Read Chimborazo Highland Quichua JOEL 2 Bible Online

JOEL 2 - Chimborazo Highland Quichua bible

JOEL 2

¹Sión urcupica, trompetapi tocaichigari. Ñucapajlla urcupica, caparichigari. Cai llajtapi causajcuna, tucuicuna chujchuichigari. Mandaj Dios shamuna punllaca ñamari pajtamucun, ñamari quichquiyamucun.

²Chai punllaca, manchanana amsa tutami tucunga. Chai punllaca, p'uyu llandu punllami tucunga. Tutamanta utcata urcu jahuacunapi inti shitashpa achijyachicuj shinami, c'ari c'ari achca runacuna shamunga. Paicuna shinaca pi mana tiyarcachu. Paicuna shamushca q'uipapish, q'uipa huahua huahuacuna causai huatacunapica pi mana paicuna shina tiyangachu.

³Paicuna manaraj chayamujpimi, ninaca tucuita rupachishpa tucuchinga. Paicuna rishca q'uipapish, ninallatajmi tucui ima tiyajta rupachinga. Paicuna chayamunapajca, cai llajtaca, Edén huerta shinami canga. Paicuna rishca q'uipaca, shitashca pamba shinami llaquinayaj saquiringa. Paicunapaj maquimantaca, pipish mana quishpiri tucungachu.

⁴Paicunaca caballocuna shinami canga. Caballopi tiyarishpa callpacuj shinapishmi callpanga.

⁵Paicunaca macanacuna carretacuna c'ulun nishpa puricuj shinami, urcu jahuacunapica saltangacuna. Chaquishca p'angacuna ninapi rupacuj shinami uyaringa. Paica, jatun macanacuiman rinalla, c'ari c'ari soldadocuna shinami canga.

⁶Paipaj ñaupajpica, tucuicunami manchangacuna. Ñahuicunapish, quillu quillumi tucungacuna.

⁷C'ari c'ari soldadocuna shinami callpangacuna. Alli macanacuj soldadocuna shinami, pirca jahuaman huichiyangacuna. Tucuicunami shuj ñanllata ringacuna, mana caita chaita puringacunachu.

⁸Mai ladomanpish caishuj chaishuj mana quichquirinacushpami, tucuicuna quiquin ñanllata ringallacuna. Espadapi urmashpapish, manataj chugriringacunachu.

⁹Puebloman chayashpaca, pata jahuatami callpangacuna. Huasicunaman huichiyashpaca, shuhua shinami ventanacunata yaicungacuna.

¹⁰Paicunata ricushpaca cai pachapish, jahua pachapish chujchungami, intipish, lunapish amsayangami, luzerocunapish ña mana achijyachingachu.

¹¹Mandaj Diosca paipaj soldadocunatami mandanga. Paipaj soldadocunaca yallitaj achcacunami. Pai mandashcata rurajcunaca, yallitaj c'ari c'aricunami. Mandaj Dios shamuna punllaca, jatun mancharina punllamari. Chai jatun llaquicunataca ¿pitaj apai tucungari?

¹²Mandaj Diosca cashnami nin: “Chaimanta cunanca ayunashpa huacashpa, llaquirishpa tucui shunguhuan ñucapajman cutirichij.

¹³Ama churanataraj lliquirichijchu, ashtahuanpish cancunapaj shungupi llaquirichigari. Cancunata Mandaj Diospajman cutirichigari. Paica llaquishpa cashcata rurajmari, mana utca p'iñarij, jatunta llaquijmari, llaquichisha nishpapish, llaquishpa jarcarijmi.

¹⁴Cancunata llaquishcamanta mana llaquichishpa, ashtahuanpish achca allicunata cuna cashcatapish ¿pitaj yachanguichigari? Taita Dios allicunata cushcamanta, paillamantaj imalla cuna cashcatapish, tallina vinotapish cunami canguichij.

¹⁵Sión urcupica, trompetapi tocaichigari. Ayunangapaj tandanacuchun, tucuicunaman huillaichigari.

¹⁶Cunaj yuyajcunatapish, huambracunatapish, chuchucuj huahuacunatapish, cunanlla casarashcacunatapish paicunapaj causana huasimanta llujshichishpa tucuicunata tandachishpa, Diospajlla tandanacuita ruraichij.

