Read Chimborazo Highland Quichua EZEQUIEL 19 Bible Online

EZEQUIEL 19 - Chimborazo Highland Quichua bible

EZEQUIEL 19

¹Ezequiel, canca jatarishpa Israel llajtata mandajcunamanta yupashpa yupashpa huacangui.

²Cashna huacangui: Cambaj mama leonca leoncunapaj chaupipimi causarca, huahua leoncunatapish, malta leoncunahuanmi huiñachirca.

³Paipaj huahua leoncunamanta shujtami jatunyangacama huiñachirca. Paitaca aichata japinatapish, runacunata huañuchishpa micunatapishmi yachachirca.

⁴Shinallataj llajtacunapi causajcunami, pai ima shina cashcata yachaj chayashpaca, paicunapaj linchipi urmachircacuna. Egipto llajtamanmi paitaca cadenacunahuan aisashpa pusharcacuna.

⁵Paipaj mamaca, uni huatacunata chingarijpi shuyacushpallami, paipaj shujtaj huahuata japishpa p'iña malta león tucuchun chaipi churarca.

⁶Paica jatun leoncunapaj chaupipi purishpami, p'iña malta león tucurca. Aichatapish japinata yachashpami, runacunatapish huañuchirca.

⁷Pueblo muyundij jatun patacunatapish urmachircami. Pueblocunatapish chushajtami saquirca. Chaimantami llajtapish llaquinayaj saquirirca. Imalla tiyajcunapish ña mana tiyarcachu. Pai huacarishcapish c'ulun nishca shinami uyarirca.

⁸Llajtacunapi causajcuna llaquichingapaj jatarishpami, paitaca linchihuan japircacuna. Chaimantaca jutcupimi prezu churarcacuna.

⁹Shinallataj cadenacunahuan huatashpa jaulapi churashpami, Babilonia llajtata jatun mandajpajman aparcacuna. Israel llajtapi tiyaj urcucunapi pai huacarishca ama ashtahuan uyarichun nishpami, prezu churarcacuna.

¹⁰Cambaj mamaca, yacu c'uchupi tarpushca uva yura shinami uva chagrapica ricurirca. Paica achca yacu c'uchupi tarpushca cashpami, alli granota p'ucurca, alli ramacunatapishmi charirca.

¹¹Paica jatun mandajcuna mandana sinchi varacunatami charirca. Chai yura ñahuica ramacunatapish yalli sunitami huiñarca. Paica yallitaj suni cashcamanta, achca ramacunayuj cashcamanta ricunallami carca.

¹²Shina cajpipish p'iñarishpami, p'itishpa pambaman shitashca carca. Rupaj huairami paipaj granocunatapish chaquichirca. Paipaj sinchi ramacunapish p'aquishcamantami chaquirirca. Ninami tucuita rupachishpa tucuchirca.

¹³Cunanca chai yuraca shitashca pambapi, yacupish illajlla chaquishca allpapimi tarpushca tiyacun.

¹⁴Shinallataj chai yura ñahuillamantatajmi nina llujshishpa, paipi tiyaj tucui ramacunatapish, granocunatapish rupachirca. Chai yurapica jatun mandaj mandana, sinchi varapish ña mana tiyarcachu nishpa huacangui nircami. Cai shimicunaca yupashpa yupashpa huacashcami. Chashnallataj yupashpa yupashpa huacanapajmi canga.