Read Chimborazo Highland Quichua EZEQUIEL 38 Bible Online

EZEQUIEL 38 - Chimborazo Highland Quichua bible

EZEQUIEL 38

¹Mandaj Diosca ñucataca cashnami nirca:

²“Huañujlla aichayuj runalla, cambaj ñahuita Magog llajtata mandaj Gogman churashpa, pai imalla tucuna cashcata huillai. Paica Mesecpaj, Tubalpaj huahua huahuacunata jatun mandajmi.

³Paimanca cashna huillai: Mandaj Jatun Diosca cashnami nin: Mesecpaj, Tubalpaj huahua huahuacunata jatun mandaj Gog runalla, canhuanca p'iñarishcami cani.

⁴Cantaca llaquichishatajmi. Cambaj quijaduscunapipish ipicunata churachishpami cantapish, cambaj tucui soldadocunatapish, caballocunatapish, caballocunapi tiyarishpa callpajcunatapish, jatun escudocunata, uchilla escudocunata, espadacunata, shujtaj macanacunacunata charicuj soldadocunatapish llujshichisha.

⁵Persia shuti, Cus shuti, Fut shuti llajtacunapi causajcunami canhuanca ringacuna. Paicunapish escudocunata, umapi churarina cascocunatami apangacuna.

⁶Shinallataj Gomer llajtamanta tucui soldadocunapish, janaj ladoman caj Togarma llajtapi tucui causajcunapish, tucui soldadocunapish, shujtaj achca runacunapishmi canhuanca ringacuna.

⁷Chaimanta cunanca canhuan caj tucui runacunatapish yachachishpa utca allichiyari. Canmi paicunataca pushangui.

⁸Achca punllacuna huashami llaquichishca cana cangui. Uni huatacunapimi espadamanta quishpichishca llajtamanca shamungui. Achca llajtacunahuan tandanacushpami, Israel llajta urcumanca shamungui. Chaipi causajcunaca llaquichishcallami causajcuna carca. Chashna cashpapish shujtaj llajtacunapi causacushcamantami, llujshichishca carcacuna. Chaimantami paicunaca imata mana manchashpa causangacuna.

⁹Chai llajtamanca jatun acapana shinami huichiyangui. Chai llajtataca cambaj tucui soldadocunapish, canhuan tandanacushca achca runacunapish p'uyu shinami tapangacuna” ninmi.

¹⁰Mandaj Jatun Diosca cashnapishmi nin: Chai punllapica cambaj shungumantaca, millai shimicunami llujshinga. Shinallataj mana alli yuyaicunahuan junda cashpami,

¹¹canca cashna ningui: Mana mitsari tucuipaj llajtata llaquichinaman rishalla. Imata mana manchashpa casijlla causacuj runacunata manchachigrishalla. Paicuna causacun llajtaca jatun pircacunatapish, aldabacunayuj pungucunatapish mana charinchu.

¹²Paicunaca shujtaj llajtacunamanta tigramushpami, chaitaj llaquinayaj shitashca llajtata japishpa causacuncuna. Cunanca animalcunayuj, achca charinacunayujmi tucushcacuna. Cai pachapi tiyaj llajtacunapaj chaupipimi, chai llajtaca tiyacun nishpami yuyacungui.

¹³Sabá shuti, Dedán shuti llajtacunapi causajcunapish, Tarsis pueblomanta c'atujcunapish randijcunapish, tucui mandajcunapishmi cantaca cashna ningacuna: ¿Imalla charishcacunatachu quichushpa apanaman shamurcangui imamí? ¿Ñucanchij imalla charishcacunata, cullquita, curita, animalcunata, ima shujtaj achca allicunatapish quichushpa apangapajchu cai tucui runacunataca tandachishpa pushamungui imamí? ningacunami ninmi ni.

¹⁴Chaimanta huañujlla aichayuj runalla, mandaj Gogmanca cashna huillai: Mandaj Jatun Diosca cashnami nin: Chai punllacunapica ñuca agllashca israelcunaca imata mana manchashpa causana cashcataca, canca ¿manachu yachangui imamí?

¹⁵Can causacun janaj llajtamantaca c'ari c'ari, achca soldadocunatami, tucuicunata caballocunapi tiyarishcata pushashpa shamungui.

¹⁶Ñuca agllashca israelcunataca llaquichinaman huichiyashpami, paicuna causacun llajtataca p'uyu shina tapanguichij. Mandaj Gog runalla, shujtaj llajtacunapi causajcunapaj ñaupajpi, ima juchachina illajlla cangapajmi, ñuca agllashcacunataca llaquichichun ñucallataj cachasha ninmi.

¹⁷Mandaj Jatun Diosca cashnapishmi nin: Ñaupa punllacunapica israelcunaman huillashpa ñucata servijcunatami canmantaca huillachircani. Chai huillajcunami israelcunata llaquichichun ñuca canta pushamuna cashcataca huillarcacuna ninmi.

¹⁸Mandaj Jatun Diosca cashnapishmi nin: Mandaj Gog, Israel llajtata llaquichinaman shamui punllallatajmi ñucapish jatunta p'iñarisha.

¹⁹Nina lunyacuj shina shimicunahuan rimashpami cashna nini: Chai punllacunapica, Israel llajtapica jatun allpa chujchuimi tiyanga.

²⁰Mama cuchapi causaj chalhuacunapish, huairata purij alasyuj animalcunapish, sachapi causaj animalcunapish, pambata llucashpa purij animalcunapish, cai pachapi causaj tucui runacunapishmi ñuca ñaupajpica chujchungacuna. Urcucunapish t'unirishpa urmangami, jarcata rurashcacunapish, pircacunapish urmangami.

²¹Ñucapaj tucui urcucunamantami, Gogta espadahuan huañuchichun cayasha. Mandaj Jatun Diostajmi chashna nini. Chaipica quiquin espadallahuantajmi, caishuj chaishuj huañuchinacunga.

²²Paitaca jatun ungüihuan, yahuarhuanmi jatunta llaquichisha. Shinallataj paitapish, paipaj soldadocunatapish, paihuan caj achca runacunatapish manchanayaj tamyahuan, rumi vali runduhuan, nina rupacuj azufrehuanmi jatunta llaquichisha.

²³Chashna rurashpami, shujtaj llajtacunapi causajcunapaj ñahuipica, ima juchachina illajlla casha, jatunyachishcapishmi casha. Chashna rurajta ricushpami ñucataca, Mandaj Diostaj cashcataca yachangacuna ninmi ningui.