Read Chimborazo Highland Quichua EZEQUIEL 21 Bible Online

EZEQUIEL 21 - Chimborazo Highland Quichua bible

EZEQUIEL 21

¹Mandaj Diosca ñucataca cashnami nirca:

²“Huañujlla aichayuj runalla, cambaj ñahuita Jerusalenman churashpa, rurashcalla dioscunapaj huasicuna imalla tucuna cashcatapish, Israel llajtata llaquichina cashcatapish huillai:

³Israel llajtamanca cashna ningui: Mandaj Jatun Diosca cashnami nin: Riqui, ñucaca canhuanca p'iñami cani. Ñuca espadata huaquichinamanta llujshichishpaca cashcata rurajtapish, ñucata mana manchajtapish huañuchishami.

⁴Chaimanta caipi causajcunataca cashcata ruraj cajpipish, ñucata mana manchaj cajpipish huañuchishatajmi. Ura ladomanta janaj ladocama tucuicunata huañuchingapajmi, ñuca espadataca huaquichinamanta llujshichisha.

⁵Chai espadata huaquichinamanta ñucallataj llujshichishcataca, tucuicunami yachangacuna. Chai espadataca, manataj cutinca huaquichishachu ninmi ningui.

⁶Huañujlla aichayuj runalla, paicuna ricucujpi tucui aicha nanarishpa manchanayajta huacangui.

⁷Can chashna huacacujpica ¿ima nishpataj huacacungui? nishpa tapujpica: Tucuicunami huañunga, tucuicunapaj maquicunami p'aquiringa, tucuicunami huacanga, tucuicunapaj cunguri mucucunami yacu shina chujchunga nishpa huillashcata uyashpamari huacacuni. Chai llaquica ñallamari chayamunga, chaica pajtangatajmi ninmari Mandaj Jatun Diosca ningui” nircami.

⁸Mandaj Diosca ñucataca cashnapishmi nirca:

⁹“Huañujlla aichayuj runalla, cashna huillai: Mandaj Jatun Diosca cashnami nin: Espadaca, espadaca ñamari filosapa tiyacun. Achijllata rurashcapishmari tiyacun.

¹⁰Runacunapaj cungata p'itingapajmari filosapata rurashca tiyacun, p'ichashpa achij nicujta rurashcamari tiyacun. Chaita ricushpaca ¿maitataj cushicushunri? Ñuca churipaj mandana varataca yanga caspita shinamari p'iñancuna.

¹¹Chai espadataca maquipi charingapajmi, achijllata rurajman curca. Chaimantami chai espadataca filosapata rurashca tiyacun. Ñami huañuchijpaj maquipi churanalla tiyacun.

¹²Huañujlla aichayuj runalla, canca caparirishpa huacayari. Chai espadataca ñuca agllashcacunata huañuchingapajmari, ña allichishca tiyacun. Chai espadallatajmi Israel llajtata mandajcunatapish huañuchinga. Chai mandajcunapish ñuca agllashcacunandijmi, tandalla espadapi urmangacuna. Chaimanta cambaj mama changata chugrichiyari,

¹³ñamari allichishca tiyacun. Chai espadaca mandana varata p'iñashcamantami chingachinga. Mandaj Jatun Diostajmi chashna nini.

¹⁴Huañujlla aichayuj runalla, huañuchij espadallatajmi p'iñarishpa ishqui cutinpish quimsa cutinpish llaquichinga nishpa huillashpa maquicunapi huajtariyari. Chai espadami achcacunata tujsishpa huañuchinga.

¹⁵Chaita ricushpaca mancharinguichijmi, ashtahuan achcacunami huañungacuna. Chai manchachij espadataca, tucuicunapaj pungucunapimi churarcani. ¡Aij, huañuchingapajca ñamari achijllata rurashca tiyacun! Cungata p'itingapajmari ña allichishca tiyacun.

¹⁶Ishquindij ladoman filosapamari, chaimanta maijan ladohuanpish p'itinllamari.

¹⁷Ñucapish maquicunapi huajtarishami. Chashnami ñuca p'iñarishcamantaca samarisha. Mandaj Dios ñucatajmi chashna nini” nircami.

