Read Chimborazo Highland Quichua EZEQUIEL 18 Bible Online

EZEQUIEL 18 - Chimborazo Highland Quichua bible

EZEQUIEL 18

¹Mandaj Diosca ñucataca cashnami nirca:

²“Israel llajtapica cashnami yuyachij shimicunataca ninguichij: Yayacuna jayaj uvata micucujpimi, churicunapaj quirucunaca mana alli cai tucun nishcata uyashpaca, ¿imatataj yuyanguichij?

³Ñuca causaj Mandaj Jatun Diostajmi cashna nini: Israel llajtapica, cai shina yuyachij shimicunataca imapaj mana cutinca rimanachu canguichij.

⁴Tucuicunami ñucapaj. Yayapish, churipish ñucapajmari. Maijanpish juchallishpaca, chaillami huañunga.

⁵Cashcata ruraj runaca imatapish allitami ruran, cashcatami ruran.

⁶Lomacunapi tiyaj altar c'uchucunapica mana micunchu, israelcuna rurashca dioscunata mana adoranchu, shujtajpaj huarmitapish mana japirinchu, quilla ungüihuan caj huarmipipish mana chayarinchu.

⁷Pitapish mana llaquichinchu, divijta prendashcatapish cutichinmi. Mana shuhuanchu, yaricaihuan cajcunamanpish carajmi, churana illajllacunamanpish churachijmi.

⁸Cullquita mañachishpapish huahua cullquita mana cobranchu, cullquita alquilachishpapish huahua cullquitaca mana japinchu. Millaita ruranamantapish anchurijmi, runacuna p'iñanacucujpipish ch'imbapurashpa allichijmi.

⁹Ñuca mandashcacunapi nishca shina causaj, ñuca quillcachishcacunapi nishca shina allita rurashpa causajmi. Chaimi cashcata ruraj runa. Paillami causaitaca charinga. Mandaj Jatun Diostajmi chashna nini.

¹⁰Ashtahuanpish paipaj churica shuhua cangachari, huañuchij cangachari, ima millaitapish ruraj cangachari.

¹¹Lomacunapi tiyaj altar c'uchucunapi micungachari, shujtajpaj huarmita japiringachari,

¹²huajchacunata, imata mana charijcunatapish llaquichij cangachari, shuhua cangachari, prendashcatapish mana cutichij cangachari, rurashcalla dioscunatapish adoraj cangachari, ima millananatapish ruraj cangachari.

¹³Cullquita mañachishpapish huahua cullquita cobraj cangachari, alquilachishpapish huahua cullquita yallitaj cobraj cangachari. Chai runaca ¿causaitaca charingachu imashi? ¡Mana, paica maitataj causangari! Cai tucui millaita rurashcamantaca huañungatajmi, paipaj yahuarca paipaj jahuallatajmi canga.

¹⁴Chashna mana allita ruraj runa cashpapish churiyuj tucujpi, chai churica paipaj yaya rurashca juchacunata ricucushpapish, chai tucui millaitaca mana rurangachari.

¹⁵Lomacunapi tiyaj altar c'uchucunapipish mana micungachari, israelcuna rurashca dioscunatapish mana adorangachari, shujtajpaj huarmitapish mana japiringachari.

¹⁶Pitapish mana llaquichingachari, imata mañachishpapish prendata mana japingachari, mana shuhuaj cangachari, yaricaihuan cajcunaman pai micucushcata caraj cangachari, lluchulla cajcunaman churanata churachij cangachari.

¹⁷Huajchata mana llaquichij, cullquita mañachishpapish, mana huahua cullquita japingachari. Alquilachishpapish huahua cullquita mana cobrangachari, ñuca quillcachishcacunata huaquichij, ñuca mandashcacunapi nishca shina causaj runa cangachari. Chashna cashpaca paipaj yayapaj juchacunamantaca mana huañungachu, ashtahuanpish causangatajmi.

¹⁸Paipaj yayaca, millaita ruraj cashcamanta, shujtaj ima charishcata quichuj cashcamanta, imapish mana allita shujtajcuna ricucunpi ruraj cashcamantaca, paillatajmi paipaj juchamantaca huañunga.

¹⁹Cancunaca: ¿Imamantashi yayapaj juchamantaca churica llaquita mana apan? ninguichijchari. Paipaj churica imatapish allita, imatapish cashcallatami rurarca. Ñuca quillcachishcacunatapish tucuita cazushpamari, alli pajtachirca. Chashna rurashcamantaca causangatajmari.

²⁰Juchata rurajcunallami huañunga, churica paipaj yayapaj juchamantaca mana llaquita apangachu. Shinallataj yayapish, paipaj churipaj juchamantaca mana llaquita apangachu. Cashcata ruraj runaca allitami japinga. Ñucata mana manchaj runaca, llaquitami japinga.

²¹Ashtahuanpish ñucata mana manchaj runa cashca cashpapish, cai tucui millaita ruracushcamanta saquirishpa, ñuca quillcachishcacunata cazushpa, ñuca nishca shina allita rurashpa, cashcata rurashpaca causangatajmi, mana huañungachu.

²²Paipaj tucui millai rurashcacunataca mana yuyarishachu. Ashtahuanpish pai allita rurashcamantaca causangami.

²³Ñucaca ñucata mana manchaj runa huañuchunca, mana munanichu. Mandaj Jatun Diostajmi chashna nini. Paica millaita ruranata saquishpaca ¿maitataj mana causangari?

²⁴Ashtahuanpish cashcata ruraj runaca, cashcata ruranata saquishpa Diosta mana manchaj runa shinallataj millaita rurashpaca, ¿paica causangachu imashi? Pai allita ruraj cashca cajpica, imata mana ricushachu. Ashtahuanpish pai ñucata mana cazushpa millaita rurashcamantaca huañungatajmi.

²⁵Ashtahuanpish cancunaca: Mandaj Diosca ima allita mana ruranchu ninguichijmi. Israelcuna, caita alli uyaichij. ¿Ñucachu mana allita rurani imatagari? Cancuna rurashca mana alli cashcataca ¿manachu yachanguichij?

²⁶Shina cajpica cashcata ruraj runaca, cashcata ruranata saquishpa millaita rurashcamantaca, paimi huañunga. Paillataj mana alli rurashcamantami huañunga.

²⁷Shinallataj ñucata mana manchaj runa cashpapish, ñucata mana manchashpa juchata ruracushcata saquishpa cashcata rurashpaca causangami.

²⁸Tucui millaita ruracushcata saquishpaca causangatajmi, mana huañungachu.

²⁹Israelcunalla, cancunaca Mandaj Diosca mana allitami ruran ninguichijmi. ¿Maitataj ñucaca mana allitaca rurashari? Ashtahuanpish cancunamari mana allita ruranguichij.

³⁰Shina cajpica israelcunalla, cancuna imalla rurashcacunataca ñucami tucuita ricuchisha” ninmi. Mandaj Jatun Diostajmi chashna nin: “Chaimanta cancuna tucui millaita ruranata saquishpa cutirichij. Chashna cutirijpica, cancunapaj juchaca mana llaquipi churai tucungachu.

³¹Millaita rurashpa juchayuj tucushcataca cancunamanta anchuchichij. Chashna rurashpaca shungutapish, yuyaitapish mushujyachichij. Israelcuna, ¿maitataj yangamantaca huañunguichigari?” ninmi.

³²Mandaj Jatun Diostajmi cashna nin: Huañugricujcunataca mana huañuchun munanichu. Shina cajpica millaita ruranamanta saquirichij, causanguichijmi.