Read Chimborazo Highland Quichua EZEQUIEL 16 Bible Online

EZEQUIEL 16 - Chimborazo Highland Quichua bible

EZEQUIEL 16

²“Huañujlla aichayuj runalla, Jerusalenpi causajcunamanca paicuna yallitaj millananata rurashcata ricuchiyari.

³Cashna ningui: Mandaj Jatun Diosca Jerusalentaca cashnami nin: Can huacharishpa causanaca Canaán llajtami, cambaj yayaca amorreopurami carca. Cambaj mamaca heteocunapurami carca.

⁴Canta ricujpica, huacharipachamantami puputa mana p'itishca carcangui. Yacuhuanpish mana armachishcami carcangui, cachihuanpish mana sobashcami carcangui, mana maitushcapishmi carcangui.

⁵Chashna llaquinayaj cajta ricushpa llaquijca, pi mana tiyarcachu. Ashtahuanpish cantaca huacharishca punllamantami huañuchun nishpa maipipish shitashca carcangui.

⁶Ñucaca cambaj c'uchuta pasacushpami, yahuarlla, mapalla cashcata ricurcani. Chashna yahuarlla cashcata ricushpami, cantaca: ¡Causari, causanguimi! nircani.

⁷Cantaca urcupi tiyaj q'uihuata shinami mirachircani. Ña huiñashpa jatunyashpaca, sumaj huarmimi tucurcangui. Cambaj chuchucunapish, ajchapish huiñarcami. Shina cashpapish churana illaj, lluchullami carcangui.

⁸Cutinllataj cambaj c'uchuta pasashpami, ña casaranalla soltera tucushcata ricurcani. Chaimantaca can lluchullataj cajta ricushpami, ñuca churanahuan c'atachircani. Chashnami canhuanca ari ninacurcani. Chaimantamari ñucapajlla tucurcangui. Mandaj Jatun Diostajmi chashna nini.

⁹Cantaca yacuhuanmi armachircani, yahuarlla cajpipish maillachishpami, aceitehuan churarcani.

¹⁰Canmanca bordashca churanatapish, tejón nishca pargatetapish, linomanta, sedamanta rurashca churanacunatapishmi churachircani.

¹¹Cantaca sumajcunahuanmi sumajyachircani, maquicunapica brazaletecunata, cungapica huallcacunatami apachircani.

¹²Singapica sumaj achij nicujcunatami apachircani, rinrincunapica zarcillocunatami apachircani, umapica sumaj coronatami churachircani.

¹³Canca chashnamari curihuan, cullquihuan sumajyachishca carcangui. Shinallataj alli linomanta, sedamanta rurashca sumaj bordashca churanacunatami churarircangui. Micunatapish, trigo cutata, sacha chuspi huachashca mishquita, aceitetapishmi micurcangui. Chashnami canca tucuimanta yalli sumajyachishca carcangui. Chashna cashpami, jatun mandajpish tucurcangui.

¹⁴Cantaca ñuca sumajyachijpimi, sumaj tucurcangui. Chashna alli cashcamantami, cambaj shutica shujtaj llajtacunapipish alli nishca carcangui. Mandaj Jatun Diostajmi chashna nini.

¹⁵Ashtahuanpish canca can sumaj cashcallapimi shunguta churarcangui. Chashna cashpami mashna caita purijcunahuan huainayarcangui, canca paicunapajllami causarcangui.

¹⁶Lomacunapi tiyaj altar c'uchucunapimi, cambaj churanacunahuan mantashpa chaipi huainayarcangui. Chai shinaca manataj tucurcachu, cutinpish manataj chashnaca tucungachu.

¹⁷Shinallataj curimanta, cullquimanta ima sumajcunata rurashcataca ñucami curcani. Chaicunahuanmi runaman rijchaj dioscunata rurashpa, paicunahuan huainayarcangui.

¹⁸Shinallataj cambaj churanacunatapish, tucui laya colortami paicunamanca churachircangui. Ñuca aceitetapish, ñuca inciensotapish paicunapaj ñaupajpimi churarcangui.

¹⁹Can micuchun ñuca carashca tucuimanta yalli alli cutatapish, aceitetapish, sacha chuspi huachashca mishquitapish, mishquiman ashnaj cachun rupachingapajmi paicunapaj ñaupajpi churarcangui. Chashnami rurarcangui. Mandaj Jatun Diostajmi chashna nini.

²⁰Chashna rurashca jahuapish, ñucapajlla cachun can huachashca churicunatapish, ushushicunatapish paicunaman cushpami huañuchircangui. ¿Can huainayashca ima mana cashca yuyachijpichu,

²¹ima cunalla cashcata shina ñuca huahuacunatapish cungata p'itishpa huañuchishpa, chai rurashcalla dioscunaman cushpa ninapi tucuita rupachircangui imatagari?

²²Tucui laya millaita rurana, huainayana yuyaicunallahuan yallitaj junda cashpami, llullu huahuaraj cashpa churana illaj lluchulla cashcatapish, yahuarpi singuricushcatapish mana yuyarircangui.

