Read Chimborazo Highland Quichua DANIEL 7 Bible Online

DANIEL 7 - Chimborazo Highland Quichua bible

DANIEL 7

¹Jatun mandaj Belsasar Babilonia llajtata mandai callari huatami Danielca paipaj camapi cashpa muscuipi ricuchishcata ricurca. Rijcharishpaca chaitaca huillana cashcallatami quillcarca.

²Danielca cashnami nirca: Shuj tutami ñucaca muscuipi shina ricushpaca, jahua pacha chuscundij lado huaira mama cuchata manchanayajta cuyuchicujta ricurcani.

³Mama cuchamantaca shujtaj shujtajman rijchaj chuscu jatun animalcuna llujshijtami ricurcani.

⁴Punta animalca leonman rijchajmi carca. Chaica aguilapaj alasyujmi carca. Ñuca ricucujllapitajmi, paipaj alasta p'itishpa paitaca pambamanta jatarichirca. Paica shuj runa shinami ishqui chaquihuan shayarirca. Paipaj yuyaitaca gentepaj yuyai shinatami rurarca.

⁵Chaipaj q'uipa llujshij animaltaca osoman rijchajtami ricurcani. Paipaj shuj lado costillasca, caishuj ladota yalli alzashcami carca. Paipaj shimipica, quimsa costillatami quirucunahuan canishpa charicurca. Paitaca: Jatari, achca aichata millpugri nircami.

⁶Ishquipaj q'uipa llujshij animaltaca, leopardoman rijchajtami ricurcani. Paipaj huashapica chuscu alastami charirca. Chai animalca chuscu umayujmi carca. Paimanca mandai tucunatami curca.

⁷Muscuipi shina ricucui tutallatajmi quimsapaj q'uipaca shujtaj animal llujshijta ricurcani. Chaica manchanana, yallitaj jatun, yallitaj fuerzayujmi carca. Paica jatun fierro quirucunatami charirca. Chaihuanmi tucuita ñutushpa millpurca. Puchushcacunataca paipaj chaquicunahuanmi sarurca. Chai animalca ñaupaman ricushca animalcunamanca maijanman mana rijchajchu carca. Chunga gachucunayujmi carca.

⁸Chai animalpaj gachucunata ñuca ricucujpica, gachucuna chaupimantaca shuj uchilla gachumi huiñarca. Chai gachupaj ñaupajmantaca ñaupaman tiyashca quimsa gachucunatami anchuchirca. Chai gachuca gentepaj ñahui shinatami charirca. Yallitaj millaita rimaj shimiyujmi carca.

⁹Ñuca ricucujllapitajmi jatun tiyanacunata churarca. Chai tiyanapica, uni huatacunayuj Yuyajmi tiyarirca. Paipaj churanaca rasu shina yuraj nicujmi carca. Paipaj uma ajchapish yuraj nicuj millma shinami carca. Paipaj jatun tiyanaca, lunyacuj ninami carca. Chai tiyanapaj ruedacunapish, nina lunyacujllatajmi carca.

¹⁰Paipaj ñaupajmantaca, ninami jatun yacu shina llujshicurca. Paipajtaca huaranga, huarangacunami ruracurca. Paipaj ñaupajpica yallitaj huaranga huarangacunami carca. Juez tiyarijpica, librocunaca pascashcami carca.

¹¹Chai gachu sinchita caparishpa yallitaj millaita rimacujta uyashpami, ñucaca tigralla ricucurcani. Chaita ricucujpica, chai manchanana animaltaca huañuchircami. Paipaj cuerpotaca tucui ñutushpami, ninapi rupachichun curca.

¹²Caishuj animalcunatapish paicunaman imallata cushcataca quichurcami. Shina cashpapish asha punllacunacama causaihuan saquircarajmi.

¹³Muscuipi shina ricucui tutallatajmi, jahua pacha p'uyupi Runa Aichayujman rijchaj shamucujta ricurcani. Uni huatacunayuj Yuyajpajman shamucujtami ricurcani. Paitaca uni huatayujpaj ñaupajmanmi c'uchuyachirca.

¹⁴Paimanca mandai tucunata, jatun nishca canata, mandanatami curca. Tucui gentecuna, llajtacuna, ch'ican ch'ican rimaita rimajcuna paipajta rurachunmi chashna rurarca. Pai mandaj canaca huiñaita mandaj canami. Manataj tucuringachu. Pai mandanallatami pi mana chingachishca canga.

