Read Chimborazo Highland Quichua EZEQUIEL 39 Bible Online

EZEQUIEL 39 - Chimborazo Highland Quichua bible

EZEQUIEL 39

¹Huañujlla aichayuj runalla, mandaj Gog imalla tucuna cashcata cashna huillai: Mandaj Jatun Diosca cashnami nin: Mesecpaj, Tubalpaj huahua huahuacunata jatun mandaj Gog runalla, canhuanca p'iñarishcami cani.

²Cantaca llaquichishatajmi, janaj llajtacunapi causacunmanta llujshichimushpaca Israel llajta urcu jahuacunamanmi pushasha.

³Cambaj lluqui maquipi charicun arcotaca quichushpami, alli maquipi charicun puntajlla caspicunatapish p'aquisha.

⁴Canpish, cambaj soldadocunapish, canhuan rij runacunapish Israel llajta urcu jahuacunapimi urmanguichij. Chaipimi cancunataca huairata purij tucui laya animalcunamanpish, sachapi causaj p'iña animalcunamanpish carasha.

⁵Tucuicuna ricunallapimi urmangui. Mandaj Jatun Diostajmi chashna nini.

⁶Shinallataj Magog llajtamanpish, mama cucha uripi imata mana manchashpa causajcunamanpish ninatami cachasha. Chashna rurajpimi ñucataca, Mandaj Diostaj cashcataca yachangacuna.

⁷Chashna rurashcata ricushpami, israelcunaca ñucataca, ima jucha illaj cashcata rijsingacuna. Chaimanta ña mana cutinca, jucha illaj ñuca shutitaca yangata rurachun saquishachu. Chashna rurajpimi, shujtaj llajtacunapi causajcunaca ñucataca, israelcunapaj jucha illaj Mandaj Dios cashcataca yachangacuna.

⁸Riquichij, imalla tucuna cashcata ñuca huillashca punllaca ñallami pajtanga. Mandaj Jatun Diostajmi chashna nini.

⁹Israel llajtapi tiyaj pueblocunapi causajcuna llujshishpami tucui laya macanacunacunatapish, uchilla escudocunatapish, jatun escudocunatapish, arcocunatapish, puntajlla caspicunatapish, maquipi aisana jabalinacunatapish, lanzacunatapish ninata japichishpa canchis huatata rupachingacuna.

¹⁰Chai macanacunacunata rupachingapajca, mana sachamanta yantata apagringacunachu, mana yuracunata p'itingacunachu, ashtahuanpish ninallahuantaj rupachingallacunami. Shinallataj paicuna imalla charishcacunata quichushcacunallatatajmi quichungacuna, paicunapajta shuhuashcacunallatatajmi shuhuangacuna. Mandaj Jatun Diostajmi chashna nini.

¹¹Chai punllami, Israel llajtapica mandaj Gogta maipi pambanata ricuchisha. Inti llujshin lado mama cuchaman rina pugru pambatami paita pambachun cusha. Chaipimi mandaj Gogtapish, paihuan caj runacunatapish pambangacuna. Chaita purijcunapish ña mana ashtahuan puringacunachu. Chai pugru pambataca Hamón-gog shutitami shutichingacuna.

¹²Israel llajtata p'ichangapajmi, chai huañushcacunataca israelcunaca canchis quillata pambangacuna.

¹³Chai llajtapi causajcunami, chai huañushcacunataca tucui pambangacuna. Ñucata jatunyachishcamantami chai punllaca paicunapajca, yuyarina punlla canga. Mandaj Jatun Diostajmi chashna nini.

¹⁴Israel llajtata p'ichashcata saquingapajmi maipi huañushcacuna siricujta mashcashpa pambagrichun, chai llajtata purijcunahuan cachangapaj cullqui jahua servij runacunata japingacuna. Paicunami chai huañushcacunata mashcashpa canchis quilla q'uipapish pambangacuna.

¹⁵Chai llajtapi huañushcacunata mashcagrijcunami, maipi tullucuna siricujta ricushpaca señalashpa saquingacuna. Chai tullucunata pambajcuna Hamón-gog pugru pambapi pambangacamami señalashpa saquingacuna.

¹⁶Shinallataj chai pueblotaca Hamona shutitami shutichingacuna. Chashnami Israel llajtataca p'ichashcata saquingacuna ninmi ni nircami.

¹⁷Mandaj Jatun Diosca ñucataca cashnapishmi nirca: “Huañujlla aichayuj runalla, huairata purij alasyuj animalcunatapish, tucui sacha animalcunatapish cashna ni: Tucuimanta tandanacushpa Israel llajta urcucunaman shamuichij, chaipimi achcacunata huañuchishpa cancunaman cusha. Chaipica aichatapish micunguichijmi, yahuartapish ubyanguichijmi.

¹⁸C'ari c'ari runacunapaj aichatami micunguichij, llajtata mandajcunapaj yahuartami ubyanguichij. Paicunaca Basán urcupi huirayashca carnerocuna, malta c'ari ovejacuna, c'ari chivocuna, novillocuna, torocuna shinami.

¹⁹Cancunaman ñuca cushpa huañuchishcacunapaj huirataca mana nijtami micunguichij, yahuartapish machangacamami ubyanguichij.

²⁰Ñuca meza jahuapica caballocunatapish, caballopi tiyarishpa c'ari c'ari callpajcunatapish, macanacuj tucui soldadocunatapish huañuchishpa churasha. Chaicunataca mana nijtami micunguichij. Mandaj Jatun Diostajmi chashna nini.

²¹Chashna rurashpami, shujtaj llajtapi causajcunamanca, ñuca jatun cashcataca ricuchisha. Tucui llajtapi causajcunami ñuca imata ruraj cashcatapish, llaquichij cashcatapish yachangacuna.

²²Chai punllamantapachami israelcunaca, paicunata Mandaj Dios cashcataca yachangacuna.

²³Shujtaj llajtapi causajcunaca, israelcuna ñucata c'ariyashpa juchata rurashcamanta prezu apashcatami yachangacuna. Paicunamanta ñuca ñahuita anchuchishpa, p'iñajcunaman cushpa, espadahuan huañuchichishcatami yachangacuna.

²⁴Ñucata c'ariyashpa yallitaj millaita rurashcamantami, paicunataca llaquichircani. Chaimantami paicunamantaca ñuca ñahuitapish anchuchircani ninmi.

²⁵Shina cajpipish, Mandaj Jatun Diosca cashnami nin: Jacobopaj huahua huahua israelcunataca prezu causacushcamantaca, llaquishpa tigrachimushami. Ñuca jucha illaj shutitaca, manataj yangata rurashca cachun saquishachu.

²⁶Paicunaca quiquin llajtapi pipish mana manchachishca, sumajta causacushpami, ñaupaman ñucata c'ariyashpa yallitaj millaita rurashcata yuyarishpaca pingaringacuna.

²⁷Paicunata p'iñajcunapaj llajtacunamanta llujshichishpa tandachishpami, achca llajtacunapi causajcunapaj ñahuipica, ñucaca jucha illaj cashcata ricuchisha.

²⁸Shujtaj llajtacunapi prezu causacunmanta shujllatapish mana saquishpa llujshichishpami, tandachishpa quiquin llajtapi causachun churasha. Chashna rurajpimi ñucataca, Mandaj Diostaj cashcataca yachangacuna.

²⁹Paicunamantaca ñuca ñahuitaca, ña mana cutinca anchuchishachu, ashtahuanpish israelcunapica ñuca Espiritutami churasha ninmi Mandaj Jatun Diosca ningui” nircami.