Read Chimborazo Highland Quichua JONÁS 4 Bible Online

JONÁS 4 - Chimborazo Highland Quichua bible

JONÁS 4

¹Taita Dios imalla rurashcaca, Jonaspajca mana alli ricurircachu. Chaimantami Jonasca mana jahuallata p'iñarirca.

²Chashna p'iñarishpami, Mandaj Diostaca cashna mañarca: — Mandaj Dioslla, canca jatunta c'uyaj, llaquij, mana utca p'iñarij, alli shungu Diosmi cangui. Llaquichisha nishpa huillachishpapish, jarcarishpa saquinguillami. Ñuca llajtapi cashparajmi, canca chashna ña yacharcani. Chaimantami can mandajpica, miticushpa Tarsis puebloman ricurcani.

³Cunanca Mandaj Dioslla, ñucataca huañuchihuailla. Ñucapajca causanapaj randica, huañunami alli — nijpimi,

⁴Mandaj Diosca: — ¿Chashna mana jahuallata p'iñarishpaca, allitami rurani yuyanguichu imatagari? — nirca.

⁵Chaimantami Jonasca, Nínive pueblomantaca inti llujshin ladoman rishpa, ramacunahuan chugllata rurarca. Chai chuglla ucupimi llandurishpa tiyarirca. Chai pueblopi ima tucujta ricungapajmi, chaipi tiyacurca.

⁶Mandaj Taita Diosca rupai achcata t'itajpi Jonás llaquirishpa tiyacujpimi, llandurichunca pai tiyacun c'uchupi calabazo yurata huiñachirca. Chai calabazo yurata ricushpami, Jonasca achcata cushicurca.

⁷Cayandij tutamanta pacarinapajca, Taita Diosllatajmi chai yurata micuchun shuj c'uruta churarca. Chai c'uru micujpimi, chai yuraca chaquirirca.

⁸Shinallataj inti llujshijpica, Taita Diosllatajmi achca rupaj huairata cacharca. Intipish Jonaspaj umataca rupachircami. Chaimantami yuyai illaj shina tucushpaca, huañunata munarca. Paica: “Ñucapajca causanapaj randica, huañunami alli canman” nircami.

⁹Chashna nijpimi Taita Diosca Jonastaca: — ¿Chai calabazo yura chaquirishcallamantachu yallitaj p'iñaringui imatagari? — nijpi Jonasca: — Ñucaca colerahuan huañucunimi — nirca.

¹⁰Chashna nijpimi Mandaj Diosca: — Manapish can tarpushca, manapish can huiñachishca jahuamari, chai calabazo yuramantaca yallitaj llaquiringui. Chai yuraca shuj tutalla huiñashpa, cayandij tutapajca, ñapish huañurcallami.

¹¹Nínive pueblotacarin maitataj mana llaquishari. Chai jatun pueblopica, 120.000 runacunami causancuna. Paicunaca maijan alli maqui cashcata, maijan lluqui maqui cashcatapish mana yachashca shinami causancuna. Shinallataj achca animalcunapishmi tiyan — nircami.