Read Chimborazo Highland Quichua AMÓS 9 Bible Online

AMÓS 9 - Chimborazo Highland Quichua bible

AMÓS 9

¹Jatun Diostaca, altar jahuapi shayacujtami ricurcani. Chai jahuamantami cashna nirca: “Pungu pilar capitelta urmachingui. Chai pungucunapish chujchuchun, ñuturishpa tucuicunapaj umapi urmachun. Chaipi mana huañujcunataca, espadahuanmi huañuchisha. Pi mana miticui tucungachu, shujllapish mana quishpiringachu.

²Maijanpish Seolcama allashpa miticucujpipish, maquihuan aisashpa llujshichishallami. Jahua pachaman huichiyacujtapish, uriyachishallami.

³Carmelo urcu puntapi miticugrijpipish, mashcashpami japisha. Ñuca ñahuimanta miticungapaj mama cucha asientoman yaicujpipish, yacupi causaj culebratami canichun cachasha.

⁴Paicunata p'iñajcuna prezu apashpa huatashcata shina charicujpipish, espadahuanmi huañuchichisha. Ñucaca paicunata ricushpapish, llaquichingapajllami ricusha. Allita rurangapajca, mana ricushachu” ninmi.

⁵Tucuita Mandaj Jatun Dios cai pachata tupajpica, cai pachaca yacuyangami. Cai pachapi causajcunapish, tucuicunami llaquinayajta huacashpa huañungacuna. Allpaca, Egipto llajta jatun yacu shina ucuyacunga jahuayacungami.

⁶Mandaj Diosca, pai causana huasitaca jahua pachapimi rurashca. Azul p'uyutapish allpa jahuapimi churashca. Mama cuchamanta yacuta p'uyupi apashpami, allpapipish tamyachin. Paica Mandaj Dios shutimi.

⁷Mandaj Diosca cashnami nin: “Israelcunalla, cancunaca ñuca ñahuipica Etiopía llajtapi causajcuna shinallatajmi canguichij. Egipto llajtamanta cancunata llujshichishca shinallatajmi, filisteocunatapish Caftor llajtamanta llujshichimurcani. Arameocunatapish, Kir llajtamantami llujshichimurcani.

⁸Mandaj Jatun Dios ñucaca, jucha mandacun Israel llajtataca ricucunimi. Paicuna chashna millaita rurashcataca p'iñanimi. Chaimanta cai llajtapi causajcunataca anchuchishami. Chashna anchuchicushpapish, ñaupa yaya Jacobpaj huahua huahuacunataca manataj tucuita chingachishachu.

⁹Israelcunataca, ajichupi trigota shushushca shina cachunmi shujtaj llajtacunapi llaquita apachun cachasha. Chaipimi paicunaca, racu granolla ajichupi saquirij shina saquiringacuna. Shuj granollapish allpamanca mana urmangachu.

¹⁰Ñuca agllashcacunapurapi millaita rurajcunaca, espadahuanmi huañuchishca cangacuna. Paicunaca: Ñucanchijpajmanca llaquicunaca mana shamungachu, ima llaquicunapish mana japingachu nincunami.

¹¹Shamuj punllapica, Davidpaj shayachishca carpa huasitaca cutin shayachishami. Paicunapaj pata t'unishcatapish allichishpa shayachishami. Tucui imalla urmashcatapish shayachishami. Paicunataca ñaupa punllacunapi cashca shinallatajmi allichisha.

¹²Chashna rurajpimi, ñuca shutita apaj israelcunaca Edom llajtamanta maijanlla saquirijcunapish, tucui llajtamantapish mandangacuna” ninmi Mandaj Diosca. Paica pajtachingatajmi.

¹³Mandaj Diosca cashnapishmi nin: “Riquichij, ñamari jatun alli punllacunaca chayamugrin. Chai punllacunapica trigota manaraj tucui cuzichajpimi, yapui punllaca japinga. Shinallataj uvata manaraj tucui capijpimi, trigota tarpuna punllaca chayanga. Llullu vinoca yacu shinami urcucunatapish, lomacunatapish callpacunga.

¹⁴Ñuca agllashca israelcunataca, prezu causacunmanta cacharichishpami tigrachimusha. Paicuna tigramushpami, urmachishca pueblocunata allichishpa chaipi causangacuna. Paicunaca uvata tarpushpa, vinotapish ubyangacunami. Huertacunata rurashpami, chaipi p'ucushcacunata micungacuna.

¹⁵Paicunataca, quiquin allpallapitajmi churasha. Ñuca paicunaman cushca allpamantaca, manataj cutin p'itishpa anchuchishachu” ninmi cancunata Mandaj Taita Diosca.