Read Chimborazo Highland Quichua EZEQUIEL 36 Bible Online

EZEQUIEL 36 - Chimborazo Highland Quichua bible

EZEQUIEL 36

¹“Huañujlla aichayuj runalla, Israel llajta urcucuna imalla tucunata cashna nishpa huillai: Israel llajtapi tiyaj urcucunalla, Mandaj Dios imalla nishcata uyaichij.

²Mandaj Jatun Diosca cashnami nin: Cancunata p'iñajca huiñaipaj tiyacuj urcucunatapishmari ñucanchijpaj cachun cushca nishpami cushicurca.

³Shina cajpipish cashna nishpa huillai: Mandaj Jatun Diosca cashnami nin: Cancunataca llaquinayajtami saquircacuna, shujtaj llajtacunamanta shamujcunami japishpa millpurcacuna. Cancunaca chanzata rurashpa, rimashpa asijcunapaj maquipimi urmarcanguichij.

⁴Chashna cashpapish Israel llajta urcucunalla, Mandaj Jatun Dios imalla nishcata uyaichij. Mandaj Jatun Diosca urcucunatapish, lomacunatapish, yacu huaicucunatapish, pugru pambacunatapish, urmachishca llaquinayaj shitashca pueblocunatapish, imalla tiyajta quichushpa apashca pueblocunatapish, shujtaj llajtapi causajcuna chanzata rurashpa asishca pueblocunatapish cashnami nin:

⁵Shujtaj llajtapi causajcunapish, Edom llajtapi causajcunapish, ñuca llajtataca cushicushpami japircacuna. Chaipi causajcunataca yallitaj p'iñashcamantami, prezu aparcacuna. Chashna rurashcamantami ñucaca jatunta p'iñarishpa, nina lunyacuj shina shimicunahuan rimarcani. Mandaj Jatun Diostajmi chashna nini.

⁶Chashna cajpipish, Israel llajta imalla tucuna cashcata huillai. Chai llajtapi tiyaj urcucunamanpish, lomacunamanpish, yacu huaicucunamanpish, pugru pambacunamanpish cashna nishpa huillai: Mandaj Jatun Diosca cashnami nin: Shujtaj llajtacunapi causajcuna cancunata chanzata rurashpa asishcamantami paicunataca jatunta p'iñarishpa, nina lunyacuj shina shimicunahuan rimarcani.

⁷Mandaj Jatun Diosca cashnapishmi nin: Ñuca maquita huichi alzashpami, cambaj muyundij llajtacunapi causajcunaca jatun llaquita apangacunatajmi nircani.

⁸Israel llajtapi tiyaj urcucunalla, ashtahuanpish cancunaca ñuca agllashca israelcunapajca, yuracunata huiñachishpa micuna granocunata p'ucuchicuichijlla, ñallami paicunaca tigramunga.

⁹Cancunamantaca ñucami shayarisha, cancunapajmanca ñucami tigramusha, cancunaca yapushca tarpushcami canguichij.

¹⁰Shinallataj chaipi causacuj tucui israelcunataca achcatami mirachisha. Pueblocunapipish achcacunami causangacuna, urmashca huasicunatapish cutinmi shayachingacuna.

¹¹Cancunapi causachunca runacunatapish, animalcunatapish yallitaj achcatami mirachisha, pipish mana yupai tucuipajtami huiñashpa miraringacuna. Ñaupa huatacunapi shinallatajmi achcacuna causanga. Ñaupa huatacunatapish yalli achca allicunatami cusha. Chashna rurajpimi ñucataca, Mandaj Diostaj cashcataca yachanguichij.

¹²Cancunapica ñuca agllashca israelcunami puringacuna. Paicuna causachunmi cai urcucunataca cusha, paicunapajmi cangui. Paicunapaj huahuacunataca, cutinca ña mana huañuchinguichu.

¹³Mandaj Jatun Diostajmi cashna nini: Israel llajta urcucunalla, cancunataca cashnami nincuna: Runacunata micujmari, Israel llajtapi causaj huahuacunata huañuchijmari nincunami.

¹⁴Chaimantaca ña mana ashtahuan runacunataca chingachinguichijchu. Cancunapi causajcunapaj huahuacunatapish mana ashtahuan huañuchinguichijchu. Mandaj Jatun Diostajmi chashna nini.

¹⁵Shinallataj shujtaj llajtacunapi causajcuna c'amishpa rimashcatapish, ña mana ashtahuan uyanguichijchu. Cancunapi causaj huahuacunatapish, ña mana ashtahuan huañuchinguichijchu ninmi Mandaj Jatun Diosca ni” nircami.

¹⁶Mandaj Diosca ñucataca cashnami nirca:

¹⁷“Huañujlla aichayuj runalla, israelcunaca, quilla ungüihuan mapayashca huarmi shinami paicunapaj llajtapica, millaita rurashpa causarcacuna. Chashnami mapa tucurcacuna.

