Read Chimborazo Highland Quichua JONÁS 3 Bible Online

JONÁS 3 - Chimborazo Highland Quichua bible

JONÁS 3

¹Chai q'uipaca cutinllatajmi, Mandaj Diosca Jonastaca cashna nirca:

²“Jatari, Nínive puebloman ri. Chai jatun pueblopi causajcunaman ñuca imallata huillai nishcata huillagri” nircami.

³Chashna nijpimi Jonasca jatarishcahuan, Mandaj Dios mandashca shina Nínive pueblopi huillagrirca. Nínive puebloca quimsa punlla purina shina, jatun pueblomi carca.

⁴Jonasca shuj punlla shinata purishpami: “Cunanmanta chuscu chunga punllapica, cai Nínive puebloca chingaringami” nishpa, caparishpa huillashpa purirca.

⁵Jonás chashna huillajpica, Nínive pueblopi causajcunaca tucuicunami Taita Diosta crircacuna. Chaimantaca yuyajcunamanta callarishpa, uchilla huahuacunacamami cañamazuta churarishpa mana micurcacuna.

⁶Nínive pueblota jatun mandajpish chai huillashcataca yachaj chayarcami. Chaimantami pai mandashpa tiyacushcamanta jatarishpaca, paipaj sumaj churanata llujshichishcahuan, cañamazuta churarishpa ushpapi tiyarirca.

⁷Shinallataj jatun mandajhuan, pai churashca mandajcunahuanca, Nínive pueblopi causajcunamanpish cashnami huillachirca: “Pi runacunapish, animalcunapish ama imata micunguichijchu. Huagracunamanpish, ovejacunamanpish ama imata caranguichijchu, yacullatapish ama ubyachinguichijchu.

⁸Ashtahuanpish gentecunapish, animalcunapish cañamazuta churarishpa, sinchita Taita Diosta caparishpa mañanguichij. Tucuicunallataj ima laya millaita ruraj cashca cashpapish, chaita saquishpa cutirichij. Huañuchijcuna cashpapish, chaita saquinguichij.

⁹Taita Dios p'iñarishpa llaquichina cashpapish, manapishchari llaquichinga” nishpami mandarca.

¹⁰Taita Diosca, Nínive pueblopi causajcunaca millai ruranacunata saquishpa cutirishcatami ricurca. Chaimantami pai p'iñarishpa llaquichisha nishca cashpapish, jarcarishpa mana llaquichirca.