Read Chimborazo Highland Quichua OSEAS 12 Bible Online

OSEAS 12 - Chimborazo Highland Quichua bible

OSEAS 12

¹Efrainca huaira michishcami purin. Inti llujshin ladomanta shamuj huairata catinatami mana shaicun. Paicunaca llullana, yallitaj millaita ruranallatami mirachincuna. Asiriacunahuanmi ari ninacun. Aceitetaca Egiptomanmi apan.

²Mandaj Diosca, judacunata llaquingapajmi allichicun. Jacobpaj huahua huahuacunata paicuna ima shina rurashca shina llaquichingapajmi allichicun. Paicuna ima shina rurashca shinallatajmi paganga.

³Mamapaj huijsamantaca paipaj huauquipaj chaqui talonpi charirashcami huacharirca. Angeltapish paipaj fuerzahuanmi misharca.

⁴Angelhuanca macanacushpami misharca. Paica huacashpami: “Ayudahuai” nishpa rogarirca. Jacobca Taita Dioshuanca Bet-elpimi tuparca. Chaipimi ñucanchijmantaca huillarca.

⁵Mandaj Diosca, tucuita Mandaj Diosmari. ¡Paipaj shutica Mandaj Diosmi!

⁶Canca cambaj Taita Diospajman cutiri. Llaquij, cashcata ruraj tucuyari. Cambaj Taita Diospi punllanta shunguta churayari.

⁷Cananeocunaca mana alli pizaj balanzatami paicunapaj maquipi charincuna. Paicunaca umashpa shuhuanallatami munancuna.

⁸Efrainca cashnami nin: “Ñucaca achcata charijmi tucushcani. Achca valij charinacunayujmi tucushcani. Ñucataca mana allitamari rurashcangui nishpaca pi mana juchachingachu. Ñuca ima rurashcacunapipish, ima juchata mana japingacunachu” nircami.

⁹Ñucaca Egiptomanta llujshichimui pachamanta Mandaj cancunapaj Taita Diosmi cani. Carpa huasicunata shayachishpa fiestata rurai punllacunapi shinami cancunataca carpa huasicunapi causachun cutinllataj churasha.

¹⁰Profetacunata huillachishpami imalla tucuna cashcataca achcata huillarcani. Profetacunataca yuyachij parlocunahuanmi huillachircani.

¹¹Galaadcunaca yallitaj millaicunami. Yallitaj yangacunami tucurcacuna. Gilgalpica huagracunata huañuchishpami rurashcalla dioscunaman curcacuna. Paicunapaj altarcunaca, yapushca pambacunapi rumi montoncuna shinami.

¹²Jacobca Arammanmi miticushpa rirca. Israelca chai llajta huarmita paipaj huarmi cachun japingapajmi paipajta rurashpa causarca. Shuj huarmita paipaj huarmi cachun munashcamantami ovejacunata michishpa causarca.

¹³Mandaj Diosca, paipaj profetahuanmi israelcunataca Egiptomanta llujshichirca. Paipaj profetahuanmi punllanta pushamurca.

¹⁴Efrainca yallitaj millaita rurashpami Taita Diostaca yallitaj llaquichirca. Paicuna yahuarta jichashcamantaca chaitaca Jatun Diosca paicunapaj jahuallamantajmi tigrachinga. Paicuna ima shina millaita rurashca shinallatajmi paganga.