Read Chimborazo Highland Quichua OSEAS 5 Bible Online

OSEAS 5 - Chimborazo Highland Quichua bible

OSEAS 5

¹Curacuna, caita uyaichij. Israelcuna, alli uyaichij. Mandana huasipi causaj mandajcuna uyaichij. Mizpa pueblopica, lazyana angu shinami carcanguichij. Tabor urcupica, urmachinapaj linchita tendishca shinami carcanguichij. Cancunapajmanca jatun llaquimi shamugrin.

²Ñuca agllashcacunataca huañuchishpamari ucujta shitashcacuna. Chaimantaca tucui paicunatami llaquichisha.

³Efraín ñucaca can ima shina cashcataca rijsinimi. Israel can ima shina cashcatapish rijsinimi. Efraín, canca huainayashcanguimi. Chaimi Israelca mapayashca.

⁴Paicunapaj Taita Diospajman cutirinataca mana yuyancunachu. Paicunapurapica huainayachij espiritumi tiyan. Chaimi Mandaj Dios, Diostaj cashcataca mana entendincuna.

⁵Israelcuna jatun tucushcaca paicuna ima shina cashcatami ricuchinga. Israelcuna, Efraincunaca paicunapaj juchallapitajmi ñitcaringa. Judapish paicunahuanmi ñitcaringa.

⁶Paicunapaj ovejacunata, vacacunata apashcami Mandaj Diosta mashcashpa puringacuna. ¡Mandaj Diosca paicunamanta anchurishcamanta mana japingacunachu!

⁷Mandaj Diostaca c'ariyashpami llaquichishcacuna. Huahuacunatapish shujtaj dioscunapaj huahuacuna cachunmi saquishca. Chashna cashcamanta cunanca paicunatapish, paicunapaj allpacunatapish shuj quillallapimi tucuita chingachishca canga.

⁸¡Gabaa pueblopica, bocinapi tocaichigari. Ramá pueblopica, trompetapi tocaichigari! ¡Bet-avén pueblopica, sinchita caparichigari! ¡Benjamín manchaihuan chaparayari!

⁹Efrainca llaquichi punllapimi tucui chingachishca canga. Tucui chaicuna tucunataca Israel aillucunapurapimi huillarcani.

¹⁰Judá llajtapi mandajcunapish, lindecunata pasaj shinami juchallishcacuna. ¡Ashtahuanpish paicunapaj jahuapica, ñuca p'iñaritami yacuta shina tallisha!

¹¹Efrainca llaquichishcamari tucushca. Maipish cachun llaquichishcamari tucushca. Paicunallataj manapish dioscunata adorashcamantami chashna rurashca tucunga.

¹²Chaimanta ñucaca Efrainpajca, polilla shinami casha. Judapajca, ismuchij caracha shinami casha.

¹³Efrainca polilla ungüihuan cashcata ricushpa, Judaca carachahuan cashcata ricushpami Efrainca Asiriaman ringa. Chaipica chai llajtata jatun mandajtami ayudata mañanga. Ashtahuanpish chai jatun mandajca polilla ungüitaca mana alliyachingachu. Caracha ungüitaca mana jambingachu.

¹⁴Efrainpajca ñucaca jatun león shinami casha. Judapajca huahua león shinami casha. Paicunataca ñucatajmi mirga mirgata rurasha. Chai q'uipaca rishallami. Paicunata chashna ruracujpica, pi mana quishpichi tucungachu.

¹⁵“Paicuna juchallishcata, ñucaca juchallishcanimari nishpa ñucata mashcangacamami ñucaca ñuca causacunman tigrasha. ¡Paicuna llaquihuan cashpami, ñucataca mashcangacuna!” nircami.