Read Chimborazo Highland Quichua EZEQUIEL 44 Bible Online

EZEQUIEL 44 - Chimborazo Highland Quichua bible

EZEQUIEL 44

¹Shinallataj inti llujshin ladomanta Diospajlla huasiman yaicuna pungumanmi pusharca. Chai punguca huichcashcami cashca carca.

²Chaimantaca Mandaj Diosca ñucataca cashnami nirca: “Cai pungutaca israelcunata Mandaj Dios yaicushcamantami pi mana yaicui tucunga, pi mana pascai tucunga. Chaimantami cai punguca huichcashcalla tiyanga.

³Shuj mandajmi pai mandaj cashcamantaca, Mandaj Diospaj micunata micungapaj chaipi tiyaringa. Paica corredor punguta yaicushpaca, chaillatatajmi llujshinga” nircami.

⁴Chai q'uipaca, Diospaj huasi ch'imbapurapi caj ura lado pungumanmi pusharca. Chaipica Mandaj Diospaj huasipica, paipaj achij nicuj jundashcatami ricurcani. Chaita ricushpaca, pambaman tupajtami cumurircani.

⁵Chaimantaca Mandaj Diosca ñucataca cashnami nirca: “Huañujlla aichayuj runalla, ñuca huasipi tiyacun mandashcacunapi imalla nicushcata ñuca huillashcataca cambaj rinrincunahuantaj alli uyashpa, cambaj ñahuicunahuantaj alli ricushpa yuyaita japiyari. Cai huasimanca pilla yaicunata, pilla llujshinatapish alli entendiyari.

⁶Chai mana cazuj israelcunamanca cashna huillai: Mandaj Jatun Diosca cashnami nin: Israelcunalla, ña chailla millaitaca ruraichigari.

⁷Cancunaca shungumanta millai yuyaita mana anchuchishcacunata, c'aricuna charishca aicha mirga caratapish mana p'itishca shujtaj runacunata ñuca huasiman yaicuchishpamari, ñuca huasitaca mapayachishcanguichij. Cancunaca ñucamanca huiratapish, yahuartapishmi curcanguichij. Ñucahuan ari ninacushcata yangata rurashpamari, cancunaca yallitaj millaita rurashcanguichij.

⁸Shinallataj imalla ñucapajlla cashcacunatapish, manamari ñucapajlla cashcataca yuyashpa huaquichircanguichijchu. Ashtahuanpish ñucapajlla huasipi ñuca mandashcacunata pajtachichunca shujtaj runacunatamari churarcanguichij ninmi ni” nircami.

⁹Mandaj Jatun Diosca cashnapishmi nin: Israelcunapurapi causacuj shujtaj llajta runacunaca shungumantapish millai yuyaita mana anchuchishca. Paicuna charishca aicha mirga caratapish mana p'itichishca cashpaca, ñuca huasimanca manataj yaicui tucungacunachu.

¹⁰Shinallataj israelcuna paicunapaj rurashcalla dioscunata adorashpa ñucamanta caruyajta ricushpaca, levitacunapishmi ñucamanta caruyarcacuna. Chashna rurashcamantaca, paicunapishmi llaquita apangacuna.

¹¹Paicunaca ñuca huasipica pungucunapi cuidashpalla, ñuca huasipi imata rurashpallami causangacuna. Paicunami Diosman cushpa tucuita rupachina animalcunatapish, israelcuna ñucaman cushca animalcunatapish huañuchingacuna. Israelcuna imatapish rurachun nishcatami pajtachingacuna.

¹²Paicunaca rurashcalla dioscunallata servishpami, israelcunataca millaita rurachishpa pandachircacuna. Chashna millaita rurachichishcamantaca, llaquita apangacunami. Mandaj Jatun Dios ñucatajmi, ñuca maquita huichi alzashpa chashna nini.

¹³Chai levitacunaca mana ñucata servij curacuna shina ñucata servi tucungacunachu. Imalla ñucapajlla cashcatapish, imalla ñucapajlla ch'icanyachishcacunatapish manataj tupari tucungacunachu. Millaita rurashcamantaca, pingachishcami cangacuna.

¹⁴Paicunataca ñuca huasita cuidaj soldadocuna cachun, ñuca huasipi imalla rurana cashcata rurajcuna cachunmi, mingashpa chaipi churasha.

