Read Chimborazo Highland Quichua EZEQUIEL 46 Bible Online

EZEQUIEL 46 - Chimborazo Highland Quichua bible

EZEQUIEL 46

¹Mandaj Jatun Diostajmi cashna nini: Ñuca huasi canllaman yaicuna inti llujshin ladoman caj punguca, sujta punllami canga. Ashtahuanpish samana punllapi, mushuj quilla punllapica pascaringami.

²Mandajca zaguanta yaicushpa corredorta pasashpaca, huasi canllaman yaicuna pungu caspi c'uchupi shayarichun. Ñucaman cushpa tucuita rupachichun chai mandaj cushcatapish curacunami rupachingacuna. Ñucahuan alli cangapaj cushcatapishmi cungacuna. Chashna rurangacama chai mandajca chai pungu c'uchullapitaj ñucata adorashpa llujshichun. Chai punguca chishiyangacama, amataj huichcashca cachun.

³Shinallataj cai llajtapi causajcunapish samana punllacunapi, mushuj quilla punllacunapica, chai pungu c'uchullapitaj ñuca Mandaj Diosta adorachun ninimi.

⁴Chai mandajca samana punllapica, sujta malta c'ari ovejacunatapish, shuj carnerotapish ima mana tucushcacunata ñucaman cushpa tucuita rupachichun.

⁵Shinallataj cada carnerota, shuj efa cutahuan cuchun. Cada malta c'ari ovejahuan, imallata cui tucushcahuan cuchun. Shuj hin nishca medida aceitetaca, shuj efa cutahuan cuchun.

⁶Mushuj quilla punllapica, vacacunamanta malta c'ari huagrata, sujta malta c'ari ovejacunata, shuj carnerotapish ima mana tucushcacunata cuchun.

⁷Shinallataj shuj efa cutataca, malta c'ari huagrahuan cuchun. Cada carnerohuan, shuj efa cutata cuchun. Ashtahuanpish malta c'ari ovejacunahuanca, imallata cui tucushcahuan cuchun. Shuj hin nishca medida aceitetaca, cada efa cutahuan cuchun.

⁸Mandajca zaguanta yaicushpa, corredorta pasachun. Llujshingapajca, pai maita yaicushcallatataj llujshichun.

⁹Ashtahuanpish cai llajtapi causajcunaca, fiesta punllacunapi ñucata adoranaman yaicungachari. Paicunapuramanta maijancunaca janaj lado zaguanta yaicushca cashpaca, ura lado zaguanta llujshichun. Ura lado zaguanta yaicushca cashpaca, janaj lado zaguanta llujshichun. Ama maita yaicushca zaguanllatataj llujshichun, ashtahuanpish maita yaicushca cashpaca, chai ch'imbapurapi tiyacuj zaguanta llujshichun.

¹⁰Cai llajtapi causajcuna ñucata adoranaman yaicucujpica, mandajpish paicunahuan yaicuchun. Paicuna llujshijpipish, mandajpish paicunallahuantaj llujshichun.

¹¹Shinallataj jatun fiesta punllacunapipish, jatun tandanacui punllacunapipish, cada malta c'ari huagrataca, shuj efa cutahuan cuchun. Cada carnerotapish, shuj efa cutallahuantaj cuchun. Malta c'ari ovejataca, imallata cui tucushcahuan cuchun. Shuj hin nishca medida aceitetaca, cada efa cutahuan cuchun.

¹²Mandajca paipaj quiquin yuyaimanta, ñucaman animalta cushpa tucui rupachisha ningachari. Mana cashpaca ñucahuan alli cangapaj animalta cusha ningachari. Pai chaicunata ñucaman cuchun, inti llujshin ladoman caj zaguanta pascachun. Chaita yaicushpa samana punllacunapi rurashca shinallataj animalta cushpa tucui rupachichun, alli cangapajpish animalta cuchun. Pai chashna rurashpa llujshishca q'uipaca, chai pungutaca huichcachun.

¹³Punllantami ima mana tucushcata shuj malta c'ari ovejata ñucaman cushpa huañuchina cangui. Cada tutamantami ñucaman cushpa tucui rupachina cangui.

¹⁴Chashnami punllanta shuj malta c'ari ovejahuan, shuj efa cutataca sujtapi chaupishpa, shuj mirgata cungui. Shinallataj tucuimanta yalli alli cutapi chapungapajca, shuj hin nishca medida aceiteta quimsapi chaupishpa shuj partetami cuna cangui. Huiñaipaj quillcachishcapi nishca shinami, Mandaj Dios ñucaman imalla cuna cashcataca cuna cangui.

¹⁵Cada tutamanta malta c'ari ovejatapish, granocunatapish, aceitetapish, Mandaj Dios ñucaman cushpa tucui rupachichuncuna nircami.

¹⁶“Mandaj Jatun Dios ñucatajmi cashna nini: Mandajca, pai charicushca allpamanta mirga allpata paipaj churicunaman cungachari. Chai mirga allpaca, paipaj churicunapajmi canga.

¹⁷Ashtahuanpish mandajca, pai charicushca allpamanta mirga allpata paita servijman cungachari. Chai mirga allpaca, servishpa causana huatacunata pajtachingacamallami chai servijpajca canga. Ña chai huatacunata pajtachishpaca, paipaj mandajllamantaj tigrachichunlla. Chai tigrachishca mirga allpataca, mandajpaj churicunallataj japichun.

¹⁸Mandajca, cai llajtapi causajcuna charishca allpacunataca ama quichuchun, pai charishca allpallamantataj mirga allpata paipaj churicunamanca cuchun. Chashna rurajpimi ñuca agllashcacunaca, shujllapish mana allpa illaj saquiringacuna. Shujllapish paicunapaj llajtamantaca mana llujshingacuna” nircami.

¹⁹Chai q'uipami ñucataca, yaicuna pungu c'uchupi tiyaj curacunapajlla nishca huasicunaman pusharca. Chai huasicunaca janaj ladomanmi punguta charirca. Chaipimi inti huashicun ladomanca, ashtahuan huashaman shujtaj ucuta ricurcani.

²⁰Chaimantaca ñucataca cashnami nirca: “Cai jatun ucupimi curacunaca, juchamanta Diosman imalla cuna cashcata cushcacunatapish, ima mapa illaj saquiringapaj cushcacunatapish yanungacuna. Imalla cuna cashcata cushcacunataca, ama huasi canllapi yanungapajmi chai ucupi yanungacuna. Canllaman yanushpaca, tucuicunatamari ñucapajlla ch'icanyachingacuna” nircami.

²¹Chai q'uipaca, huasi canllamanmi llujshichirca. Chaimantaca chai huasi canlla chuscundij esquinacunamanmi pusharca. Cada esquina c'uchupimi, pamba tiyashca carca.

²²Chai huasi canlla chuscundij esquina c'uchupi tiyaj pambacunaca, muyundijta pircashcami carca. Chai patiocunaca chuscundijmi largomanca, ishqui chunga shuj metrota charirca, anchomanca chunga pichca metro, canchis chunga pichca centimetrotami charirca.

²³Chai pambacunaca, chuscundij ladotami pircashca carca. Chai pirca muyundij ucupimi, ninapish tiyashca carca.

²⁴Chaita ricuchishca q'uipaca cashnami nirca: “Tucuicuna, Diosman imalla cuna cashcata cushcataca, cai huasipi imatapish rurashpa causajcunami cai tullpapi yanungacuna” nircami.