Read Chimborazo Highland Quichua LAMENTACIONES 5 Bible Online

LAMENTACIONES 5 - Chimborazo Highland Quichua bible

LAMENTACIONES 5

¹Mandaj Dioslla, ñucanchij llaqui tucushcata yuyarihuayari. Ñucanchijta cashna c'amishpa llaquichicujtaca tigrashpa ricuyari.

²Ñucanchij imalla charishcacunaca mana rijsishca runacunapaj maquipimari. Ñucanchij huasicunataca shujtajcunamari charicun.

³Yaya illajlla, shitashca huahuacunamari canchij, ñucanchij mamacunapish viuda huarmicuna shinamari.

⁴Ñucanchij yacullatatajpish, cullqui jahuamari ubyanchij. Ñucanchij yantallatatajmari randinchij.

⁵Ñucanchijca llashajta aparishca shina llaquinayajta, shaicuitamari causanchij. Samarinataca manataj charinchijchu.

⁶Ñucanchij huijsa micunapajpish, Egipto llajta, Asiria llajta runacunatami maquita chutashpa mañanchij.

⁷Juchata ruraj ñucanchij yayacunaca ñamari huañurca. Ashtahuanpish ñucanchijmari paicunamanta llaquita apacunchij.

⁸Servijcunamari ñucanchijta mandacuncuna. Paicunapaj maquimantaca pi mana cacharichi tucunchu.

⁹Ñucanchij micunata apamunaman llujshirishpapish, shitashca pambacunapi chapashpa huañuchijcuna japishpa espadahuan huañuchina manchaimi purij carcanchij.

¹⁰Yaricaihuan chaquishpamari, ñucanchij aicha carapish horno shina yanayarca.

¹¹Sión pueblopipish, Judá llajtapi tiyaj caishuj pueblocunapipish jatun huarmicunatapish, c'arihuan manaraj chayarinacushcacunatapish japirishpa llaquichircacunami.

¹²Mandajcunatapish maquicunapi huatashpamari huarcurcacuna. Yuyajcunatapish, huambracunata shinami rimarcacuna.

¹³Sinchiraj c'aricunataca cutachunmi churarcacuna. Huambra c'aricunamari yantata aparinapica, shaicushpa urmarcacuna.

¹⁴Pueblo pungucunapipish yuyajcunaca, ña mana ricurinchu. Huiñacuj huambracuna cantashcapish, ña mana uyarinchu.

¹⁵Ñucanchij shungupica, ima cushicuita ña mana charinchijchu. Ñucanchij cushicushpa tushunaca, jatun llaquimanmari tigrashca.

¹⁶Ñucanchij umapi tiyacushca coronamari urmashca. ¡Aij ñucanchijlla, juchata rurashcamantamari cunanca cashna llaquipi canchij!

¹⁷Chaimantamari ñucanchijca shungu p'aquirishpa llaquirircanchij, ñucanchij ñahuicuna zuyuyajtamari huacarcanchij.

¹⁸Sión urcuca shitashcamari, zorracunallamari chaitaca purincuna.

¹⁹Shina cajpipish Mandaj Dioslla, canca huiñaitamari causangui. Huiñai huiñaitamari cambaj jatun tiyanapi mandangui.

²⁰¿Imamantataj ñucanchijtaca manataj yuyaringuiyari? Ña cai tucui huatacunatamari ñucanchijtaca shitashcata saquingui.

²¹Mandaj Dioslla, ñucanchijtaca cambajman tigrachihuailla, tigrarishunllamari. Ñaupa shinallataj cambaj cangapaj, ñucanchij causaita mushujyachihuailla.

²²Ñucanchijhuanca jatuntamari p'iñarishcangui. Chashna p'iñarishpa, can shitashcamari causacunchij.