Read Chimborazo Highland Quichua DANIEL 2 Bible Online

DANIEL 2 - Chimborazo Highland Quichua bible

DANIEL 2

¹Nabucodonosorca ña ishqui huatata mandacushpami, tauca muscuicunata charirca. Paica paipaj yuyaipi musparishpami mana dormi tucurca.

²Jatun mandajca, pai muscushca imata nisha nishcata huillachunmi jatun yachajcunata, luzerocunamanta yachajcunata, brujocunata, caldeocunatapish cayachirca. Tucui paicuna shamushpa paipaj ñaupajpi ña cajpimi,

³jatun mandajca paicunataca: — Ñucaca shuj muscuitami muscurcani. Chai muscui imata nisha nishcata yachasha nicushpalla ñuca yuyaica musparishcamari — nirca.

⁴Chaimi caldeocunaca jatun mandajtaca arameo rimaipi: — ¡Jatun mandaj, cambaj causaica huiñaita cashca cachun! Can muscushcataca cambajta ruraj ñucanchijman parlayari. Chai imata nisha nishcata ñucanchij huillangapaj — nircacuna.

⁵Chaimi jatun mandajca caldeocunataca cashna nirca: — Imallata muscushcataca mana yuyarinichu. Ashtahuanpish imata muscushcata, chai imata nisha nishcata mana huillajpica cancunataca ñutuchishami. Cancunapaj huasicunapish mapata shitana pambata rurashcami canga.

⁶Ashtahuanpish imata muscushcata, chai imata nisha nishcata huillajcunaca achca convidanacunata, alli nishca canata, jatun canapi churashca canatapishmi chasquinga. Shina cajpica, imata muscushcata chai imata nisha nishcata huillaichij — nircami.

⁷Adivinocunaca cutinllatajmi: — Jatun mandaj can muscushcataca cambajta rurajcunaman parlayari. Chai muscui imata nisha nishcata huillangapaj — nircacuna.

⁸Chaimi jatun mandajca cashna nirca: — Cancunaca ñuca imata rurasha nishcata uyashcamantami, imatapish llullashpa huillangapaj ñuca imata muscushcallatataj tapushpa huillashun nicunguichij. Chaitaca allimi yachani.

⁹Imata muscushcata mana huillajpica tucui cancunapajmi chai shinallataj llaqui tucuna tiyacun. Llullashpa huillangapaj yuyarinacucushpa, imapish mana alli shimicunata ñuca ñaupajpi rimaringapajmi yuyarinacucunguichij. Chaipajca punllacuna ima shinalla tucujtami shuyashpa uniyacunguichij. Ñuca imata muscushcata ña huillaichij. Chaita huillajpica, ñuca muscushca imata nisha nishcata huillanatapish crishami — nirca.

¹⁰Chaimi caldeocunaca, jatun mandajtaca: — Can jatun mandaj tapushca shinata adivinajcunaca tucui cai pachapi pi mana tiyanchu. Jatun yachajcunatapish, luzerocunamanta yachajcunatapish, caldeocunatapish pi jatun mandajpish, pi mandajpish, pi jatun amopish can jatun mandaj tapushca shinaca mana tapushcachu.

¹¹Jatun mandaj tapushcaca yallitaj sinchi mana cutichi tucuipajmari. Chaitaca jatun mandajmanca pi mana cutichingachu. Dioscunallamari chaitaca cutichi tucunga. Paicunapaj huasica manamari runacunapaj chaupipi tiyanchu — nircami.

¹²Chaimi jatun mandajca yallitaj jatunta p'iñarishpa Babiloniapi tiyaj tucui jatun yachajcunata huañuchichun mandarca.

¹³Jatun yachajcunata huañuchichun nishca mandashcataca tucui llajtacunaman cachashpami huillachirca. Danieltapish, paihuan cajcunatapish huañuchingapajmi mashcarcacuna.

¹⁴Jatun mandajta cuidaj soldadocunata mandaj Ariocca Babiloniapi caj jatun yachajcunata huañuchinamanmi llujshirca. Danielca paihuanca yachaisapa, sumaj shimicunahuan parlashpami,

¹⁵jatun mandajpaj soldadocunata mandaj Arioctaca: — Jatun mandajca ¿imamantataj cai mandashcataca utca tucuicunaman huillachicun? — nirca. Shina nijpimi, Ariocca imamanta chashna mandashcata Danielman yachaj chayachijpi,

¹⁶Danielca jatun mandajpajman yaicushpaca, jatun mandaj can muscushca imata nisha nishcata ñuca huillangapaj asha punllacunata cuhuai nishpa mañarca.

¹⁷Chai q'uipaca Danielca paipaj huasiman rishpami paihuan caj Ananiasmanpish, Misaelmanpish, Azariasmanpish ima tucucushcata huillarca.

