Read Chimborazo Highland Quichua DANIEL 10 Bible Online

DANIEL 10 - Chimborazo Highland Quichua bible

DANIEL 10

¹Persia llajtata jatun mandaj Ciro quimsa huatata ña mandacujpimi, Beltsasar nishca Danielmanca, Diosca chashnataj tucuna cashcata ricuchishpa huillarca. Chashnataj tucuna cashcaca mana entendipajmi carca. Shina cajpipish, Danielca pai ricushca imata nisha nishcata entendina yuyailla tucushpaca entendircami.

²Chai punllacunapica Daniel ñucaca, quimsa semanatami yallitaj llaquilla carcani.

³Ima sumaj micunatapish mana micurcanichu. Aichatapish, vinotapish shimillapipish mana churarcanichu. Quimsa semanacama, mishquijllata ashnacujhuanpish mana churarircanichu.

⁴Huata callari quillapaj ishqui chunga chuscu punllapimi ñucaca, Hidekel shuti jatun yacu uripi carcani.

⁵Chaipi cashpa huichilla ricushpaca, lino churanata churashca shuj runa shayacujtami ricurcani. Paica Ufaz llajta curimanta rurashca chumbihuan chumbillishcami carca.

⁶Paipaj cuerpoca, berilo shinami carca. Paipaj ñahuica relampa shina achij nicujmi carca. Paipaj ñahui luluncunaca nina sindi shinami carca. Paipaj rigracuna, paipaj chaquicunaca bronceta llambujllata rurashca shina achij nicujmi carca. Pai rimashcaca achcacuna jatunta bullacuj shinami uyarirca.

⁷Muscuipi shina ricunataca Daniel ñucallami ricurcani. Ñucahuan caj gentecunaca mana ricurcacunachu. Ashtahuanpish paicunaca jatun manchai japijpimi, callpashpa miticugrircacuna.

⁸Muscuipi shina jatun mancharinata ricunata ricungapajca ñucallami saquirircani. Ashtahuanpish alli fuerzayuj cashca cashpapish fuerza illajmi tucurcani. Tucuitaj fuerza illajmi tucurcani.

⁹Shina cashpapish pai rimashcataca uyarcanimi. Pai rimajta uyashpaca yallitaj dorminaihuan shina tucushpami pambaman urisinga urmarcani.

¹⁰Chaipica shuj maqui tuparishpa huichi alzajpimi cunguricunahuan maquicunahuan taunarishpa saquirircani.

¹¹Paica cashnami nirca: “Daniel yallitaj c'uyashca runa. Ñuca imalla rimashcata alli uyai. Jatarishpa shayari. Cunanca cambajmanmi ñucataca cacharca” nirca. Ñucahuan chashna rimacujpirajmi, ñucaca chujchushpa shayarircani.

¹²Paica ñucataca cashnami nirca: “Daniel, ama manchaichu. Pi mana yachai tucuipajcunata yachasha nishpa, cambaj Taita Diospaj ñaupajpi cumurij shungu tucushca punllamantami paica can mañashcata uyarca. Can mañashcamantami cambajman shamurcani.

¹³Ashtahuanpish Persia llajtata mandajmari, ishqui chunga shuj punllacunata ñucata jarcarca. Shina cajpipish angelcunata mandajcunapuramanta jatun mandaj Miguel shuti angelmi ñucata ayudanaman shamujpi, ñucaca Persia llajtata jatun mandajcunahuan chaipi saquirircani.

¹⁴Ñucaca, q'uipa punllacunapi cambaj llajtacuna imalla tucuna cashcatami huillaj shamurcani. Muscuipi shina can ricushcaca, chai punllacunapi chashna tucunami” nircami.

¹⁵Chai shimicunata ñucaman pai huillacujpica, ñucaca pambata ricushpami upa shina shayacurcani.

¹⁶Chashna shayacujpica, runaman rijchajmi ñuca shimipica, maquihuan tuparca. Chaimi ñucaca shimita pascashpa ñuca ñaupajpi cajtaca cashna nircani: “Ñuca amito, muscuipi shina ñucapi ricurijpimari yallitaj llaquirishpa fuerza illajlla tucuni.

¹⁷Ñuca amito, quiquin mandashcata ruraj ñucaca, fuerzapish illaj samaillapish mana llujshicujca ¿maitataj ñuca amo quiquinhuanca rimai tucushari?” nircanimi.

¹⁸Runaman rijchajca ñucapi cutinllataj tuparishpa ñucaman fuerzata cushpaca,

¹⁹cashnami nirca: “Canca yallitaj c'uyashcami cangui, ama manchaichu. Sumaj causaica canhuan cachun. Fuerzata japishpa sinchita shayari” nircami. Pai chashna rimacujpiraj fuerzata japishpami paitaca: “Cunanca ñami fuerzata curcangui, rimahuailla ñuca amito” nircani.

²⁰Shina nijpi paica cashnami nirca: ¿Cambajman ñuca imapaj shamushcata ñachu entendingui? Cunanca Persia llajtata mandajhuan macanacunamanmi tigrana cani. Paita mishajpica, Grecia llajtata mandajmi shamunga.

²¹Ashtahuanpish ñucaca mana llullaj shimicuna tiyacuj libropi quillcashcatami huillagrini. Paicunahuan ñuca macanacucujpica ñucataca pi mana ayudanchu. Israelcunata mandaj Miguel shuti angelmi ayudan.