¹⁷Mandaj Diospajta ruraj curacunalla, cancunaca pungu ucuman yaicushpa, altarhuan chaupipi shayarishpa huacashpa: Mandaj Dioslla, cambajlla agllashcacunataca perdonahuayari. Cambajlla cachun can japishcacunataca, p'iñajcunaman ama cuhuangui. Paicunataca shujtaj llajtapi causajcuna mandachunpish ama saquihuangui ninguichij. Shujtajcunaca: ¿Maipitaj paicunapaj Diosca? ningacunami” ninmi.

¹⁸Shina nijpimi Mandaj Diosca, paipaj llajtamanca achca c'uyaita ricuchishpa, pai agllashcacunataca perdonanga.

¹⁹Mandaj Diosca pai agllashcacunamanca cashnami cutichinga: “Riquichij, ñucaca cancunamanca micunatapish, llullu vinotapish, aceitetapish pajtatami caragrini. Cancunata p'iñaj llajtacuna llaquichichunpish manataj saquishachu.

²⁰Cancunata llaquichijcuna janaj ladomanta shamucujpica, carcushpami cachasha. Paicunataca chaquishca, shitashca pambapimi churasha. Ñaupashpa rijcunataca inti llujshin lado mama cuchapimi shitasha. Huashata catishpa rijcunataca inti huashicun lado mama cuchapimi shitasha. Chai huañushcacunapaj aicha ismushpaca, achcatami ashnanga. Jatun llaquicunata rurashcamantami, chashna rurasha” ninmi.

²¹Chaimanta cai llajtapi causajcunalla, ama imata manchaichijchu, achcata cushicuichigari. Mandaj Diosca jatun mancharinacunatamari ruranga.

²²Sachapi causaj animalcunapish, ama manchaichijchu. Cancuna micuchunca, shitashca pambacunapi q'uihuacunaca cutinmi huiñanga. Yuracunapipish cutinllatajmi p'ucunga. Higocunapish, uvacunapish achcatami p'ucunga.

²³Siónpi causajcunalla, cancunata Mandaj Taita Dioshuan cushicuichigari. Cancunamanca punta tamyataca tamyana punllallatajmi curca. Paimari punta tamyatapish, q'uipa tamyatapish ñaupaman cachashca shinallataj cancunamanca cachanga.

²⁴Chaimantami trigotaca, erapi yallitaj parvanguichij. Vinotapish, aceitetapish yallitajmi charinguichij.

²⁵Oruga c'urucunapish, p'ichachaucunapish, revoltón c'urucunapish, langosta c'urucunapish ñuca soldadocuna cajpimi, cancunata llaquichichun cacharcani. Paicunami tucui granocunata micushpa tucuchirca. Paicuna micushcamantaca, cancunamanca yallitami cutichisha.

²⁶Cancunaca chai granocunataca mana nijtami micunguichij. Cancunaman achca allicunata cuj, Mandaj Taita Dios ñucatami: Sumajmari cangui ninguichij. Cunanmantapacha ñuca agllashcacunaca, ña mana cutin pingachishca canguichijchu.

²⁷Chaipimi can israelcunaca cancunahuan ñuca cashcata yachanguichij. Ñucaca cancunata Mandaj Taita Diosmi cani, pi shujtajca mana tiyanchu. Ñuca agllashcacunaca cunanmantapacha ña mana cutin pingachishca cangacunachu.

²⁸Cai tucuita rurashca q'uipaca, ñuca Espiritutaca tucuicunapimi churasha. Chashna churajpimi cancunapaj churicunapish, ushushicunapish ñucamanta huillangacuna. Cancunata cunaj yuyajcunapish muscungacunami. Q'uipa huiñaicunapish ñuca ricuchishcatami, muscuipi shina ricungacuna.

²⁹Shinallataj chai punllacunapica servij c'aricunamanpish, huarmicunamanpish ñuca Espiritutami churasha.

³⁰Jahua pachapipish, cai pachapipish jatun mancharinacunatami ricuchisha. Yahuarta, ninata, achca cushnitapishmi ricuchisha.

³¹Mandaj Dios agllashca jatun mancharina punlla manaraj chayamujpica, intica amsayanga, lunapish yahuarmi tucunga.

³²Mandaj Diosta mañajcunallami quishpiringacuna. Mandaj Dios nishca shinallatajmi Sión urcupi, Jerusalenpica quishpirina tiyanga. Chaipica israelcunapuramantaca, Mandaj Dios cayashcacunallami saquiringacuna.