¹⁸Pi mana yachaipaj cashcataca jahua pacha Taita Dios paicunata llaquishpa huillachichun nishpa mañachunmi chashna huillarca. Jatun mandaj tapushcata mana huillashpaca Danielpish, paihuan cajcunapish Babiloniapi tiyaj jatun yachajcunahuanmi huañuna carca.

¹⁹Pi mana yachashcataca Danielmanca tutami muscuipi shina ricuchishpa huillarca. Chaimi Danielca jahua pacha Taita Diostaca allimari cangui nishpaca,

²⁰cashna nirca: “Jahua pacha Taita Diospaj shutitaca huiñai huiñaita alli nishca cachun. Tucuita rurai tucuj canapish, yachaisapa canapish paipajmi.

²¹Huatacunatapish, punllacunatapish paimi shujtajyachin. Jatun mandajcunatapish paimi churan. Paimi anchuchin. Jatun yachajcunamanpish paimi yachaisapa canata cun. Alli yuyaiyujcunamanpish paimi yachaita cun.

²²Ucujman cajcunatapish, pacalla cajcunatapish paimi ricuchin. Amsapi cajtapish yachanmi. Luzca paipimi tiyan.

²³Ñuca yayacunapaj Taita Dios, quiquintami pagui nini, quiquintami alabani. Quiquinmari ñucamanca yachaitapish, fuerzatapish cuhuangui. Cunancarin ñucanchij mañashcatapish ricuchinguimi. Jatun mandaj imata muscushcata, chai imata nisha nishcatamari ricuchingui” nircami.

²⁴Chai q'uipaca Danielca, Babiloniapi tiyaj jatun yachajcunata huañuchichun jatun mandaj churashca Ariocpajman rishpami paitaca: — Babiloniapi tiyaj jatun yachajcunataca ama huañuchichu. Ashtahuanpish jatun mandajpajman ñucata pushai. Pai imata muscushcata, chai imata nisha nishcata huillangapaj — nirca.

²⁵Shina nijpimi Ariocca Danieltaca jatun mandajpajman utca pushashpa rishpa cashna nirca: — Judá llajtamanta prezu apamushcacunapuramantami, shuj runata japimuni. Paimi can jatun mandaj imata muscushcata, chai imata nisha nishcata huillanga — nirca.

²⁶Chaipimi jatun mandajca, Beltsasar nishca Danieltaca: — ¿Canca ñuca imata muscushcata, chai imata nisha nishcata huillai tucunguichu? — nirca.

²⁷Shina nijpimi, Danielca jatun mandajtaca cashna nirca: — Jatun mandaj can tapushcaca pi mana huillai tucuipajmi. Chaimi jatun yachajcunapish, luzerocunamanta yachajcunapish, brujocunapish, adivinocunapish can jatun mandajmanca mana huillai tucuncuna.

²⁸Shina cajpipish pi mana yachai tucuipajcunata ricuchij Taita Diosmi jahua pachapi tiyan. Paimari can jatun mandaj Nabucodonosormanca, q'uipa punllacuna imalla tucunata ricuchishca. Jatun mandaj cambaj camapi cashpa can muscushpa, muscuipi shina imallata ricushcaca caimi:

²⁹Jatun mandajlla, cambaj camapi cajpimi, q'uipa punllacuna ima tucunata yachana munai cambaj yuyaiman shamurca. Chaimi pi mana yachashca pacalla cajta ricuchij Diosca, q'uipa punllacuna ima tucunata ricuchirca.

³⁰Pi mana yachaipaj pacalla cajtaca ñucamanmi ricuchirca. Caitaca cai pachapi tucui causajcunata yalli jatun yachaj cashcamanta mana ricuchircachu. Ashtahuanpish can jatun mandaj muscushca imata nisha nishcata, can imata yuyacushcata canman entendichishpa huillachunllami ñucamanca ricuchirca.

³¹Jatun mandaj canca muscuipica, shuj jatun runaman rijchaj, cambaj ñaupajpi cajtami ricurcangui. Runaman rijchajca yallitaj jatun, jatun tucushca, achij nicujmi carca. Paica cambaj ñaupajpica manchananarucumi shayacurca.

³²Chai runaman rijchajca, umaca ashtahuan alli curimi carca. Pechohuan rigracunahuanca cullquimi carca. Huijsamanta sanpicunacamaca broncemi carca.

³³Changacunaca fierromi carca. Chaquicunaca mirgaca fierro, mirgaca lodomanta rurashpa cusashcami carca.

³⁴Chaita can ricucujpica, pi manapish p'aquijpi shuj rumi p'aquirishpa shamushpaca, chai runaman rijchajpaj chaquipi huajtashpa fierrotapish, lodomanta rurashpa cusashcatapish tucui ñuturca.