¹⁵Daniel ñucaca chaicunata muscuipi shina ricushpaca, tullu ñutcu mancharishpami, ñuca yuyaica musparircani.

¹⁶Chaimi chaipi shayacujcunamanta shujpajman c'uchuyashpaca, tucui chaicuna imata nisha nishcata alli huillachun tapurcani. Paica ñucahuan parlashpami, tucui chaicuna imata nisha nishcataca cashna nirca:

¹⁷Cai chuscu jatun animalcunaca, allpa pachapi chuscu jatun mandajcuna jatarinatami ricuchin.

¹⁸Chaicunapaj q'uipaca, jahua pacha Taita Diospaj jucha illajcunami mandanata chasquingacuna. Mandanata paicuna japishpaca, huiñai huiñaitami mandangacuna nircami.

¹⁹Ñucaca quimsapaj q'uipa ricushca animal imamanta chashna cashcata alli yachasha nishpapishmi tapurcani. Chai animalca, caishuj quimsa animalcunamanca maijanmanpish mana rijchaj, manchanana, yallitaj jatun, fierro quirucunayuj, bronce sillucunayujmi carca. Paica tucuicunata ñutushpami millpurca. Puchushcataca paipaj chaquicunahuanmi sarurca.

²⁰Paipaj umapi tiyaj chunga gachucunapish, gachucunapaj chaupimanta shuj uchilla gachu huiñashcapish, chai gachupaj ñaupajmanta quimsa gachucunata anchuchishcapish imata nisha nishcatapishmi tapurcani. Chai gachuca gentepaj ñahui shinatami charirca. Yallitaj millaita rimaj shimiyujmi carca. Chai gachuca tucui caishuj gachucunata yalli jatunmi ricurirca.

²¹Chai gachuca, Diospajlla cajcunahuan macanacushpa, pai mishacujlla cajtami ricurcani.

²²Shina cajpipish uni huatacunayuj Yuyaj shamushpami jahua pacha Diospaj jucha illajlla cajcunata mitsashpa paicunapaj allita rurarca. Jucha illajcunaca paicuna mandana punlla pajtajpimi, mandanata chasquirca.

²³Tucui chaita tapujpica cashnami nirca: “Quimsapaj q'uipa ricurishca animalca, cai pachapi quimsa jatun mandanacunapaj q'uipa, shujtaj mandana tiyana cashcatami ricuchin. Chai mandanaca shujtaj mandanacunamanta shujtaj shinami canga. Tucui cai pachapi ima tiyajtami trillashpa, mirga mirgata rurashpa, chingachinga.

²⁴Chunga gachucunaca, chai mandanamanta chunga jatun mandajcuna jatarinatami ricuchin. Paicunapaj q'uipaca, shujtaj jatun mandajmi jataringa. Paica ñaupaman mandacujcunamanta shujtaj shinami canga. Quimsa jatun mandajcunatami urmachinga.

²⁵Jahua pacha Taita Diostapish p'iñashpami millai shimicunata rimanga. Jahua pacha Taita Diospaj jucha illajcunatapish llaquichingami. Huatacunatapish, mandashcacunatapish shujtajyachinatami yuyanga. Diospajlla cajcunaca quimsa huata chaupicamami paipaj maquipi churashca canga.

²⁶Shina cajpipish cashcata ruraj Juez tiyarishpami, pai mandanataca quichunga. Pai mandanataca tucuitami ñutunga. Huiñaipajmi chingachinga.

²⁷Chashna rurashpaca mandanatapish, mandaj canatapish, achca llajtacuna tandanacushca mandanacunatapish, cai pachapi tucui cajcunataca jahua pacha Taita Diospaj jucha illajcunamanmi cunga. Chai mandanaca huiñaita mandanami canga. Chaipica tucui mandacujcunami pai mandashcallata ruracungacuna” nircami.

²⁸Pai huillashca shimicunaca chaicunami. Daniel ñuca, chaita uyashpaca ñuca yuyaipica yallitaj musparishpami, ñuca ñahuipish shujtajyarcani. Shina cashpapish tucui chaicunataca ñuca shungupimi huaquichircani.