Ñucanchijmanta huacanaman utca shamuichigari. Ñucanchij ñahuicunamantapish yacu shina huiquipish llujshichun. Ñucanchij ñahui millmapish yacuyashpa tucurichun.

¹⁹Sionmantaca: “Ñucanchij allpacunata shitashpamari rigrinchij. Ñucanchij huasicunataca tucuimari urmachincuna. Caitaj jatun llaquitamari rurancuna, jatuntamari pingai tucunchij” nishpa huacashcamari uyaricun.

²⁰Huarmicuna, Mandaj Dios ima nishcata chasquichigari. Rinrinta pascashpa uyaichigari. Paipaj shimihuanmari cashna nin: “Cancunapaj ushushicunamanca huacanata yachachichigari. Cancunahuan apanacuj huarmicunamanpish cashna yupashpa, yupashpa huacanata yachachichigari:

²¹Ñucanchij huasicunamanca huañuimari ventanacunata yaicumushca. Mandana huasicunacamamari yaicushca. Cunanca callecunapi puricuj huahuacunatapish, tandanacuna pambacunapi purij chairaj c'aricunatapishmi tucuchicun nichun yachachichij ninmi” ningui.

²²Cashnapish ningui: “Mandaj Diosca cashnami nin: Huañushcacunaca majada shinami pambacunapi shitashca saquiringa. Trigota cuchushpa, gavillashpa saquijpi mana tandashca shinami ricuringa ninmi ningui” nircami.

²³Mandaj Diosca cashnami nin: “Yachajpish ama pai yachashcallahuan cushicuchun. C'ari c'ari runapish, ama c'ari c'ari cashcallamanta cushicuchun. Charij runapish, ama pai charishcacunallamanta cushicuchun.

²⁴Ashtahuanpish maijan cushicusha nishpaca, Mandaj Dios ñucata rijsishpa, ñuca ima nishcatapish cazuj cashpa, cai pachapipish ñucaca c'uyaihuan tucuicunapaj allita ricushpa, cashcata ruracujta rijsij cashpa cushicuchun. Ñucaca chaimanta cushicuchunmi munani” ninmi Mandaj Diosca.

²⁵Mandaj Diosca cashnapishmi nin: “Charishca aicha mirga carata p'itichishca c'aricunatapish, mana chaita rurachishcacunatapish ñuca llaquichina punllacunami chayamucun”.

²⁶Egiptopi, Judapi, Edompi, Amonpi, Moab llajtapi causajcunata, shinallataj shitashca pambapi tucui causajcunatapishmi llaquichisha. Chai tucui runacunaca, charishca aicha mirga carata mana p'itichishcacunami. Israelcunacarin shungumanta millai yuyaita mana p'itishcacunami.