Read Chimborazo Highland Quichua AMÓS 4 Bible Online

AMÓS 4 - Chimborazo Highland Quichua bible

AMÓS 4

¹Samaria urcupi causaj huarmicuna, cancunaca Basán llajta vacacuna shinami canguichij. Caita alli uyaichij: Cancunaca imata mana charij huajchacunataca, quichushpa jatunta llaquichijcunami canguichij. Cancunapaj cusacunatapish, machangapaj vinota apamuichij nishpa mañajcunami canguichij.

²Ima jucha illaj Mandaj Jatun Diosca, mana llullashpami cashna nin: “Cancunata llaquichina punlla chayamujpica, cancunataca ganchocunahuanmi aisashpa ringacuna. Cancunapaj huahua huahuacunataca, chalhuata japina anzuelohuanmi japingacuna.

³Chai punllapica, cancunaca patata jutcushcallatami catinacushpa llujshinguichij. Mandana huasimantapish llujshichishcami canguichij” ninmi Mandaj Diosca.

⁴“Bet-el, Gilgal shuti pueblocunaman rishpa ashtahuan millaita rurashpa catichijlla. Cada tutamanta animalcunata cushpa huañuchichijlla, chungamanta shujta cunatapish cada quimsa punllapi cugrichijlla.

⁵Animaltapish huañuchishpa, levadurahuan rurashca tandatapish cushpa diosolopagui nigrichijlla. Cancunapaj imalla cushcacunatapish tucuicunaman huillagrichijlla. Israelcunalla, cancunaca chashna ruranatami munanguichij” ninmi Mandaj Jatun Diosca.

⁶Mandaj Diosca cashnapishmi nin: “Ñucami cancuna causacun pueblocunamanca yaricaitaca cacharcani. Chaimantami cancuna causacun pueblocunapica micuna illarca. Chashna rurajpipish, cancunaca manataj ñucaman cutirircanguichijchu” ninmi Mandaj Diosca.

⁷“Shinallataj granocunata tandanapaj quimsa quilla illajpirajmi, tamyatapish mana cacharcani. Maijan pueblota tamyachishpapish, maijan pueblotaca mana tamyachircanichu. Chaimantami maipi tamyashcapica, alli grano p'ucurca. Maipi mana tamyashcapica, tucui chaquirirca.

⁸Yacunaihuan huañucushpami, tauca pueblocunamanta shamushpa shuj pueblollapi yacuta ubyarcanguichij. Chashna ubyashpapish yacunai pararijtatajca, mana ubyarcanguichijchu. Chashna llaquita apacushpapish, ñucamanca manataj cutirircanguichijchu” ninmi Mandaj Diosca.

⁹“Ñucaca rupaj huairatapish, oruga c'urucunatapish, langosta c'urucunatapish cachashpami, cancunapaj achca huertacunatapish, uva chagracunatapish, higo yuracunatapish, olivo yuracunatapish micushpa tucuchichircani. Chashna llaquichijpipish, cancunaca manataj ñucamanca cutirircanguichijchu” ninmi Mandaj Diosca.

¹⁰“Egipto llajtapi causajcunata shinallataj huañuchichunmi, huañuchijcunata cancunapajmanpish cacharcani. Cancunapaj churicunatapish espadahuanmi huañuchircani. Cancunapaj caballocunatapish cancunata p'iñajcuna apachunmi saquircani. Cancunapajmanca huañushcacunapaj ismushca aicha ashnaitapishmi cacharcani. Cancunaca chashna tucui llaquicunata apacushpapish, manataj ñucapajman cutirircanguichijchu” ninmi Mandaj Diosca.

¹¹“Sodoma, Gomorra shuti pueblocunata llaquichishca shinallatajmi jatun llaquicunahuan anchuchircani. Chaimanta cunan cancunaca, caspita chaupicama rupachishca shinallami quishpirircanguichij. Cancunaca chashna llaquita apacushpapish, ñucapajman manataj cutirircanguichijchu” ninmi Mandaj Diosca.

¹²“Israelcunalla, cancunataca chashnami llaquichisha. Ama chashna llaquichichun nishpaca, cancunapaj Dioshuan tupangapajca, allichirishcami shuyacuna canguichij” ninmi.

¹³Mandaj Diosca urcucunatapish, huairatapish rurajmari, runacunamanpish pai imata yuyashcata huillajmi. Paica tutayachijpish, punllayachijpishmari. Paica tucui urcucunatapish purijmari. Paica tucuita Mandaj Taita Dios shutimari.