²³Cai tucui millaita rurashca q'uipaca ¡aij, aij imachari tucungui! Mandaj Jatun Diostajmi cashna nini.

²⁴Canca lomacunapipish, tucui plazacunapipish altarcunatami rurarcangui.

²⁵Ñan callaricunapipish rurashcalla diospajmi lomacunapi altarcunata rurarcangui. Chaipimi can sumaj cashcataca mapayachircangui. Mashna chaita purijcunamanmi, cambaj aichata ricuchircangui. Chashnami ashtahuan ashtahuan huainayashpa catircangui.

²⁶Shinallataj cambaj c'uchullapi causaj Egipto runacunahuanpishmi huainayarcangui. Paicunaca charishca aichapish yallitaj racumi carca. Ñuca p'iñaringacamami, ashtahuan ashtahuan huainayashpa catircangui.

²⁷Chashna cashcamantami, cantaca ñuca maquihuan llaquichircani. Canmanca micunatapish ashallatami cusha. Canta p'iñaj filisteocunamanmi, paicuna munashca shina imatapish rurachun curcani. Paicunapish can millaita rurashcata ricushpaca, pingarircacunami.

²⁸Shinallataj huainayanata mana shaicushpami, asiriocunahuanpish huainayarcangui. Paicunahuan huainayashpapish, mana amircanguichu.

²⁹Shinallataj Canaán llajtapi causajcunahuanpish, caldeocunahuanpishmi ashtahuan huainayarcangui. Paicunahuan huainayashpapish, manataj shaicurcanguichu.

³⁰¡Millai shungu cashpami, cai tucui mana allicunataca rurarcangui! Huainayashpalla causaj mana pingaj huarmi shinami rurarcangui. Mandaj Jatun Diostajmi chashna nini.

³¹Canca ñan callaricunapipish, plazacunapipishmi altarcunata rurashpa, huainayashpalla causarcangui. Chashna cashpapish, manamari huainayashpalla causaj huarmicuna shina imallatapish japingaraicu huainayarcanguichu.

³²Ashtahuanpish cusayuj huarmi huainayaj shinamari cusapaj randica, shujtajcunataraj chasquingui.

³³Huainayashpalla causaj huarmicunamanca, achca allicunatami cuncuna. Ashtahuanpish canca canrajmi cambaj c'uyashcacunamanca, allicunata convidarcangui. Chashna cuj cajpimari, cambajmanca tucui llajtacunamanta shamushpa huainayarcacuna.

³⁴Canca huainayashpalla causaj shujtaj huarmicuna shinaca, mana carcanguichu. Canhuan huainayangapajca, cantaca pi mana mashcarcachu. Ashtahuanpish huainayashcamanta imata can chasquinapaj randica, paicunamanrajmi allicunata curcangui. Chashnami canca, pipish mana rurashcata rurarcangui.

³⁵Chashna cashcamanta huainayashpalla causaj huarmi, ñuca Mandaj Dios ima nishcata uyai.

³⁶Ñuca Mandaj Jatun Diostajmi cashna nini: Canca mana pinganachishpami, lluchulla tucushpa huainayarcangui. Canca lluchulla tucushpami cambaj c'uyashcacunahuanpish, can rurashca millanana dioscunahuanpish huainayashpa pandarircangui. Cambaj huahuacunapaj yahuartapish chai dioscunamanmi curcangui.

³⁷Chashna rurashcamantaca, cambaj c'uyashcacunatapish, canhuan cushicujcunatapish, can p'iñashcacunatapish tandachishpami, cambaj ñaupajpi churasha. Chai tandanacushcacunapaj ñaupajpimi, cambaj churanata llujshichishpa lluchullata saquisha. Chashna rurajpimi, tucuicuna can lluchulla cashcata ricungacuna.

³⁸Chashnami cantaca huainayaj huarmicunata, huañuchij huarmicunata imata ruranata mandashcapi nishca shina llaquichisha. Cantaca ñucapajlla causana cashcamantaca, jatunta p'iñarishpami huañuchisha.

³⁹Cantaca paicunapaj maquipimi churasha. Rurashcalla dioscunata adorana huasicunatapish, altarcunatapish urmachingacunami. Cambaj churanacunatapish, tucui laya sumaj aparinacunatapishmi quichushpa apangacuna. Cantaca churana illaj lluchullatami saquingacuna.

⁴⁰Canta llaquichij runacunataca, achcacunatami cachangacuna. Paicunami cantaca rumicunahuan shitashpa, espadacunahuanpish tujsishpa huañuchingacuna.

⁴¹Cambaj huasicunatapish ninahuanmi rupachingacuna. Achca huarmicuna ricucunpimi, cantaca llaquichingacuna. Chashna llaquichishpami, cantaca huainayashpalla causanamantapish cambaj c'uyashcacunaman allicunata cunatapish saquichisha.

⁴²Ñucapajlla cachun munashcamantaca, jatunta p'iñarishpa llaquichishpatajmi canhuanca alli tucusha. Ña mana ashtahuan p'iñarishachu.

