Read Chimborazo Highland Quichua AMÓS 8 Bible Online

AMÓS 8 - Chimborazo Highland Quichua bible

AMÓS 8

¹Mandaj Jatun Diosca cashnatami ricuchirca: Usya punllacunapi p'ucushca granocuna taza junda tiyacujtami ricuchirca.

²Chashna ricuchishpaca: — Amós, ¿imatataj ricungui? — nijpica ñucaca: — Usya punllacuna p'ucushca granocunatami, taza junda tiyacujta ricuni — nircanimi. Chashna nijpica, Mandaj Diosca cashnami nirca: — Ñuca agllashca israelcuna tucurinami ña chayamushca. Cunantajca mana uniyashachu.

³Chai jatun llaqui punllapica, Mandaj Jatun Diospaj huasipi cantajcunapish huacangacunami, achcacunami huañungacuna. Chai huañushca aichacunatapish, chulunllacunapimi shitangacuna — nircami.

⁴Imata mana charij huajchacunata quichushpa llaquichijcunalla, caita alli uyahuaichij.

⁵Cancunaca cashnami ninguichij: “Trigota ña c'atushun ninchijca. Quillapish ña tucurijpichari, samana punllapish ña pasajpichari granocunata huaquichishca ucumanta pascashpa c'atungapaj. Medidacunatapish uchillayachishpa c'atungapaj, manapish cashcata balanzapi pizashpami achca cullquipi c'atushun.

⁶Imata mana charij huajchacunapish mana pagai tucushpaca, ñucanchijpajta ruraj tucuchuncuna. Shinallataj ima illajllacunaca ishqui pargatellamantapish ñucanchijpajta ruraj tucuchun. Ch'uzu trigocamamari c'atushun ninchij” nicunguichijmari.

⁷Jacobpaj huahua huahuacunata sumajyachij ñucatajmi cashna nini: “Paicunata llaquichinataca manataj cungarishachu” ninmi Mandaj Diosca.

⁸“Ñuca llaquichicui punllapica, allpaca ¿manachu chujchunga? Cai llajtapi causajcunapish ¿manachu huacangacuna? Egipto llajta jatun yacu huashicucuj shinami allpapish huashicunga” ninmi.

⁹Mandaj Jatun Diosca cashnapishmi nin: “Ñuca llaquichi punllapica, intipish chaupi punllapi ña mana achijyachingachu. Achij punllatami cai pachataca amsayachisha.

¹⁰Cancunapaj cushicuna fiesta punllaca huacanami tucunga. Chai punllapica, cancunata cushichishpa cantajcunapish yupashpa yupashpami huacangacuna. Cañamazutami churachisha, uma ajchatapish lluchutami rutuchichisha. Chaipica tucuicunami shujlla c'ari huahua huañushcamanta shina huacanguichij. Chai punllaca, mana jahualla mancharina jatun llaqui punllami canga” ninmi.

¹¹Mandaj Jatun Diosca cashnapishmi nin: “Jatun yaricai punllacunatami cachagrini. Chai punllacunapica mana micuna illashcamantachu, yaricaihuan yacunaihuan cangacuna. Ashtahuanpish ñuca shimita uyanaihuanmi yaricaihuan, yacunaihuan huañucuj shina puringacuna.

¹²Ñuca shimita uyanaihuan huañucushpami, shuj mama cuchamantaca caishuj mama cuchacama, janaj ladomantaca inti huashicuncama mashcashpa puringacuna. Chashna mashcashpapish, manataj japingacunachu.

¹³Chai punllacunapica paicunapaj sumaj ushushicunapish, sumaj churicunapish yacunaihuan pambaman urmangami.

¹⁴Samaria pueblopi caj juchapaj shutipi imatapish nishpami: Dan runacunalla, cancunapaj Diosmanta nincuna. Shinallataj: Beerseba ñanmanta nincunapishmi. Paicuna urmashpaca, manataj jataringacunachu” ninmi.