Read Chimborazo Highland Quichua JONÁS 1 Bible Online

JONÁS 1 - Chimborazo Highland Quichua bible

JONÁS 1

¹Mandaj Diosca, Amitai runapaj churi Jonastami cashna nirca:

²“Jatari, Nínive puebloman ri. Chai jatun pueblopi causajcuna yallitaj millaita rurashpa causashcaca ñami ñuca ñaupajman chayamushca. Chaimanta ñuca llaquichina cashcata paicunaman huillagri” nircami.

³Shina nijpica Jonasca, Mandaj Diosmanta miticushpa Tarsis puebloman ringapajmi, barcota japingapaj Jope puebloman uriyarca. Chaiman chayashpaca, Tarsis puebloman ricuj barcopimi, paipaj pasajeta pagashpa yaicurca. Paica Mandaj Diospaj ñaupajmanta miticusha yuyashpami, Tarsis puebloman paicunahuan ricurca.

⁴Chashna ricujpimi, Mandaj Diosca achca huairata cacharca. Chai huaira mama cuchata caiman chaiman cuyuchijpimi, chai barcoca ñalla p'aquiricuj shina yuyachirca.

⁵Chaimantami chai barcota purichijcunaca tucuicuna yallitaj mancharishpa, paicunapaj diosta caparishpa mañarcacuna. Shinallataj chai barco mama cuchapi ama huashicuchun nishpami, tucui imalla apacushcacunatapish yacuman shitarcacuna. Ashtahuanpish Jonasca chai barcopica, imalla huaquichina ucuman uriyashpami, huañuita dormicushca carca.

⁶Chaita ricushpami, chai barcota purichijcunata mandajca paipajman rishpaca: — ¿Ima nishpataj caipi dormicunguillari? Jatarishpa cambaj Diosta caparishpa mañai. Ima shinamanta ñucanchijta llaquishpa quishpichingapishchari — nirca.

⁷Shinallataj barcota purichijcunaca: — Tucui caipi cajcunamantaca ¿pitaj mana allita rurashpa puricushcanchij? Chaita yachangapajca suerteta rurashunchij — nircacunami. Chashna suerteta rurajpica, Jonaspajmi urmarca.

⁸Chaimantami Jonastaca: — ¿Imamantataj cai llaquicunaca shamun? ¿Maimantataj shamucungui? ¿Imatataj rurashpa causangui? ¿Mai llajtamantataj cangui? ¿Pipurataj cangui? Chaita huillai — nircacuna.

⁹Chashna tapujpimi Jonasca: — Ñucaca hebreocunapurami cani. Jahua pachapi causaj Mandaj Diosta cazushpa causajmi cani. Taita Diosca cai pachatapish, mama cuchatapish ruraj Diosmi — nirca.

¹⁰Shinallataj paica, Mandaj Diosmanta miticushpa ricushcatapishmi paicunamanca huillarca. Chaita huillajpica, chai runacunaca mana jahuallata mancharishpami: — ¿Imamantataj chashnaca rurarcangui? — nircacuna.

¹¹Chaimantaca mama cucha yacu ashtahuan, ashtahuan cuyurijpimi: — Cunanca cai mama cucha yacu casijlla tucuchunca cantaca ¿imatataj rurashun? — nircacuna.

¹²Chashna nijpimi Jonasca: — Cancunaca ñucamantami cai tucui llaquitaca apacunguichij. Cunanca ñucataca cai mama cucha yacuman shitaichijlla. Chashna rurajllapimi, cai mama cucha yacuca casijlla tucunga — nircami.

¹³Chashna nijpipish chai runacunaca barcotaca, allpaman llujshichishun yuyashpami purichishun nircacuna. Ashtahuanpish mama cucha yacuca ashtahuan ashtahuanmi cuyurirca. Chaimantami chai barcotaca, allpamanca mana llujshichi tucurcacuna.

¹⁴Chaimantami chai runacunaca: “Mandaj Dioslla, cai runamantaca ama ñucanchijtapish huañuchihuaichu. Paipaj yahuarmantapish ama ñucanchijta juchachinguichu. Can Mandaj Dios imata rurasha nishcatami rurashcangui” nishpami, caparishpa mañarcacuna.

¹⁵Chai q'uipami Jonastaca, japishcahuan yacuman shitarcacuna. Paita shitajpimi, yacuca caiman chaiman manchanayajta cuyuricushpapish casijlla tucurca.

¹⁶Chaimantami barcota purichijcunaca, Mandaj Diostaca achcata mancharcacuna. Chaimantami Mandaj Diosmanca animalcunata cushpa huañuchircacuna. Imata shujtajtapishmi paicunapaj shimihuantaj cuna tucurcacuna.

¹⁷Mandaj Diosllatajmi chai mama cuchapica, Jonasta millpuchun shuj jatun chalhuata charicurca. Chai chalhua millpujpimi, Jonasca, quimsa punllata quimsa tutata chalhuapaj huijsa ucupi carca.