Read Chimborazo Highland Quichua AMÓS 1 Bible Online

AMÓS 1 - Chimborazo Highland Quichua bible

AMÓS 1

¹Cai shimicunaca, Tecoa pueblomanta michijcunapura Amós runa, israelcuna ima tucunamanta huillashca shimicunami. Judá llajtataca, jatun mandaj Uziasmi mandacurca. Israel llajtataca, Joaspaj churi Jeroboammi mandacurca. Allpa chujchui tiyanapaj ishqui huata ñaupamanmi,

²cashna huillarca: Sión urcupi caj Jerusalén pueblomantami, Mandaj Diosca león huacarij shina sinchita rimashpa uyaringa. Michina q'uihuacunapish chaquiringami. Carmelo urcupish, jahua urcucamami chaquiringa.

³Mandaj Diosca cashnami nin: “Damasco pueblopi causajcunaca, cutin cutin millaita ruracujllapica, paicunata llaquichinataca manataj saquishachu. Paicunaca Galaad llajtapi causajcunataca, trillana fierrohuanmi tacashpa ñuturcacuna.

⁴Chashna llaquichishcamantami, Hazaelpaj huasica ninahuan japichishca rupanga. Chai ninallatajmi, Ben-adadpaj mandashpa tiyana huasicunatapish tucui rupachinga.

⁵Damasco pueblo jatun pungu aldabacunatapish p'aquishpami yaicusha. Avén pugru pambapi causajcunatapish, Bet-edén llajtata mandajcunatapish chingachishami. Shinallataj Siria llajtapi causajcunaca, Kir llajtamanmi prezu apashca cangacuna” ninmi Mandaj Diosca.

⁶Mandaj Diosca cashnapishmi nin: “Gaza pueblopi causajcunaca, cutin cutin millaita ruracujllapica, paicunata llaquichinataca manataj saquishachu. Paicunaca, shuj pueblopi causajcunataca tucuicunatami Edom llajtapi huatashca shina causachun prezu aparcacuna.

⁷Chashna llaquichishcamantaca, Gaza pueblo muyundij patapimi ninata japichisha. Chai ninallatajmi, mandashpa tiyana huasicunatapish tucui rupachinga.

⁸Shinallataj Asdod pueblopi causajcunatapish, Ascalón pueblota mandajcunatapish chingachishami. Ecrón pueblopi causajcunataca yallitajmi llaquichisha. Maijan saquirij filisteocunacamami huañuchisha” ninmi Mandaj Jatun Diosca.

⁹Mandaj Diosca cashnapishmi nin: “Tiro pueblopi causajcunaca, cutin cutin millaita ruracujllapica, paicunata llaquichinataca manataj saquishachu. Paicunaca shuj pueblopi causajcunataca, Edom llajtapi huatashca shina causachunmi prezu cacharcacuna. Quiquin huauquindijpura shina ari ninacushcataca mana yuyarishpami, chashna rurancuna.

¹⁰Chashna llaquichishcamantaca, Tiro pueblo muyundij patapimi ninata japichisha. Chai ninallatajmi mandashpa tiyana huasicunatapish tucui rupachinga” ninmi.

¹¹Mandaj Diosca cashnapishmi nin: “Edom llajtapi causajcunaca, cutin cutin millaita ruracujllapica, paicunata llaquichinataca manataj saquishachu. Paicunapaj quiquin huauquicunallatatajmi espadahuan catishpa huañuchircacuna. Mana llaquishpami, shuhuashpa causarcacuna. Paicunapaj huauquicunataca p'iñaillami causarcacuna.

¹²Temán pueblopipish ninatami japichisha. Chai ninallatajmi, Bosra pueblopi mandashpa tiyana huasicunatapish rupachinga” ninmi.

¹³Mandaj Diosca cashnapishmi nin: “Amón llajtapi causajcunaca, cutin cutin millaita ruracujllapica, paicunata llaquichinataca manataj saquishachu. Paicunapaj allpa achca tucuchun nishpami, Galaad llajta chichu huarmicunataca huijsata lliquishpa huañuchircacuna.

¹⁴Chashna llaquichishcamantaca, Rabá pueblo muyundij patapimi ninata japichisha. Jatun macanacui punllapica ninaca trasyacujmi canga. Chai ninallahuantajmi paicuna mandashpa tiyana huasicunatapish tucui rupachisha. Chai punllaca jatun mancharina punllami canga.

¹⁵Paicunata jatun mandajpish, pai churashca mandajcunandijmi prezu ringacuna” ninmi Mandaj Diosca.