Read Chimborazo Highland Quichua EZEQUIEL 35 Bible Online

EZEQUIEL 35 - Chimborazo Highland Quichua bible

EZEQUIEL 35

¹Mandaj Diosca ñucataca cashnami nirca:

²“Huañujlla aichayuj runalla, cambaj ñahuita Seir urcuman churashpa, pai imalla tucunata huillai.

³Cashna ningui: Mandaj Jatun Diosca cashnami nin: Seir urculla, canhuanca p'iñami cani, cantaca ñuca maquita chutashpami llaquichisha, llaquinayajta shitashcatami saquisha.

⁴Cantapish, canpi tiyaj pueblocunatapish llaquinayajtami saquisha. Chashna rurajpimi ñucataca, Mandaj Diostaj cashcataca yachangui.

⁵Canca huiñaita p'iñanacushpallami causarcangui. Chaimantami israelcuna yallitaj jatun llaquita apacujpipish, espadahuan huañuchicujcunaman japishpa curcangui.

⁶Chaimantami Mandaj Jatun Diosca cashna nini: Ñucaca causacunimi, cantapish huañuchingacunami. Canllataj huañuchinata mana saquirishcamantaca, cantapish huañuimi japinga.

⁷Seir urcutaca llaquinayaj shitashcatami saquisha. Shinallataj paipajman rijcunatapish, paipajmanta shamujcunatapish huañuchishami,

⁸cambaj urcucunapica huañushcacunatami jundachisha. Lomacunapipish, pugru pambacunapipish, tucui yacu huaicucunapipish espadapi huañushcacunami urmangacuna.

⁹Cantaca huiñaipajmi llaquinayajta saquisha, canpi tiyaj pueblocunapish mana cutin allichishcachu canga. Chashna rurajpimi ñucataca, Mandaj Diostaj cashcataca yachanguichij.

¹⁰Canca: Mandaj Diosllataj Israel llajtapi cajpipish, ishquindij llajtacunata ñucapajlla cachun quichushpa japishatajmi nircanguimi.

¹¹Chaimantami Mandaj Jatun Diosca cashna nini: Ñucaca causacunimi. Ima shinami israelcunata p'iñachishpalla, jatunta llaquichishpalla causarcangui, chashnallatajmi ñucapish cantaca jatunta llaquichisha. Canta chashna llaquichijta ricushpami, israelcunaca ñucataca rijsingacuna.

¹²Canca Israel llajtapi tiyaj urcucunataca, p'iñashcamantami cashna nircangui: Cai urcucunataca tucui chingachinchijtajmari. Chashna chingachichunmari ñucanchijman cushca nishpa rimashcataca, Mandaj Dios ñucatajmi uyarcani. Ñuca llaquichijpimi, chaitaca yachangui.

¹³Canca yallitaj jatun tucushpami, ñucata c'ariyashpa manchanayajta rimarcangui. Chaitaca ñucatajmi uyarcani.

¹⁴Chaimantami Mandaj Jatun Diostaj cashna nini: Tucuicuna ricushpa cushicuchunmi cantaca llaquinayajta saquisha.

¹⁵Canca israelcuna causacun ñuca cushca llajta llaquinayaj tucushcata ricushpaca cushicurcanguimi, chashnallatajmi cantapish rurasha. Seir urcuca llaquinayajmi tucunga, tucui Edom llajtami chaipi causajcunandij llaquinayaj saquiringa. Chashna rurajpimi ñucataca, Mandaj Diostaj cashcataca yachangacuna ninmi ni” nircami.