Read Chimborazo Highland Quichua EZEQUIEL 2 Bible Online

EZEQUIEL 2 - Chimborazo Highland Quichua bible

EZEQUIEL 2

¹Cashnami nirca: “Huañujlla aichayuj runalla, jatarishpa shayari, canhuanmi parlasha nini” nircami.

²Chashna nishca q'uipami, Diospaj Espirituca ñucapi yaicushpa jatarichirca. Chaimantaca ñucaman parlajtami uyarcani.

³Paica ñucataca cashnami nirca: “Huañujlla aichayuj runalla, cantaca ñucami israelcunapajman cachani. Paicunaca mana cazujcuna cashpami, ñucataca c'ariyarcacuna. Cunan punllacamami paicunapaj yayacuna shinallataj mana cazushpa causancuna.

⁴Ñucami cantaca p'iña ñahuicunapajman, rumi shungucunapajman cachani. Paicunamanca: Mandaj Jatun Diosca cashnami nin nishpa huillangui.

⁵Paicuna uyachun, mana uyachunpish huillanguilla. Paicunaca mana cazujcunami. Chashna cashpapish can huillajpimi, paicunapurapica shuj huillaj tiyashcataca yachangacuna.

⁶Huañujlla aichayuj runalla, canca paicunataca ama manchangui, paicuna rimajpipish ama mancharingui. Zarza casha yuracuna chaupipi cashpapish, casha chaupipi cashpapish, escorpioncunapaj chaupipi causashpapish ama manchanguichu. Paicuna rimajpipish, paicunata ricushpapish ama mancharingui. Paicunaca mana cazujcunami.

⁷Paicuna uyachun, mana uyachunpish ñuca shimicunataca huillanguilla. Paicunaca yallitaj mana cazujcunami.

⁸Huañujlla aichayuj runalla, canca ashtahuanpish ñuca ima nishcata uyai, canpish ama chai mana cazujcuna shina caichu. Ñuca ima carashcataca, shimita pascashpa micuilla” nircami.

⁹Chashna nishpaca, ñucaman maquita chutacujtami ricurcani. Chai maquipica quillcashpa pilluchishca carata charicujtami ricurcani.

¹⁰Chai cara pilluchishcataca, ñuca ñaupajpimi pascarca. Chaipica ñaupajmanpish huashamanpish quillcashcami carca. Chaipica llaquihuan cashpa cantana cantocunapish, yupashpa yupashpa huacana shimicunapish, nanaihuan aij nishca shimicunapishmi quillcashca carca.