Read Chimborazo Highland Quichua EZEQUIEL 22 Bible Online

EZEQUIEL 22 - Chimborazo Highland Quichua bible

EZEQUIEL 22

¹Mandaj Diosca ñucataca cashnami nirca:

²“Huañujlla aichayuj runalla, yahuarta jichachij runacuna causana pueblopi causajcuna imalla rurashcataca, canmi ricuna cangui. Shinallataj paicuna tucui imalla millananacunata rurashcatapish canmi ricuchina cangui.

³Paicunamanca cashna ningui: Mandaj Jatun Diosca cashnami nin: Yahuarta jichachij runacuna causana pueblopi causajcunaca llaquichishca cangapajmi, dioscunata rurashpa mapayancuna. ¡Cancunata llaquichina punllaca, ñamari pajtamushca!

⁴Cancunaca huañuchishcamantami, juchayuj tucushcanguichij. Cancuna rurashca dioscunahuanmi mapayarcanguichij. Chashna rurashpami, cancunapaj punllataca quichquiyachishcanguichij. Chaimantami cancuna tucurina huata chayamushca. Cancunataca pingachishca cachunmi shujtaj llajtacunaman curcani, shujtaj llajtapi causajcunami chanzata rurashpa asingacuna.

⁵Cantaca mapayashcata ricushpa llaquinayaj tucushcata ricushpami c'uchullapi causajcunapish, carupi causajcunapish asingacuna.

⁶Riquichigari Israel llajtata mandajcunaca, paicuna mandaj cashcallamantami huañuchichincuna.

⁷Paicunaca yayatapish, mamatapish p'iñarcacunami. Caru llajtamanta shamujcunatapish llaquichircacunami. Yaya mama illajtapish, viudatapish imalla charishcatapish quichurcacunami.

⁸Ñucapajlla altarcunatapish millarcacunami. Ñuca samana punllacunatapish, yangatami rurarcacuna.

⁹Chashna yangamanta juchachishpa huañuchijcunapish, lomacunapi tiyaj altar c'uchucunapi micujcunapish, yallitaj millaita rurajcunapishmi carcacuna.

¹⁰Quiquin yayapaj huarmihuanmi huainayarcacuna, quilla ungüihuan ungushca huarmihuanmi chayarircacuna.

¹¹Tucuicunallatajmi shujtajpaj huarmihuan, millanana juchata rurarcacuna, quiquin nuerahuanpish millai munaita rurashpa mapayachircacunami. Shinallataj yayamanta lapanitapish japirircallami.

¹²Huañuchingapajpish achca cullquitami chasquircacuna. Cullquita mañachishpapish, huahua cullqui jahuami curcacuna. Huahua cullquitapish yallitajmi cobrarcacuna. Shujtajcunatapish shuhuashpami yallitaj llaquichircacuna, ñucatapish cungarircacunami. Mandaj Jatun Diostajmi chashna nini.

¹³Riquichij, cancunallatajmi yallitaj shuhuashpa causarcanguichij. Cancunapurallatataj huañuchishpami, yahuarta jicharcanguichij. Chaimantami cancunataca llaquichigrini.

¹⁴Cancunapaj shunguca ¿manachu manchan imamí? ¿Ñuca llaquichicui punllapica, cancunapaj maquicunaca fuerzasapachu canga? Mandaj Dios ñucatajmi chashna rimani, chaitaca pajtachishatajmi.

¹⁵Cancunataca shujtaj llajtacunaman caita chaitami cachasha. Shinallataj cancunamantaca millaita rurashcacunatapish tucuitami chingachisha.

¹⁶Cancunallataj millaita rurashcamantami, shujtaj llajtacunapi causajcunapajca p'iñashca causana canguichij. Chashna rurajpimi ñucataca, Mandaj Diostaj cashcataca yachanguichij” nircami.

¹⁷Mandaj Diosca ñucataca cashnapishmi nirca:

¹⁸“Huañujlla aichayuj runalla, israelcunaca ñucapajca cullquimanta llujshishca mapacuna shinami tucushcacuna. Cullquita hornopi churashpa yacuyachicujpi llujshishca bronce shina, estaño shina, fierro shina, plomo shinami tucuicuna tucushcacuna.

¹⁹Chashna cajpimi, Mandaj Jatun Diostaj cashna nini: Tucuicuna yangacuna tucushca cajpipish, cancunataca Jerusalenpimi tandachisha.

²⁰Ima shinami cullquitapish, broncetapish, fierrotapish, plomotapish, estañotapish tandachishpa hornopi ninata japichishpa yacuyachin, chai shinallatajmi cancunatapish chai pueblollapitaj tucuicunata tandachishpa yacuyachisha.

²¹Cancunata tandachishpami, lunyacuj ñuca ninataca cancunapaj jahuapi p'iñarishpa japichisha. Chai ninapimi, tucuicuna yacuyanguichij.

²²Ima shinami hornopi cullquita yacuyachin, chashnallatajmi cancunapish Jerusalén pueblopica yacuyanguichij. Chashna rurajpimi Mandaj Dios ñuca, jatunta p'iñarishpa cancunaman llaquita cachashcataca yachanguichij” nircami.

²³Mandaj Diosca ñucataca cashnapishmi nirca:

²⁴“Huañujlla aichayuj runalla, israelcuna causana llajtataca cashna ni: ¿Canca mana mapa illaj llajtachu cangui? Ñuca p'iñarishpa llaquichicui punllapica, tamyapish mana tiyangachu.

²⁵Ñuca ima nishcata huillajcunapish shuj yuyailla tucushpami, p'iña león aichata japij shina runacunataca huañuchircacuna. Haciendacunatapish, imalla charishcacunatapishmi quichurcacuna. Cai llajtapica, achcacunami viuda saquirircacuna.

²⁶Curacunapish ñuca mandashcacunata p'aquircacunami, ñucapajlla altarcunatapish mapayachircacunami. Imalla ñucapajlla ch'icanchishca cashcatapish, imalla mana ñucapaj ch'icanchishca cashcatapish, imalla mapa cashcatapish, imalla mana mapa cashcatapish manamari ch'icanpi charircacunachu. Ñuca samana punllacunatapish mana yuyarircacunachu. Chaimantami ñucataca yangapi charircacuna.

²⁷Paicunata mandajcunaca shuhuashpalla imatapish japingapajmi, aichata mashcashpa purij atujcuna shina runacunata chaparashpa huañuchishpa chingachircacuna.

²⁸Shinallataj paicunapaj huillajcunapish lodohuan patata tapachij shinami: Mandaj Jatun Diosmi chashna nin nishpa yangamanta llullashpa huillarcacuna. Mandaj Dios ñucaca manapish paicunamanca imata nircanichu.

²⁹Cai pueblopi causajcunaca llaquichina yuyaihuan, shuhuana yuyaihuan, llullana yuyaillahuanmi causarcacuna. Llaquita apacujtapish, imata mana charijtapish llaquichijcunami carcacuna. Shujtaj llajtamanta shamujtapish yangamantami llaquichircacuna.

³⁰Cai llajtata ama llaquichichun nishpa ñuca ñaupajpi jarcashpa pata tunirishcapi shayarichunmi, israelcunapuramanta shuj runata mashcarcani. Chaita ruraj runataca manamari japircanichu.

³¹Chaimanta ñuca p'iñarishcataca, paicunapaj jahuapimi tallircani. Jatunta ñuca p'iñarishpami, paicunataca tucuchircani. Paicunapaj mapa causaimantaca, paicunallatatajmi llaquichircani” ninmi Mandaj Jatun Diosca.