Read Chimborazo Highland Quichua OSEAS 4 Bible Online

OSEAS 4 - Chimborazo Highland Quichua bible

OSEAS 4

¹Israelcuna, Mandaj Dios rimashcata uyaichij. Mandaj Diosca cai llajtapi causajcunataca p'iñarishpami rimacun. Cai llajtapica cashcata rurajcunapish, llaquijcunapish, Diosta rijsijcunapish mana tiyanchu.

²Ashtahuanpish ari nishcata mana pajtachina, llullana, huañuchina, shuhuana, huainayanami tiyan. Caishuj chaishuj huañuchinacunami tiyan.

³Chaimantami cai llajtaca achca jatun llaquilla canga. Cai llajtapi causajcunaca tucuicunami fuerza illajlla tucungacuna. Sacha animalcuna, huairata purij alasyuj animalcunaca huañungami. Mama cuchapi causaj chalhuacunacamami huañunga.

⁴¡Cancunaca maijan mana cunanacuipajmari canguichij! Tucui cambaj cajcunaca curata juchachina yuyaillamari.

⁵Chaimanta canca achij punllapimi ñitcaringui. Tutapica profetandijmi ñitcaringui. Cambaj mamataca chingachishami.

⁶Ñuca agllashcacunaca yachai illaj cashcamantami chingachishca carcacuna. Ashtahuanpish cantaca yachaita yanganchishcamantami ñucapajta ruraj cura canamantaca anchuchisha. Cambaj Taita Dios mandashcatamari cungarircangui. Ñucapish cambaj huahuacunataca cungarishami.

⁷Curacuna ashtahuan mirarijpica ashtahuanmari juchallincuna. Chaimantami ñucapish paicunata alli ninapaj randica pingaichisha.

⁸Curacunaca ñuca agllashcacuna juchallishcamanta cushcacunatami micuncuna. Chaimanta ñuca agllashcacuna ashtahuan juchallichunmi yuyancuna.

⁹Curacunatapish, ñuca agllashcacunatapish paicuna ima shinami juchallirca chai shinallatajmi rurasha. Paicuna imata rurashca shinallatajmi pagasha.

¹⁰Micungacunami, huijsa jundataca mana micungacunachu. Huainayangacunami, mana miraringacunachu. Mandaj Diospajta ruranata saquishcamantami chashna tucungacuna.

¹¹Huainayana, vinota ubyana, llullu vinota ubyana yuyaimi alli yuyaitaca anchuchin.

¹²Ñuca agllashcacunaca, paicunapaj caspi diostami imatapish tapuncuna. Paicunamanca caspimi imatapish cutichin. Paicunataca huainayana yuyailla canami pandachirca. Yallitaj aicha munaita mana jarcari tucushpami Taita Diosmantaca anchurircacuna.

¹³Urcucuna puntapimi, animalcunata huañuchishpa cuncuna. Lomacunapimi inciensota rupachincuna. Encina yuracuna, álamo yuracuna, olmo yuracuna ucupi maipimi sumaj llandujlla caj ucupimi inciensota rupachincuna. Chaimi cancunapaj ushushicunaca huainayajcuna tucuncuna. Cancunapaj nueracunaca huainayancuna.

¹⁴Chaimanta cancunapaj ushushicuna huainayajcuna tucujpipish, cancunapaj nueracuna huainayajpipish paicunataca mana llaquichishachu. Huainayashcahuan causaj huarmicunahuan, millai huarmicunahuan tucushpa animalta huañuchishpa shujtaj dioscunaman cushcamantaca cancunallatajmi chingaringuichij. Chashnami mana entendij gentecunaca paicunallataj chingaringacuna.

¹⁵Rurashcalla dioscunahuan israelcuna chashna huainayajpipish, Judaca ama chashna juchallichun. ¡Cancunaca Gilgalmanca ama yaicuichijchu. Bet-avenmanca ama huichiyaichijchu! Imata pajtachishatajmi nicushpapish Mandaj Diosca causacunmi ama nichijchu.

¹⁶Israelcunaca quita vaquilla shinami caruyarcacuna. Chashna cajpica ¿Mandaj Diosca paicunataca malta ovejacunata shina ancho pambapi michingachari?

¹⁷Efrainca rurashcalla dioscunamanmi curishca. ¡Paitaca saquichijlla!

¹⁸Paicunapaj ubyanaca mana pingashpa millaita ruranamanmi chayachirca. Huainayanataca mana shaicurcacunachu. Paicunata mandajcunapish, pingachishca canatami c'uyarcacuna.

¹⁹¡Paicunataca huairami paipaj alaspi apanga. Rurashcalla dioscunaman animalcunata huañuchishpa cushcamantaca pingaimi tucungacuna!