Read Chimborazo Highland Quichua AMÓS 6 Bible Online

AMÓS 6 - Chimborazo Highland Quichua bible

AMÓS 6

¹Sión pueblopi cushicushpa causajcunapish, Samaria urcupi causajcunapish urcucunapi imata mana manchashpa causajcunami canguichij. ¡Aij imachari tucunguichij! Cancunaca llajtacunapipish alli nishca mandajcunami canguichij. Chaimantami tucui israelcuna cancunapajllaman shamuncuna.

²Cancunaca, Calne puebloman rishpa ricugrichij. Chaimantaca Hamat jatun pueblomanpish ringuichij. Chai q'uipaca, filisteocuna causacun Gad puebloman uriyanguichij. Chai pueblocunachu cancunapaj llajtacunatapish yalli alli imamí. Mana cashpaca chai llajtacunachu yalli jatun cashca imamí ricugrichij.

³Cancunaca chai llaqui punllacunaca ama utca chayamunman yuyanguichijmi. Ashtahuanpish cancunallataj millaita rurajcunahuan shujlla tucushcamantami, chashna yuyanguichij.

⁴Cancunaca marfilhuan rurashca camacunapimi dorminguichij. Chashna sumaj camapi chutajllata siririshpami samaringuichij. Cancunaca canlla ovejamanta huira malta c'ari ovejacunatapish, ashtahuan huira huagracunatapishmi huañuchishpa micunguichij.

⁵Flautapi tocashpapish, pinganayajtami cantanguichij. Ima tocanapi tocashpapish, David shina tocacunchij yuyanguichijmi.

⁶Cancunaca vinotapish jatun tasacunapimi ubyanguichij. Shinallataj cancunapaj aichapica, tucuimanta yalli mishquijllata ashnajcunallatami churaringuichij. Josepaj huahua huahuacuna llaquita apacujtaca, mana yuyaringuichijchu.

⁷Chashna millaicuna cashcamantaca, prezu apajpica cancunami puntapi ringuichij. Cushicuihuan caparirishpa causajcunapajca, jatun llaquica ñami chayamugrin.

⁸Mandaj Jatun Diosca, paipaj quiquin shimihuantajmi cashna nin: Tucuita Mandaj Jatun Diosca cashnami nin: “Jacobopaj huahua huahuacunataca jatun tucushca cajpimi p'iñani. Paicuna mandashpa tiyana huasicunatapish mana ricunanchu. Chaimantami chai pueblotaca, chaipi tucui imalla tiyajcunandij, paicunata p'iñajcunapaj maquipi churasha” ninmi.

⁹Chai punllapica cashnami tucunga: Shuj huasipi chunga runacuna saquirishpapish, tucuimi huañunga.

¹⁰Chai huañushcacunataca quiquin familiami chai huasi ucupi tullucuna ama saquirichun nishpa, chai ucumanta llujshichishpaca, tandachishpa rupachinga. Chai huasi ucu c'uchupi cajtaca: “¿Manachu maijan canhuan saquirirca?” nishpami tapunga. Shina nijpica chai runaca: “Mana pi saquirircachu. Shina cajpipish upallai, ñucanchijca Mandaj Diospaj shutitaca mana rimai tucunchijchu” nishpami cutichinga.

¹¹Riquichij, Mandaj Diosmari mandanga. Paica jatun huasicunatapish, uchilla huasicunatapish chijtachingami. Chashnami tucui huasicuna urmanga.

¹²¿Caballocunaca peña quinricunata callpai tucungari? ¿Shinallataj yunta huagrahuanpish peña quinripi yapui tucungachari? ¿Ima nishpataj cancunaca cashcata ruranapaj randica, huañuchij venenota ubyachircanguichij? ¿Ima nishpataj cashcata rurashpa ricuchinapaj randica, jayaj ajenjo shina cashcata ricuchircanguichigari?

¹³Cancunaca imamantapish cushicunguichijmi. Cancunaca: “Mandanatapish ñucanchij quiquin fuerzamantami charinchij” ninguichijmi.

¹⁴Chaimanta israelcunalla, tucuita Mandaj Diosca cashnami nin: “Cancunataca shujtaj llajtami llaquichishpa mandanga. Paicunaca janaj Hamat pueblomantaca, ura Arabá llajtapi tiyaj yacu rina larcacamami mandanga” ninmi.