Read Chimborazo Highland Quichua LAMENTACIONES 2 Bible Online

LAMENTACIONES 2 - Chimborazo Highland Quichua bible

LAMENTACIONES 2

¹¡Aij, Jatun Diosca yallitaj p'iñarishpamari, Sión pueblotaca amsayachirca! Pai jatunta p'iñari punllaca, Siónca paipaj chaqui saruna cashcatapish mana yuyarircachu. Chaimantami israelcuna sumaj cashcataca jahua pachamanta allpaman shitarca.

²Jatun Diosca jatunta p'iñarishpami, Jacobpaj huasicunataca shujllatapish mana saquishpa, tucui huasicunata urmachirca. Judapaj tucui jatun torrecunataca pambapimi shitarca. Tucui Judá llajtatami mandajcunandijta cumurichirca.

³Pai jatunta p'iñarishpaca israelcuna jatun cashcataca tucuitami urmachirca. P'iñajcunahuan macanacuipica paipaj alli maquitaca ña mana mañachircachu. Ninata japichishpamari Jacobpaj tucui muyundijta rupachirca.

⁴P'iñaj runa shina paipaj alli maquihuan arcota alli japishpami, paita huañuchingapaj shayarirca. Mana ricunachij runa shinallatajmi tucui ima sumaj tiyashcata tucuchirca. Sión pueblotaca jatunta p'iñarishpamari, ninata tallij shina llaquichirca.

⁵Jatun Diosca israelcunata p'iñajmi tucurca. Chaimantami tucuita tucuchirca. Paicunapaj tucui mandana huasicunata, tucui jatun torrecunatami urmachirca. Chashna rurashpami Judapi causajcunataca jahuapi jahuapi llaquichishpa huacachirca.

⁶Paicunapaj pueblotaca, huerta chaupipi shayachishca chugllata shinallami anchuchirca. Paicuna tandanacuna huasitapish tucuimi urmachirca. Siónpi causajcuna jatun punllacunapi tandanacunatapish, samana punllacunata yuyarinatapish Mandaj Diosmari tucuchirca. Jatunta p'iñarishpamari jatun mandajtapish, curacunatapish shitarca.

⁷Jatun Diosca paipaj altartapish shitarcami, paipaj huasipi tiyanatapish millarcani. Chaimantamari pai mandashpa tiyana huasi muyundij jatun pircata urmachichun, p'iñajcunapaj maquipi churarca. Mandaj Diospaj huasiman paicuna yaicushpaca, fiesta punllapi shinami caparirircacuna.

⁸Sión pueblo muyundij jatun pircataca, Mandaj Diosmari urmachinata yuyarirca. Cordelta chutashpamari, mana llaquishpa tucuita urmachirca. Canllanij jatun pircatapish, ucunij pircatapish ishquindijtami tandachishpa urmachirca. Jatunta caparirishpa huacanatami rurarca.

⁹Pueblo pungucunatapish aisashpa pambapimi shitarca. Fierro aldabacunatapish ñutushpa tucuchircami. Paicunata jatun mandajpish, caishuj mandajcunapish Mandaj Dios mandashcata mana charij llajtacunapimi prezu causacuncuna. Dios ima nishcata huillajcunamanpish imata huillachun ña mana ricuchinchu.

¹⁰Siónpi causajcunata cunaj yuyajcunapish pambapimi upajlla tiyarircacuna. Umacunapipish ushpatami tallircacuna, cañamazu churanatapishmi churarircacuna. Jerusalén pueblo solteracunapish umata pambapi churarcacunami.

¹¹Ñuca aillupuracunaca chashna jatun llaquimi tucurca. Malta huahuacunapish, chuchucuj huahuacunapish pueblo chaupi pambacunapimi yaricaihuan urmashpa huañurcacuna. Chaita ricushpami shunguta allashpa llaquirishpa huacarcani. Ñuca ñahuicuna tucui yacuyacuj shinami huiquica llujshirca.

