Read Chimborazo Highland Quichua OSEAS 11 Bible Online

OSEAS 11 - Chimborazo Highland Quichua bible

OSEAS 11

¹Israelcunataca huahuaraj cajpimi c'uyarcani. Egiptomantami ñuca churitaca cayarcani.

²Ñuca cayajpirajmari paicunaca ashtahuan ñucamanta caruyarcacuna. Baalcunamanmi animalcunata huañuchishpa curcacuna. Rurashcalla dioscunamanmi inciensota rupachircacuna.

³Chashna cajpipish, Efraintaca ñucami purinata yachachircani. Maquimanta aisashpami, yachachircani. Ashtahuanpish paicunaca ñuca cuidacushcataca mana entendircacunachu.

⁴Ñucaca paicunataca c'uyaihuanmi huascahuan huataj shina pushamurcani. Ñucaca paicunapaj cungamanta yugota anchuchijmi cani. Micunatapish paicunapaj ñaupajpimi churarcani.

⁵Paicunaca Egiptomanca mana tigrangacunachu. Ashtahuanpish asiriocunami paicunapaj jatun mandajca canga. Ñucapajman mana cutirishun nishcamantami chashna tucunga.

⁶Paicunapaj pueblocunapica espadami urmanga. Muyundij llajtacunandijmi tucuchinga. Paicunallataj mana allita ruranata yuyarinacushpa rurashcamantami chashna tucunga.

⁷Ñuca agllashcacunaca ñucata c'ariyanapimi rumi shungu tucushcacuna. Ñucataca: “Jahua pacha Taita Dios” nishpapish, pi mana jatunyachinatatajca munancunachu.

⁸Efraín ¿maitataj cantaca saquishari? Israel cantaca shujtajcunapaj maquipica mana churai tucunichu. Cancunataca Adma pueblota shinapish mana llaquichi tucunichu. Zeboim pueblota shinapish mana llaquichi tucunichu. Cancunataca ñuca shungu rupajyashpamari jatun c'uyaihuan c'uyanayanlla.

⁹Nina sindirij shina p'iñarishpa ñuca llaquichinahuanca mana llaquichishachu. Efrainta llaquichinamanca mana tigramushachu. Ñucaca Taita Diosmi cani, mana runachu cani. Cancunapaj chaupipi caj jucha illajmi cani. Cancunata chingachingapajca mana yaicushachu.

¹⁰Paicunaca Mandaj Dios yuyaillami paita catingacuna. Taita Dios rimashcaca león huacacuj shinami uyaringa. Pai chashna rimashcata uyashpami, paipaj huahuacunaca inti huashicun llajtacunamanta manchaihuan shamungacuna.

¹¹“Egiptomantaca pájaro shinami utca tandanacungacuna. Asiriamantaca paloma shinami tandanacungacuna. Ñucaca paicunataca, quiquin huasipi causachunmi churasha” ninmi Mandaj Diosca.

¹²Efrainca ñuca ñaupajpica llullahuan jundami. Israelca umanahuan jundami. Judaca Taita Dioshuan mandacushca cashca cashpapish paimanta carupimi. Ashtahuanpish jucha illajcunandijmari rurashcalla dioscunapi shunguta churancuna.