Read Chimborazo Highland Quichua EZEQUIEL 3 Bible Online

EZEQUIEL 3 - Chimborazo Highland Quichua bible

EZEQUIEL 3

¹Chaimantaca ñucataca cashnami nirca: “Huañujlla aichayuj runalla, jaica cai quillcashca carata micui. Chaimantaca israelcunata rimagri” nircami.

²Shina nijpimi ñuca shimita pascajpi, chai pilluchishca carataca amullichirca.

³Chaimantaca ñucataca cashnami nirca: “Huañujlla aichayuj runalla, canman carashca cai quillcashca carata micushpa cambaj huijsapipish, chunllullicunapipish jundachi” nijpimi micurcani. Chaica ñuca shimipica sacha chuspi huachashca mishqui shina mishquijllami carca.

⁴Chai q'uipaca, cashnapishmi nirca: “Huañujlla aichayuj runalla, ri israelcunaman ñuca imalla nishcata huillagri.

⁵Mana cantaca mana entendipaj rimaita rimajcunapajmanchu cachani, mana shujtaj rimaita rimajcunapajmanchu cachani. Ashtahuanpish israelcunapajmanmi cachani.

⁶Paicuna can rimashcata mana entendichunca, mana ch'ican ch'ican rimaita rimajcunapajmanchu cachani. Chai mana entendipaj rimaita rimajcunapajman cachajpirajchari, can rimashcataca uyanmancuna.

⁷Ashtahuanpish israelcunaca can huillashcataca, manataj uyasha ningacunachu. Paicunaca ñucataca mana uyasha nincunachu. Tucui israelcunami rumi umacuna, ch'ahuan shungucuna.

⁸Riqui, ñucami cantaca paicunata p'iñarishpa rimachun p'iña ñahuita rurarcani. Paicunapaj umata llaquichichunmi, cambaj umataca sinchiyachircani.

⁹Cambaj umataca, sinchi rumitapish yalli sinchi diamanteta shinami rurarcani. Paicunataca ama manchanguichu. Paicunapaj ñaupajpi cashpapish, ama mancharinguichu. Paicunaca mana cazujcunami” nircami.

¹⁰Chashna nishca q'uipami, cashna nirca: “Huañujlla aichayuj runa, ñuca imalla nishca shimicunataca, cambaj shungupi huaquichingui. Cambaj rinrinhuantaj alli uyangui.

¹¹Chaimantaca prezu apamushca cambaj llajtapuramanpish uyachun, mana uyachunpish: Mandaj Jatun Diosca cashnami nin nishpa huillangui” nircami.

¹²Chaimantaca Diospaj Espiritumi ñucata jatarichirca. Ñapish huashamantaca sinchita caparishpa cashna nishcami uyarirca: “Mandaj Dios sumaj cashcataca, pai causacunmantataj alli nishca cachun” nishpa rimashcami uyarirca.

¹³Shinallataj chai causajcunapaj alascuna caishuj chaishuj tupanacucujtapishmi uyarcani. Paicunapaj ñaupajpi caj ruedacunatapish sinchita c'ulun nishcatapishmi uyarcani.

¹⁴Diospaj Espiritumi ñucataca japishpa jatarichirca. Chaimantaca ñucaca huacashpami rircani. Ñucaca achcatami p'iñarircani. Chashna cajpipish Mandaj Diosca, paipaj maquihuanmi ñucataca sinchita charirashpa pusharca.

¹⁵Chaimantaca Quebar jatun yacu c'uchupi caj Tel-abib pueblopi causacuj prezucunapajmanmi chayarcani. Paicuna tiyacunllapitajmi, ñucapish tiyarircani. Chaipica canchis punllacamami, imata mana rimai tucushpa musparishca shina carcani.

¹⁶Ña canchis punlla tucujpimi, Mandaj Diosca ñucataca cashna nirca:

¹⁷“Huañujlla aichayuj runalla, cantaca israelcunata ricuj cachunmi churani. Cunanca ñuca imalla nishcata alli uyangui. Paicunamanca ñuca imalla nishcata huillashpa cunangui.

¹⁸Ñucaca, ñucata mana manchaj runataca: Huañunami cangui nimanchari. Chaitaca paimanmi yachaj chayachina cangui. Ñucata mana manchaj runa millaita ruranata saquishpa causaita charichun, can mana huillajpica, millaita rurashcamantami huañunga. Pai huañujpica, cambaj jahuami canga.

¹⁹Ashtahuanpish ñucata mana manchaj runaman can huillashca jahua, millaita ruranamanta mana anchurishpa, millai causaitapish mana saquishpa, mana ñucapajman cutirishpaca, millaita rurashcamantaca huañungatajmi. Ashtahuanpish canca cambaj causaitaca quishpichinguimi.

²⁰Shinallataj cashcata ruraj runapish, cashcata ruracushcata saquishpa, millaita rurajpica, ñucami pai tsagnarishpa urmanataca churasha. Can mana paita cunashpa rimajpica, millaita rurashcamantami huañunga. Cashcata pai rurashcacunatapish manataj yuyarishachu. Pai huañujpica, cambaj jahuami canga.

²¹Ashtahuanpish cashcata ruraj runataca, ama juchata ruraichu nishpa can rimashcamanta uyashpa, juchata mana rurashpaca causangami. Canpish cambaj causaitaca quishpichinguimi” nircami.

²²Chaillapitajmi Mandaj Diosca, paipaj maquita ñuca jahuapi churashpaca: “Jatarishpa urcuman llujshi. Chaipimi canhuan parlanacusha nini” nircami.

²³Shina nijpimi ñucaca jatarishcahuan urcuman rircani. Chaipimi Quebar jatun yacu c'uchupi cashpa ricushca shinallataj, Mandaj Dios sumaj cashcataca ricurcani. Chaimantaca pambaman tupangacamami cumurircani.

²⁴Diospaj Espiritumi ñucapi yaicushpa jatarichirca. Chaimantami Mandaj Diosca cashna nirca: Ri, cambaj huasipi huichcarishpa tiyagri.

²⁵Huañujlla aichayuj runalla, cantaca huascacunahuanmi huatangacuna. Paicunapaj chaupimantaca ña mana llujshi tucunguichu.

²⁶Ñucami cambaj c'allutaca, jahua lado shimi ucupi llutachisha. Chaimantami mana rimaj tucungui. Paicuna mana cazujpipish, imata mana rimai tucunguichu. Paicunaca mana cazujcunami.

²⁷Cutin imata rimachun nishpaca, ñucallatajmi cambaj shimita pascasha. Chaipica canca: Mandaj Jatun Diosca cashnami nin: Maijanpish uyasha nijca uyaichij, mana uyasha nijca ama uyaichijchu ninmi nishpa huillangui. Paicunaca mana cazujcunami.