³⁵Chaimi fierropish, lodomanta rurashpa cusashcapish, broncepish, cullquipish, curipish tucui ñuturirca. Usya punllacunapi erapi trillashca ñutu t'amu shinami tucurca. Chaitaca huaira shamushpami, imata mana saquishpa tucuita aparca. Ashtahuanpish runaman rijchajta ñutuj rumica, tucui cai pacha junda jatun urcumi tucurca.

³⁶Can jatun mandaj muscushcaca chaimi. Chai imata nisha nishcatapish, can jatun mandajmanca cunanllatajmi huillagrini.

³⁷Jatun mandaj canca jatun mandajcunata jatun mandajmi cangui. Jahua pacha Taita Diosmi canmanca mandanatapish, imata rurai tucunatapish, fuerzatapish, jatun canatapish cushca.

³⁸Maipi cashpapish causaj gentecunata, tucui animalcunata, huairata purij pajarocunatapish Taita Diosmi cambaj maquipi churashca. Tucui chaicunata mandanataca canmanmi cushca. Chai curi umaca canllatajmari cangui.

³⁹Cambaj q'uipaca shujtaj mandajmi jataringa, paica mana can shina sinchi cangachu. Chaipaj q'uipa shamuj mandajca, bronce layami canga. Paica tucui cai pachatami mandanga.

⁴⁰Quimsapaj q'uipa shamuj mandajca, fierro shina sinchimi canga. Fierrohuan huajtashpa tucui imatapish ñutuj shinallatajmi, p'aquishpa tucuita ñutunga.

⁴¹Chaquicunatapish, dedocunatapishmi ricurcangui. Chaitaca ashaca mangata rurajcuna lodomanta rurashpa cusashcahuan cajta, ashaca fierrohuan rurashca cajtami ricurcangui. Chaica mandana ishquipi chaupirina cashcatami ricuchin. Fierrohuan, lodomanta rurashpa cusashcahuan chagruta ricushca shinallataj chai chaupirishca mandanapica fierro shina ashalla fuerzayuj mandajpishmi tiyanga.

⁴²Chaqui dedocunapish ashaca fierro, ashaca lodomanta rurashpa cusashcahuan cashcamanta chai mandanaca ashaca sinchi, ashaca urmanalla cashcatami ricuchin.

⁴³Fierrohuan, lodomanta rurashpa cusashcahuan chagruta can ricushcaca, mandajcunapura paicunapaj yuyaillamanta tandanacuna cashcatami ricuchin. Ashtahuanpish caishujmanta chaishujmanta mana shuj yuyailla tucungacunachu. Fierrohuan lodohuanca mana chagrurinchu. Chai shinallatajmi canga.

⁴⁴Chai jatun mandajcuna mandacui punllacunapimi, jahua pacha Taita Diosca nunca pi mana chingachina mandanata churanga. Chai mandanataca shujtaj llajtacuna mandachunca manataj saquingachu. Shujtaj mandanacunataca tucuitami ñutushpa chingachinga. Paica manataj chingaringachu.

⁴⁵Urcumanta manapish pi p'aquijpi shuj rumi p'aquirishpa shamushpa fierrotapish, broncetapish, lodomanta rurashpa cusashcatapish, cullquitapish, curitapish ñutujtami ricurcangui. Q'uipa punllacunapi chai shinallataj tucunatami Jatun Diosca can jatun mandajmanca ricuchishca. Can muscushcaca chashnatajmi. Chai imata nisha nishcapish chashnatajmi — nircami.

⁴⁶Shina nijpica, jatun mandaj Nabucodonosorca Danielpaj ñaupajpi pambaman tupajta cumurishpami alli nirca. Chaimantaca convidanacunata cushpa Danielpaj ñaupajpi inciensota rupachichunmi mandarca.

⁴⁷Jatun mandajca, Danieltaca: — Cancunapaj Taita Diosca, tucui dioscunapaj Taita Diostajmi, jatun mandajcunapajpish Jatun Mandajmi. Pi mana yachaipaj pacalla cajtapish ricuchijmi. Chaimi pi mana yachaipaj pacalla cajtaca ñucaman huillangui — nircami.

⁴⁸Shina nishpami jatun mandajca, Danieltaca jatunyachirca. Jatun canapi churashpami achca convidanacunatapish curca. Tucui Babilonia llajtata mandachun, Babilonia llajtapi tiyaj tucui jatun yachajcunata mandachunpishmi churarca.

⁴⁹Danielca paihuan purij Sadrac, Mesac, Abed-nego nishca quimsa runatapish Babilonia llajtata ñaupajman pushanata mandajcuna cachun churangapajmi jatun mandajta mañarca. Danielca, jatun mandaj tiyacun ucupimi caj carca.