⁴³Canca chairaj huambra cashpa ima shina causashcata mana yuyarishpami, cai tucui millaita rurashpa ñucataca p'iñachircangui. Riqui, chashna millaita rurashcamantami, ñucapish cantaca jatunta llaquichisha. Canca huainayana munailla puricushcataca, manamari yuyaringuichu” ninmi Mandaj Jatun Diosca.

⁴⁴“Riqui, yuyarina shimicunahuan tucui rimajcunami cantaca: Mama ima shina cajpica, ushushipish chai shinallatajmi ningacuna.

⁴⁵Canca cusatapish, huahuacunatapish shitashpa causaj huarmipaj ushushimari cangui. Canca cusacunatapish, huahuacunatapish shitashpa causaj huarmicunapaj ñañami cangui. Cancunapaj mamaca heteocunapurami, cancunapaj yayaca amorreocunapurami carca.

⁴⁶Cambaj punta ñañaca, Samariami. Paica paipaj ushushicunandijmi, cambaj janaj ladoman causacun. Cambaj q'uipa ñañaca Sodomami, paica paipaj ushushicunandij cambaj ura ladomanmi causacun.

⁴⁷Canca paicuna shinallatajmi millaita rurashpa causarcangui. Chashna rurashcapish, mana ima cajpi shinamari paicunatapish yalli millaita rurashpa causarcangui.

⁴⁸Ñuca causaj Mandaj Jatun Diostajmi cashna nini: Cambaj ñaña Sodomapish, paipaj ushushicunapish, manamari can shinapish cambaj ushushicuna shinapish yallitaj millaitaca rurarcacunachu.

⁴⁹Cambaj ñaña Sodomaca jatun tucushcami carca, micunatapish achcatami charirca, q'uillami carca. Chashna cashpami paipish, paipi causajcunapish, llaquihuan cajcunatapish, huajchacunatapish mana ayudarcacuna.

⁵⁰Paicunaca ñuca ñaupajpica, yallitaj millaita rurashpami, jatun tucurcacuna. Chashna mana allita rurashcamantami tucuita chingachircani.

⁵¹Samariaca can rurashca cai tucui juchacunamantaca, chaupillatapish mana rurarcacunachu. Ashtahuanpish canca paicunatapish yalli millaitami rurarcangui. Cambaj juchacunahuan ch'imbapurajpica, cambaj ñañacunapaj juchacunaca mana ima cashca shinami ricurirca.

⁵²Canca cambaj ñañacunatapish yalli juchata rurashcamantaca llaquichijpipish, chai llaquitaca apanami cangui. Cambaj juchacunahuan ch'imbapurajpica cambaj ñañacunapaj juchacunaca mana ima cashca shinami ricurin. Paicunaca manataj can shina yallitaj juchata rurarcacunachu. Canca chashna yallitaj juchata rurashcamantaca, pingachishpa muspachishcami cangui.

⁵³Sodoma pueblomanta, paipaj muyundij pueblocunamantapish, Samaria pueblomanta, paipaj muyundij pueblocunamantapish, cambaj pueblomanta prezu apashcacunatapish ñucami tigrachimusha.

⁵⁴Canca paicunata cushichij cashca cashpapish, cunanca millaita rurashcamantaca llaquita apanami cangui, pingarinami cangui.

⁵⁵Sodoma pueblotapish, Samaria pueblotapish, chaipi causajcunatapish ñaupa ima shina cashca shinallatatajmi rurasha. Canpish, canpi causajcunapish ñaupa ima shina cashca shinallamantajmi tigranguichij.

⁵⁶Can jatun tucushca cai punllacunaca cambaj ñaña Sodomataca, mana chanzata rurashpa asinachu canguichij.

⁵⁷Chaipica cambaj juchataca manaraj ricuchircanichu. Ashtahuanpish cunanca Siria llajtapi causajcunapish, filisteocunapish tucui layami p'iñancuna. Chaimanta cunanca chai llaquitaca apanami cangui.

⁵⁸Canca huainayana munailla, millaita rurana yuyailla causashcamantaca, llaquita apanallatajmi cangui” ninmi Mandaj Diosca.

⁵⁹Mandaj Diosca cashnapishmi nin: “Ñucaca ari ninacushcataca, mana can shina p'aquishachu.

⁶⁰Ashtahuanpish can solteraraj cajpi ari ninacushcataca yuyaricushallami. Canhuanca huiñaipajmi ari ninacurcanchij.

⁶¹Can ima shinalla causashcata yuyarishpaca, pingaringuimi. Mana canlla ari nishcamantachu cambaj ñaupa ñañacunatapish, q'uipa ñañacunatapish cambaj ushushicuna shina cachun canmanca cusha.

⁶²Ashtahuanpish ñuca canman ari nishcata pajtachingapajmi, paicunataca canman cusha. Chashna rurajpimi ñucataca, Mandaj Diostaj cashcataca yachangui.

⁶³Chaita yuyarishpaca, pingaringuimi. Can imalla rurashcacunata ñuca perdonajpica pingarishpami, cutinca mana imata rimangui” ninmi Mandaj Jatun Diosca.