¹⁸Mandaj Diosca ñucataca cashnapishmi nirca:

¹⁹“Huañujlla aichayuj runalla, Babilonia llajtata jatun mandajpaj espada shamunapajca, ishqui ñanta rurashpa ricuchi. Chai Babilonia llajtallamantataj ishquindij ñanta llujshichingui. Shinallataj chai ñan callaricunapica, maijan puebloman rina cashcata ricuchij señaltapish churangui.

²⁰Shinallataj Amonpaj huahua huahuacuna causacun Rabá pueblomanpish, Judá llajtapi tiyaj muyundijta pircashcata Jerusalén pueblomanpish chai espada maijan ñanta rina cashcata ricuchingui.

²¹Babilonia llajtata jatun mandajca, ishqui ñancuna chaupipimi mana maita ri tucushpa shayacunlla. Paica maita rinata mana yachashcamantami, puntajlla caspicunahuan suerteta rurashpa, rurashcalla dioscunata tapushpa, yana shungupi ricushpa shayacun.

²²Pai adivinacushcaca paipaj alli lado maquimanmari llujshirca. Chaica Jerusalén pueblohuan macanacunata, huañuchinacuita callarichinata, macanacuipaj caparirishpa mandanata, pungucunata urmachina jatun caspicunata churanatami ricuchirca. Shinallataj pata huashapi allpata montonanata, muyundijta torrecunata shayachinata ricuchijpishmi carca.

²³Ashtahuanpish cai ricuchishcaca, paicunapajca llullashpa huillashca shinallami ricurin. Shina cajpipish paica paicuna millaita rurashcataca yuyaipi charicushpami, prezu japinaman shamunga” nircami.

²⁴Chaimanta Mandaj Jatun Diosca cashnami nin: “Cancuna millaita rurashcatapish yuyaipimi charicuni. Ñucata cungarishpa cai tucui juchata rurashcapish ricunallami. Cancunallataj chashna millaita rurashcamantami, prezu japinaman shamunga.

²⁵Israel llajtata mandajlla, canca ñucata mana manchaj millai runami cangui. Can millaita rurashcamanta, yallitaj llaquichishpa tucuchina punllaca ñamari pajtamushca” ninmi.

²⁶Mandaj Jatun Diosca cashnami nin: “Turbantetapish, coronatapish surcui, ña mana ashtahuan jatun tucunguichu. Ashtahuanpish jatun tucushcacunataca pingachishami, pingailla causajcunataca jatuntami rurasha.

²⁷Chashna cashcamanta cancunapajca, jahuanpi jahuanpimi tucuchij llaquicunata cachasha. Mandanata japinapaj shamuna tiyacuj shamungacamallami chashna llaquicunaca tiyanga. Tucuitami paipaj maquipi churasha.

²⁸Huañujlla aichayuj runalla, amonitacuna imalla tucunata ñuca Mandaj Jatun Dios nishca shina cashna nishpa huillai: Cungata p'itishpa tucuchingapajmari, espadaca huaquichinamanta llujshichishca achij nicuj tiyacun.

²⁹Cancuna ima tucunataca, yangamanta llullashpa adivinashpallami huillancuna. Chai espadaca, huañunapi churashca yallitaj millai runacunatami huañuchinga. Millaita rurajcunata tucuchina punllaca ñami chayamushca.

³⁰Chai espadataca huaquichinapica, manataj cutin huaquichishachu. Cancuna maipi huiñashcapi, maipi causashca llajtallapitajmi imalla rurashcataca ricusha.

³¹Shinallataj ñuca p'iñarishcataca, cancunapimi churasha. Nina lunyacuj shina ñuca p'iñarishcataca, canpimi shitasha. Cancunataca yallitaj llaquichij, millai runacunamanmi chingachichun cusha.

³²Cancunaca rupana ujsha shinallami canguichij. Cancunapaj llajtaca yahuarhuanmi junda canga. Cunanmanta imata yuyarinallapish mana tiyangachu ninmi ningui. Mandaj Dios ñucatajmi chashna nini” nircami.