¹⁵Ashtahuanpish Sadocpaj huahua huahua levita curacunaca, israelcuna ñucamanta anchurijpipish, ñucapajlla huasipi imallata rurachun mandashcacunataca rurashpa catircacunallami. Chaimantami ñucapaj imatapish ruranaman c'uchuyangacuna. Paicunami ñucaman cushca huiratapish, yahuartapish cungapaj c'uchuyangacuna. Mandaj Jatun Dios ñucatajmi chashna nini.

¹⁶Paicunami ñucapajlla huasiman yaicushpa ñucaman cushcacunataca rupachingacuna, ñuca mandashcacunatapishmi pajtachingacuna.

¹⁷Ñuca huasiman yaicuna, huasi canllapi tiyaj pungucunata yaicungapajpish, ñucapajlla huasipi imata rurangapajpish lino churanata churarichuncuna, millma churanataca ama churarichuncuna.

¹⁸Shinallataj umapica, lino turbanteta churarichuncuna. Lino calzoncillotapish churarichun. Cinturapica ima chumbichinahuanca ama chumbillirichuncuna.

¹⁹Diospaj huasipi imatapish rurashca q'uipaca churanacunataca llujshichishpa, Diospajlla huasipi tiyaj uchilla ucucunapi huaquichichuncuna. Jatun huasi canllaman llujshishpa, chaipi cajcunahuan tupangapajca shujtaj churanata churarichuncuna. Chai churanallahuantaj llujshishpaca, huasi canllapi cajcunataca ñucapajllatami rurangacuna.

²⁰Umataca ama lluchuta rutuchichun, yallitaj ajchatapish ama charichuncuna. Ashtahuanpish ashallata p'itirichuncuna.

²¹Curacunaca ñuca huasiman yaicuna, huasi canllaman yaicungapajca vinota ama ubyachuncuna.

²²Shinallataj viudatapish, cusa shitashcatapish ama casarachun. Ashtahuanpish israelcunapaj aillupuramanta c'arihuan manaraj chayarinacushca huarmita cashpa, mana cashpaca cura huañujpi viuda saquirishca huarmita cashpa casarachun.

²³Ñuca agllashcacunamanca imalla ñucapaj ch'icanchishca cashcatapish, imalla yanga cashcatapish yachachichun. Shinallataj imalla mapa cashcatapish, imalla mana mapa cashcatapish yachachun yachachinguichij.

²⁴P'iñanacushcacunatapish chai curacunami allichingacuna. Ñuca llaquichichun nishca shinami llaquichingacuna. Ñucata yuyarishpa jatun fiestata rurai punllacunaca ñuca mandashcacunata, ñuca huillachishcacunata rurashpa pajtachichuncuna. Ñuca cushca samana punllacunatapish ama yanga punllacuna shina cashcata yuyachuncuna.

²⁵Ama mapayangapajca, huañushca runapaj aichapipish ama tuparichun. Yayamanta cashpa, mamamanta cashpa, mana cashpaca churimanta cashpa, ushushimanta cashpa, mana cashpaca huauquimanta cashpa, panimanta cashpa, manaraj cusayuj cashpa huañujpica, tuparishpa mapayai tucunmi.

²⁶Mapayashcamanta armashpa mapa illaj tucushcamantaca, canchis punllata shuyachun.

²⁷Ñucata servingapaj ñucapajlla huasiman yaicuna huasi canllaman yaicushpaca, juchamanta animalta ñucaman cuchun. Mandaj Jatun Diostajmi chashna nini.

²⁸Ñucami paicuna japina allpaca casha. Israel llajtapi tiyaj allpacunataca mana japingacunachu, ñucami paicuna japina allpaca casha.

²⁹Chai curacunami ñucamanca imalla cuna cashcata cushcacunatapish, juchamanta animalta cushcatapish, ñucaman animalta cushpa huañuchishcatapish micungacuna. Tucui israelcuna imatapish ñucapajlla cachun cushcacunapish chai curacunapajmi canga.

³⁰Shinallataj tucui punta p'ucushca granocunapish, tucui imalla cuna cashcata cushcacunapish tucuimi curacunapaj canga. Cancunapaj huasicunapi bendicion tiyachunca, punta p'ucushca granomanta rurashca tucui laya tandatami curacunamanca cuna canguichij.

³¹Curacunaca alasyuj animalcunatapish, shujtaj animalcunatapish mapami nishcacuna huañushcacunataca ama micuchun.