Read Chimborazo Highland Quichua EZEQUIEL 30 Bible Online

EZEQUIEL 30 - Chimborazo Highland Quichua bible

EZEQUIEL 30

¹Mandaj Diosca ñucamanca cashnami nirca:

²“Huañujlla aichayuj runalla, cashna huillayari: Mandaj Diosca cashnami nin: Huacaichigari, ¡aij chai punllaca imachari tucunguichij!

³Chai punllaca ñamari pajtamucun. Mandaj Dios llaquichina punllaca, ñamari quichquiyamucun. Chai punllaca p'uyu punllami canga, llajtacunata llaquichina punllami canga.

⁴Egipto llajtamanca espadami shamunga. Chai espadami paicunataca chugrichishpa urmachinga, imalla charishcacunatapish apangacunami. Huasicunatapish tucuitami chingachinga. Chaita ricushpami, Etiopía llajtapi causajcunaca mancharingacuna.

⁵Chai punllapica Etiopía shuti, Fut shuti, Lud shuti llajtacunapi causajcunapish, tucui Arabia llajtapi, Libia llajtapi causajcunapish, paihuan tandanacushpa causaj llajtacunapish paicunallahuantajmi chai espadapi urmangacuna” nircami.

⁶Shinallataj Mandaj Diosca cashnapishmi nin: “Egipto llajtata ayudajcunapish huañungacunami. Jatun tucushpa mandaj Egipto llajtaca Migdol pueblomanta Sevene pueblocamami espadapi huañunga. Mandaj Jatun Diostajmi chashna nini.

⁷Egipto llajtaca shujtaj llajtacuna shinallatajmi llaquinayaj saquiringa. Chaipi tiyaj pueblocunapish, shujtaj pueblocuna shinallatajmi shitashca saquiringa.

⁸Egipto llajtapi ninata japichishpa, paita ayudajcunandij tucuita chingachijta ricushpami ñucataca, Mandaj Diostaj cashcataca yachangacuna.

⁹Egipto llajtata llaquichi punllaca, ñuca ñaupajmantami huillajcunaca jatun barcocunapi rishpa, imata mana manchashpa causacuj Etiopía llajtapi huillashpa manchachingacuna. Egipto llajtata llaquichishcata uyashpaca mancharingacunami. Chai jatun llaqui punllaca, ñallami pajtamucun” nircami.

¹⁰Mandaj Jatun Diosca cashnapishmi nin: “Egiptopi imalla tiyajcunataca, Babilonia llajtata jatun mandaj Nabucodonosorpaj maquipi churashpami chingachisha.

¹¹Paimi achca llajtacunamanta tandashca ashtahuan c'ari c'ari, paipaj soldadocunandij rishpa, chai llajtataca chingachinga. Paicunapaj espadacunata huaquichinamanta llujshichishpami, Egipto llajtapi causajcunataca huañuchingacuna. Chai llajtaca huañushcacunahuanmi junda saquiringa.

¹²Jatun yacucunatapish chaquichishami, chai llajtataca yallitaj millai runacunamanmi cusha. Chai llajtataca, chaipi tucui imalla tiyajcunandijmi caru llajtamanta shamujcunaman tucuchichisha. Caicunataca Mandaj Diosca ñucatajmi chashna nini” ninmi.

¹³Mandaj Jatun Diosca cashnapishmi nin: “Egipto llajtapi tiyaj rurashcalla dioscunatapish, Menfis pueblopi tiyaj dioscunatapish chingachishami. Egipto llajtata jatun mandajca, mana ashtahuan tiyangachu. Chai llajtapica, jatun mancharinatami rurasha.

¹⁴Patros llajtataca chingachishami, Zoán pueblopica, ninatami japichisha. Tebas pueblopi causajcunataca, paicuna imalla rurashcatami ricusha.

¹⁵Shinallataj ñuca yallitaj p'iñarishpami, Egipto llajtata torre shina jarcaj Sin pueblotapish llaquichisha. Tebas pueblopi causajcunatapish tucuicunatami tucuchisha.

¹⁶Shinallataj Egipto llajtapica, ninatami japichisha. Sin puebloca, manchanayajtami nanachinga. Tebas puebloca, mirga mirgami tucunga. Menfis puebloca, punllantami llaquicunata charinga.

¹⁷Avén shuti, Pibeset shuti pueblocunapi causaj q'uipa huiñai c'aricunaca espadapimi huañungacuna, huarmicunaca prezumi ringacuna.

¹⁸Egipto llajta jatun tucushpa mandacushcata llaquichicui punllallatajmi, Tafnes pueblopica punllaca tutayanga. Egipto llajtataca, manchanana amsami tapanga. Llajta muyundij pueblocunapi causajcunataca, prezumi apangacuna.

¹⁹Egipto llajtataca llaquichishallatajmi. Chashna rurajpimi ñucataca, Mandaj Diostaj cashcataca yachangacuna” ninmi.

²⁰Chunga shuj huata punta quilla callari canchis punllapimi, Mandaj Diosca ñucataca cashna nirca:

²¹“Huañujlla aichayuj runalla, Egipto llajtata jatun mandaj faraonpaj rigrataca ñami p'aquircani. Chai rigrataca manamari jambicunata churashpa huatashcachu. Chai rigra alliyashpa, espadata sinchita charirachunpish manamari chumbihuan huatashcachu.

²²Chaimantami Mandaj Jatun Diostaj cashna nini: Egipto llajtata jatun mandaj faraonhuanca, ñucaca p'iñarishcami cani. Chaimantami paipaj alli rigratapish, p'aquishca rigratapish tucui p'aquishpa, maquipi charicun espadataca cacharichisha.

²³Shinallataj Egipto llajta runacunataca, shujtaj llajtacunamanmi caita chaita cachasha.

²⁴Ashtahuanpish Babilonia llajtata jatun mandajpaj rigracunatarajmi sinchiyachishpa, ñuca espadataca paipaj maquipi lutsachisha. Chai espadahuanmi faraonpaj rigracunataca p'aquinga. Chashna chugririshpa huañucushpami, paipaj ñaupajpica manchanayajta huacanga.

²⁵Ashtahuanpish Babilonia llajtata jatun mandajpaj rigracunatarajmi sinchiyachisha, faraonpaj rigracunataca urmachishami. Babilonia llajtata jatun mandajpaj maquipi ñuca espadata lutsachishpa Egipto llajtata llaquichicujta ricushpami, ñucataca Mandaj Diostaj cashcataca yachangacuna.

²⁶Shinallataj Egipto llajta runacunataca, shujtaj llajtacunamanmi caita chaita cachasha. Chaita ricushpami ñucataca, Mandaj Diostaj cashcataca yachangacuna” nircami.