¹⁸Llajtapi causajcunatapish huañuchishcamanta, rurashcalla dioscunatapish adorashpa mapayashcamantami, ñuca p'iñarishpa paicunataca jatunta llaquichircani.

¹⁹Shinallataj shujtaj llajtacunamanmi, caita chaita cacharcani. Chaimantami caita chaita rircacuna. Paicuna rurashca shinallatajmi llaquichircani.

²⁰Chaimantami shujtaj llajtacunapi causajcunaca ñuca jucha illaj shutita yangata rurashpa, israelcunataca cashna nircacuna: Caicunacarin Mandaj Diospaj agllashcacunamari. Diospaj llajtamantamari llujshimushcacuna nishpami rimarcacuna.

²¹Israelcuna shujtaj llajtacunaman chayajpi, chaipi causajcunaca ñuca jucha illaj shutita yangata rurashpa rimacujta ricushpami, yallitaj llaquirircani.

²²Chaimanta israelcunaman cashna ni: Mandaj Jatun Diosca cashnami nin: Imata ruranatapish mana cancunamantachu ruragrini. Ashtahuanpish shujtaj llajtapi causajcuna ñuca jucha illaj shutita yangata rurashpa cancunata rimashcamantami, paicunataca llaquichigrini.

²³Shujtaj llajtacunapi causajcunaman ñuca jatun shutita yangata rurachishcataca jatunyachishami. Cancunapurapi ñuca shutita jatunyachijta ricushpami, shujtaj llajtacunapi causajcunaca ñucataca, Mandaj Diostaj cashcataca yachangacuna. Mandaj Jatun Diostajmi chashna nini.

²⁴Cancunataca shujtaj llajtacunamanta tandachishpami, quiquin llajtallamantaj pushamusha.

²⁵Chaipimi cancunapaj jahuapica, chuyajlla yacuta tsirapasha. Chashna rurajpimi tucui mapamantapish, rurashcalla dioscunata adoranamantapish maillashca canguichij.

²⁶Cancunapica mushuj shunguta, mushuj yuyaitami churasha. Cancunamantaca rumi shunguta anchuchishpami, aicha shunguta churasha.

²⁷Chashna rurashpa ñuca Espirituta shungupi churajpimi, cancunaca ñuca quillcachishcapi nishca shina causanguichij, ñuca imalla rurai nishcatapish pajtachinguichijmi.

²⁸Cancunapaj ñaupa yayacunaman cushca llajtapimi causanguichij. Cancunaca ñuca agllashcacunami canguichij, ñucapish cancunapaj Diosmi casha.

²⁹Cancunataca tucui mapamantami huaquichisha, achca trigotapishmi cusha. Ña mana cutinca yaricaica tiyangachu.

³⁰Shujtaj llajtapi causajcuna, ama cutin cancuna yaricaihuan cajta ricushpa chanzata rurashpa asichunmi, yuracunapipish allpacunapipish granocunataca achcata p'ucuchisha.

³¹Cancuna mana alli causashcatapish, imalla mana allita rurashcatapishmi yuyaringuichij. Chai millanana juchacunata rurashcamantaca, cancunallatajmi pingaringuichij.

³²Israelcunalla, cancuna millaita rurashcamantaca pingarichigari, ñucaca mana cancuna munashcamantachu chaicunata rurani. Chaitaca cancunaman huillanimi ninmi” Mandaj Jatun Diosca.

³³Mandaj Jatun Diosca cashnapishmi nin: “Cancunapaj tucui juchacunata anchuchi punllamantapachami pueblocunapi causachun churasha, shinallataj chai urmashca huasicunatapish shayachishca cangami.

³⁴Cai llajtata purijcuna ricushca, llaquinayaj shitashca siricun allpacunapish tarpushcami canga.

³⁵Chaita purijcuna ricushpaca, cashnami ningacuna: Cai shitashca allpacunaca, Edén huerta shinamari tucushca. Pueblocunapish urmachishca, shitashca, llaquinayajmari carca. Cunanca huasichishpamari, muyujta pircashpa causacuncuna ningacunami.

³⁶Shinallataj cancunapaj muyundij llajtacunapi causajcunaca tucui urmashcatapish ñuca cutin shayachishcata, tirashpa shitashcatapish ñuca cutin tarpushcatami ricungacuna. Caicunataca Mandaj Dios ñucatajmi chashna nini, chashna nishcataca rurashatajmi.

³⁷Mandaj Jatun Diosca cashnapishmi nini: Israelcunamanca, imalla mañashcatami cusha. Israelcunataca, canlla ovejata shinami mirachisha.

³⁸Jatun fiesta punllacunapi Jerusalenman apamushca ñucapajlla ovejacuna shinami, israelcunaca shitashca pueblocunapica jundanga. Chaita ricushpami ñucataca, Mandaj Diostaj cashcataca yachangacuna ninmi ni” nircami.