Read Chimborazo Highland Quichua EZEQUIEL 1 Bible Online

EZEQUIEL 1 - Chimborazo Highland Quichua bible

EZEQUIEL 1

¹Ñucaca, Quebar shuti jatun yacu c'uchupimi, prezu apashcacunapaj chaupipi carcani. Ñucaca, quimsa chunga huatayujmi carcani. Chai huatapaj chuscu quillapimi, jahua pacha pascarijpi, Taita Dios imallata ricuchishca muscuipi shina ricurcani.

²Jatun mandaj Joaquinta prezu apamushcapish, ñami pichca huata tucurca. Chai huata callari pichca punllapimi,

³Mandaj Diosca, caldeocunapaj llajtapi tiyaj Quebar jatun yacu c'uchupi, Buzi shuti runapaj churi Ezequiel curamanca huillarca. Chaipimi Mandaj Diosca, paipaj maquitaca Ezequielpaj jahuapi churarca.

⁴Ñucaca, janaj ladomanta jatun acapana shamucujtapish, achca p'uyu jahuata nina pillurishca shamucujtapishmi ricurcani. Chai p'uyu muyundijtaca, achij nicurcami. Shinallataj nina chaupipica, bronceman rijchajmi achij nicurca.

⁵Chai p'uyu chaupipica, causaj chuscucunami ricurirca. Paicunaca runaman rijchajmi carca.

⁶Tucuicunami chuscu ñahuita, chuscu alasta charircacuna.

⁷Paicunapaj chaquicunaca, derechomi carca. Chaqui shungucunapish, bizipaj chaqui shungu shinami carca. Llambujlla bronce shina achij nicujmi carca.

⁸Chai causajcunaca tucuicunami chuscu ñahuita, chuscu alasta charircacuna. Chai alas ucucunapica, chuscundij ladomanmi runapaj maquicunata charircacuna.

⁹Alascunaca caishujpaj, chaishujpaj alascunahuanmi tupanacurca. Paicunaca maijan ladoman ringapajpish, mana paicunapaj ñahuicunataca tigrachircacunachu. Ashtahuanpish ñaupajllamanmi mana quingushpa purishpa rircacuna.

¹⁰Chai causaj chuscucunaca, tucuicunami cashna ñahuicunata charircacuna: Ñaupaj ladomanca runapaj ñahuimi carca. Alli ladomanca, leonpaj ñahuimi carca. Lluqui ladomanca, huagrapaj ñahuimi carca. Shinallataj caishuj ladomanca, aguilapaj ñahuimi carca. Chuscundijllatajmi chashna ñahuicunayuj carca.

¹¹Chashnami paicunapaj ñahuicunaca carca. Paicunapaj ishqui alascunataca, jahuata chutashcami carca. Chai alascunaca caishujcunapaj alascunahuanmi tupanacurca. Caishuj ishqui alascunahuanca, paicunapaj cuerpotami taparca.

¹²Tucuicunallatajmi ñaupajllaman ricushpa mana quingushpa purircacuna. Paicunata pushaj espíritu maijan ladoman purichijpipish, mana muyurishpa purircallacunami.

¹³Chai causajcunaca, puca nicuj nina carbonman rijchajcunami carca. Paicunapaj chaupipica, lamparacuna japichishca rupacuj shinapishmi carca. Chai ninamanta relampacuna llujshishpami achij nichirca.

¹⁴Chai causajcunaca callpashpapish, relampacuna shinami cutin tigrarcacuna.

¹⁵Chai causajcunata ricucushpaca, paicunapaj c'uchupica chuscundij ladoman ruedacuna allpa jahuapi cajtami ricurcani.

¹⁶Chai ruedacunaca crisólito rumiman rijchaj colorta rurashcami carca. Chai ruedacunaca chuscundij chai shinallatajmi carca. Chashna sumajta rurashca cashpami, chaupi ruedata shujtaj ruedata quinriman churachishca shina ricurirca.

¹⁷Chai ruedacunapish, chuscundij ladomanmi purirca. Puricushpaca mana tigrarircachu.

¹⁸Chai ruedacunaca, jatun mancharinami carca. Chuscundij ruedacunapimi, muyundijta ñahui luluncunahuan junda carca.

¹⁹Chai causajcuna purijpica, ruedacunapish paicunapaj c'uchutami purirca. Shinallataj causajcuna allpamanta jahuata jatarijpipish, chai ruedacunapish jahuatami jatarircacuna.

²⁰Chai causajcunata pushaj espíritu maiman pushajpipish, rircallacunami. Ruedacunata purichij espíritu maiman pushajpipish, chai ruedacunapish catishpa rircallami. Chai causajcunapi tiyaj espiritullatajmi ruedacunapipish tiyarca.

²¹Chaimantami chai causajcuna purijpica, ruedacunapish purirca. Causajcuna shayarijpica, ruedacunapishmi shayarirca. Chashnallataj causajcuna allpamanta jahuata jatarijpipish, ruedacunapish paicunata catishpa jatarircallami. Causajcunapi tiyaj espiritullatajmi ruedacunapipish tiyarca.

²²Chai causajcunapaj uma jahuapica, cristalman rijchaj pambajlla shinami ricurirca. Chaitaca paicunapaj uma jahuapimi aparcacuna.

²³Chai pambajlla shina ucupica, tucuicunallatajmi alascunataca caishujcunapaj alascunahuan tupanacungacama derechota chutarcacuna. Caishuj ishqui alascunahuanca, paicunapaj cuerpotami taparircacuna.

²⁴Paicuna puricujpica, paicunapaj alascunaca achca yacu huajiashca shinapish, Tucuita Rurai Tucuj Dios rimashca shinapish, achca runacuna puricuj shinapish, soldadocuna puricuj shinapishmi uyarirca. Paicuna shayarishpaca, alascunataca urichircacunami.

²⁵Paicuna shayarishpa alascunata uriyachijpica, ñapish paicunapaj uma jahuapi tiyacuj pambajlla jahuamantaca rimashca uyarircallami.

²⁶Chai pambajlla shina jahuapica, zafiro rumimanta rurashca jatun tiyarina tiyacujtapishmi ricurcani. Chai jatun tiyarinapica runaman rijchajmi tiyacurca.

²⁷Chai runaman rijchajca, cinturamanta huichimanca achij nicuj bronce shina, achij nicuj nina shinami ricurirca. Cinturamanta urimanca, muyundijtami nina shina achij nicuj ricurirca.

²⁸Ima shinami tamya punlla p'uyu chaupipi cuichi ricurin, chai shinallatajmi chai achij nicujca ricurirca. Mandaj Diospaj sumaj cashcaman rijchajmi, muscuipi shina ricurirca. Chaita ricushpaca, ñuca ñahui pambaman tupajtami cumurircani. Chaimantaca ñapish shuj rimashcatami uyarcani.