Read Chimborazo Highland Quichua JOEL 3 Bible Online

JOEL 3 - Chimborazo Highland Quichua bible

JOEL 3

¹Riquichij, chai punllacunapica Judá llajtamanta, Jerusalén pueblomanta prezu apashcacunataca tigrachimushami.

²Tucui shujtaj llajtacunapi causajcunata tandachishpaca, Josafat pugru pambamanmi uriyachisha. Chaipimi ñuca agllashcacunata llaquichishpa causajcunataca llaquichisha. Paicunami ñucapajlla cachun agllashca israelcunataca, tucui llajtacunaman caita chaita cacharcacuna. Chashnami ñuca llajtataca chaupircacuna.

³Israelcunataca suerteta rurashpami, caishuj chaishuj chaupinacurcacuna. Paicunapaj churicunataca, shuj huainayaj huarmipimi c'aturcacuna. Ushushicunataca vino vasopimi c'aturcacuna, chaitami ubyarcacuna.

⁴Tiro pueblolla, Sidón pueblolla, Filistea llajtalla, ñucaca cancunataca ¿imatataj rurashcaniyari? ¿Ñucatachu llaquichisha yuyanguichij imamí? Chashna yuyashcamantaca, ñallami cancuna japina cashcataca cugrini.

⁵Cancunaca ñuca cullquitapish, ñuca curitapish, ima shujtaj sumaj charinacunatapish quichushpami, cancunapaj rurashcalla dioscunapaj huasicunaman aparcanguichij.

⁶Cancunaca Judá llajtapi causajcunapaj, Jerusalenpi causajcunapaj churicunatapish griegocunaman c'atushpa cachashpami, paicunapaj quiquin llajtamantaca caruta cacharcanguichij.

⁷Paicunata maiman c'atushpa cachashca cajpipish, tigrachimushami. Ashtahuanpish cancuna millaita rurashcamantaca, ñallami japina cashcata cugrini.

⁸Cancunapaj churicunatapish, ushushicunatapish Judá llajtapi causajcunamanmi c'atusha. Paicunami cancunapaj huahuacunataca, caru llajtapi causaj sabeocunaman c'atushpa cachangacuna. Ñucaca Mandaj Dios cashpami, cashna huillani.

⁹Caitaca tucui llajtacunapi huillaichigari. Macanacui tiyanatapish huillaichigari. C'ari c'ari runacunata rijchachichigari. C'uchuyamuichigari, tucui soldadocunapish shamuichigari.

¹⁰Cancunapaj azadoncunataca, espadata ruraichigari. Cancunapaj hocescunataca, lanzacunata ruraichigari. Fuerzata mana charijcunapish: Fuerzasapamari cani nishpa caparirichigari.

¹¹C'uchulla llajtacunapi causajcuna, tucuicuna tandanacushpa shamuichigari ninmi. Mandaj Dioslla, paicunapajmanca fuerzasapa cambaj runacunata cachayari.

¹²Tucui llajtacunapi causajcuna, rijcharichigari. Josafat pugru pambaman huichiyaichigari. Chaipimi c'uchulla llajtacunapi causajcunataca, tucui paicuna imalla rurashcata ricuchingapaj tiyarisha.

¹³Granocunaca ñami tandanalla tucushca. Chaitaca hoceshuan tandaichigari. Uvapish capinapica jundami tiyacun, sarushpa capinaman uriyamuichigari. Paicuna millaita rurashcacunapish, chashnallataj yallitaj achcamari.

¹⁴Rurashcata ricuchina pambapica, achcacunami tandanacushca. Mandaj Diosmi paicuna imalla rurashcata ricuchina pambapi ricuchinga. Chai punllaca ñami quichquiyamucun.

¹⁵Chai punllapica intipish, lunapish amsayangami, luzerocunapish ña mana achijyachingachu.

¹⁶Mandaj Diosca Sionmantami caparinga, Jerusalenmantaca pai rimashcami uyaringa. Chaimantaca jahua pachapish, cai pachapish chujchungami. Ashtahuanpish Mandaj Diostami, pai agllashcacunaca shuyangacuna. Pai agllashca israelcunapajca, paca tucuna jatun pata shinami tucuimanta huaquichinga.

¹⁷“Chashna rurajpimi, cancunata Mandaj Taita Diostaj cashcataca rijsinguichij. Ñucapajlla Sión urcupi causacushcatami ricunguichij, Jerusalenpish ñucapajllami tucunga. Shujtajcunaca ña mana ashtahuan chaita puringacunachu.

¹⁸Chai punllapica urcucunamantaca llullu vinomi llujshinga, lomacunamantaca lechemi talliringa. Judá llajtapi tiyaj tucui larcacunataca, achca yacumi callpanga. Mandaj Diospaj huasimantapish achca yacu llujshishpami, Sitim pugru pambapi regaringa.

¹⁹Egiptoca tucuimi chingaringa. Edomca shitashca llaquinayaj pambami saquiringa. Paicunallataj Judá llajtapi causajcunata ima juchachina illajlla cashca jahua, huañuchishpa yahuarta jichashcamantami chashna tucungacuna.

²⁰Ashtahuanpish Judá llajtaca huiñaipajmi runacunahuan junda causanga. Jerusalenpica huahua huahuacunacamami causangacuna.

²¹Yahuarlla cajcunata manaraj p'ichashcataca, ñucami p'ichasha. Mandaj Dios ñucami Sión urcupi causasha” ninmi.