¹²Huahuacunaca mamacunataca: “¿Tandapish, vinopish maipi tiyanchu?” nishpami tapurcacuna. Chashna nishpami, chugririshca runacuna shina pueblo ñancunapi yaricaihuan urmashpa huañurcacuna. Mamacunapaj rigracunapipish, allimanta samai chingarishpami huañurcacuna.

¹³Jerusalenpi causajcunalla, cancunata ricuchunca ¿pitataj pushamushari? ¿Mana cashpaca pihuantaj cancunataca ch'imbapurashari? Siónpi causajcunalla, cancunataca ¿piman rijchashcata nishpataj cushichishari? Mama cucha shina jatun llaquimari cancunataca japishca. ¿Pitaj chaitaca alliyachi tucungari?

¹⁴Cancunaman huillajcunaca cancuna juchata ruracujta jarcashpaca, cancuna prezu rinata jarcanmanmari carca. Chaipaj randica manapish cashcallatamari Dios ricuchishcata shina huillashpa umarcacuna. Chashna llullata huillashpamari, cancunata pandachircacuna.

¹⁵Ñanta pasacujcuna canta ricushpaca, tucuicunami chanzata rurashpa maquipi huajtarircacuna. Quingushpa silbashpa, umata cuyuchishpami Jerusalentaca: “¿Cai pueblotachu tucui cai pachapi causajcuna cushicuna, tucuimanta yalli sumaj pueblo nijcuna carca?” nircacuna.

¹⁶Canta p'iñajcunaca tucuicunami c'amircacuna. Chanzata rurashpa, millpunamira cashturishpami: “Tucuchishunchigari, cunantajca ñucanchij yuyashca punlla pajtashcatajmari. Cunantajca ricunchijtajmari, cunantajca japinchijtajmari” nircacunami.

¹⁷Mandaj Diosmari pai rurasha nishcata rurarca. Ñaupamanta pai huillachishcatamari pajtachirca. Pai urmachina cashcataca mana llaquishpami, tucuita urmachirca. Canta p'iñajcunatamari mishashpa tucuchichun churarca. Canta mana ricunachijcunamanmari mishachun fuerzata curca.

¹⁸Paicunapaj shunguhuanmari Jatun Diostaca caparijcuna carca. Sión pueblolla, huaicumanta yacu llujshicuj shina, tutapish punllapish huiquita jichayari. Cambaj ñahuitaca ama samachishpa huacacuilla.

¹⁹Tutapish cutin cutin jatarishpa, Jatun Diosta capariyari. Paipaj ñaupajpi yacuta tallij shina tucui shunguhuan llaquiriyari. Cambaj uchilla huahuacunaca, tucui calle pungucunapimari yaricaihuan huañucuncuna. Paicunaman causaita cuchun, ishqui maquita huichi chutashpa mañayari.

²⁰Mandaj Dioslla, ricuyari. Pita cashna llaquichishcataca yuyariyari. Huarmicunaca paicuna huachashpa, c'uyaihuan huiñachicushca huahuacunatamari micucuncuna. ¿Maitataj chashna llaqui tucuchun saquinguiyari? Curacunatapish, can ima nishcata huillajtapish can Jatun Diospaj huasi ucupi huañuchishca cachunca ¿maitataj saquinguiyari?

²¹Huahuacunapish, yuyajcunapish pueblo ñancunapimi huañushca siricurca. Ñuca solteracunapish, ñuca mosocunapish espadapimi huañurcacuna. Jatunta p'iñarishpamari, chai punllapica mana llaquishpa, cungata p'itircangui.

²²Mandaj Dioslla, tucui ladomanta llaquichijcunata pushamushpamari, ñucataca jatun manchaipi churahuarcangui. Chaicunataca ima jatun tandanacuiman shinamari tandachimurcangui. Can jatunta p'iñari punllapica, ñuca cuidashpa huiñachishca huahuacunaca pi mana quishpiri tucurcachu, pi mana causaihuan saquirircachu. Ñucata p'iñajcunaca tucuicunatamari huañuchirca.