Read Chimborazo Highland Quichua EZEQUIEL 29 Bible Online

EZEQUIEL 29 - Chimborazo Highland Quichua bible

EZEQUIEL 29

¹Chunga huata chunga quillapaj ishqui chunga punllapimi, Mandaj Diosca ñucataca cashna nirca:

²“Huañujlla aichayuj runalla, cambaj ñahuita Egipto llajtata mandaj faraonpajman churashpa, paitapish, tucui Egipto llajtatapish llaquichina cashcata huillai.

³Cashna ningui: Mandaj Jatun Diosca cashnami nin: Egipto llajtata jatun mandaj faraonlla, ñucaca canhuanca p'iñami cani. Cambaj llajtapi tiyaj jatun yacucunapi causaj jatun dragón shinami: Nilo yacuca ñucapajmi, ñucami rurarcani nircangui.

⁴Chashna nishcamantaca, ñucami cambaj shimipica fierro ipicunata churachisha, cambaj jatun yacucunapi tiyaj chalhuacunataca, cambaj escamapimi llutachisha. Jatun yacucuna chaupimanta canta chashna llujshichijpica, tucui chalhuacunaca cambaj escamapimi llutarishpa llujshingacuna.

⁵Chaimanta llujshichishpaca cantapish, cambaj jatun yacucunapi tiyaj tucui chalhuacunatapish shitashca pambapimi saquisha. Tucuicuna ricunalla allpa jahuapimi urmangui. Pipish mana japingachu, pipish mana tandachingachu. Cantaca cai pachapi tiyaj p'iña animalcunaman, pajarocunamanmi micuchun curcani.

⁶Chashna rurajta ricushpami, Egipto llajtapi causajcunaca tucuicunallataj ñucataca, Mandaj Diostaj cashcataca yachangacuna. Paicunaca israelcunapajca tauna shina cashpapish, chijtarishca caspi shinami tucurca.

⁷Canca maquihuan japirijllapimi, p'aquirishpa rigrata chugrichircangui. Taunarijllapimi p'aquirishpa, huashata p'aquircangui ningui” nircami.

⁸Chashna cashcamantami, Mandaj Jatun Diosca cantaca cashna nin: “Riqui, canta llaquichingapajmi espadata apamuni. Chaihuanmi cai llajtamantaca runacunatapish animalcunatapish chingachisha.

⁹Egipto llajtaca llaquinayaj, shitashcami saquiringa. Chashna rurajpimi ñucataca, Mandaj Diostaj cashcataca yachangacuna. Canca: Nilo yacuca ñucapajmi, ñucamari rurarcani nircanguimi. Chaimantami chashna llaquichisha.

¹⁰Canhuanpish, canpi tiyaj jatun yacucunahuanpish p'iñarinimi. Egipto llajtataca, Migdol pueblomanta callarishpa Sevene pueblocama, Etiopía llajta lindecamapishmi llaquinayaj shitashcata saquisha.

¹¹Chai llajtataca runacunapish, animalcunapish mana puringacunachu. Chuscu chunga huatacamami chaipica pipish mana causanga.

¹²Egipto llajtataca shujtaj llajtacunata llaquichishca shinallatajmi llaquichisha. Chaipi tiyaj pueblocunatapish, shujtaj pueblocunata chingachishca shinallatajmi chingachisha. Chuscu chunga huatacamami shitashca saquiringa. Egipto llajtapi causajcunataca shujtaj llajtacunaman, shujtaj pueblocunamanmi caita chaita cachasha” ninmi.

¹³Mandaj Jatun Diosca cashnapishmi nin: “Chuscu chunga huatacuna tucurijpimi, shujtaj llajtacunapi causacuj Egipto llajta runacunataca tandachisha.

¹⁴Paicunataca Egipto llajtaman prezu apashcamanta tigrachimushpaca, paicuna huacharishca Patros llajtallamantajmi pushasha. Chai llajtapimi tucuicuna p'iñashca causangacuna.

¹⁵Chai llajtaca shujtaj llajtacunahuan ch'imbapurajpica, uchilla yanga llajtami canga. Manataj cutin umata alzashpa, shujtaj llajtacunata mandai tucungachu. Ashtahuanpish shujtaj llajtacunata ama cutin mandai tucuchunmi paicunataca ashallata saquisha.

¹⁶Chaimantami israelcunaca ña mana ashtahuan paicunapica shunguta churangacuna. Paicunata catishpa cutin millaita ruranataca, ña mana yuyaringacunachu. Chaimantami ñucataca, Mandaj Jatun Diostaj cashcataca yachangacuna” nircami.

¹⁷Ishqui chunga sujta huata punta quilla callari punllami, Mandaj Diosca ñucataca cashna nirca:

¹⁸“Huañujlla aichayuj runalla, Babilonia llajtata jatun mandaj Nabucodonosorca, Tiro pueblota mishangapajmi paipaj soldadocunataca sinchita macanacuchirca. Ashtahuanpish chai soldadocunarajmi ajchacunapish, huashacunapish pelarircacuna. Tiro pueblota llaquichishcamantaca paipajpish, paipaj soldadocunapajpish mana imata japircachu.

¹⁹Chaimanta Babilonia llajtata jatun mandaj Nabucodonosormanca, ñucami Egipto llajtataca cuni. Paimi chai llajtapi imalla tiyajcunatapish, imallata quichushcacunatapish tandachishpa japinga. Chai tucuita japishpami, paipaj soldadocunamanca paganga. Mandaj Jatun Diostajmi chashna nini.

²⁰Jatun mandaj Nabucodonosormanca, soldadocunahuan Tiro pueblota llaquichichishcamantami, Egipto llajtataca cuni. Paicunaca ñucatami servircacuna. Mandaj Jatun Diostajmi chashna nini.

²¹Chai punllamantami israelcunamanca, mandanataca cutin callarichisha. Ezequiel, canmi paicunamanca imatapish huillangui. Chaita ricushpami ñucataca, Mandaj Diostaj cashcata yachangacuna” nircami.