Read Chimborazo Highland Quichua NÚMEROS 10 Bible Online

NÚMEROS 10 - Chimborazo Highland Quichua bible

NÚMEROS 10

¹Mandaj Dios Moisesta mandashpaca cashnami nirca:

²“Cullqui trompetacunata ishquita rurai: Chaicunataca martillohuan labrashpa rurangui. Chaicunaca israelcunata tandachingapaj, carpa huasicunata shujtajman apana cashcata huillangapajmi canga.

³Trompetacunapi tocajpica, tucui israelcunami Dioshuan tupanacuna carpa huasi punguman cambaj ñaupajpi tandanacungacuna.

⁴Shuj trompetallapi tocajpica, huaranga huaranga israelcunata mandajcunami cambaj ñaupajman tandanacungacuna.

⁵Yallitaj sinchita trompetapi tocashca uyarijpica, inti llujshin ladoman causacujcuna rinalla tucushpa shayarichuncuna.

⁶Chai shinallataj tocashca cutinllataj uyarijpica, ura ladoman causacujcuna rinalla tucushpa shayarichuncuna. Paicuna puri callarichunpish chai shinallataj tocachuncuna.

⁷Tucui israelcunata tandachingapajlla cashpaca, trompetacunapi allilla tocachuncuna.

⁸Trompetacunapi tocajcunaca Aaronpaj churi curacuna cachun. Tucui chai mandashcacunallatajmi cancunapaj huahua huahuacunapajpish canga.

⁹Cancunapaj llajtapi cajpi cancunata p'iñajcuna cancunahuan macanacunaman shamugrijpi, paicunahuan macanacunaman llujshigrishpaca yallitaj sinchita trompetacunapi tocachinguichij. Chashna rurajpimi Mandaj Dios cancunapaj Dios cancunata yuyarishpa, cancunata p'iñajcunamanta quishpichishca canguichij.

¹⁰Cancuna cushicuna punllacunapipish, jatun fiesta punllacunapipish, quilla callari punllacunapipish, Mandaj Diosman cushpa tucui rupachicushpa, sumaj causaimanta cushpa rupachicushpaca trompetacunapipish tocanguichij. Chaica cancunapaj Dios cancunata yuyarichun yuyachinapajmi canga. Mandaj Dios ñucami cancunapaj Dios cani” nircami.

¹¹Egiptomanta israelcuna llujshimushca ña ishqui huata, huatapaj ishqui quilla, chai quillapaj ishqui chunga punllapimi, Dios chaipi cashcata ricuchij p'uyuca carpa huasi jahuamanta ri callarirca.

¹²Chaimi israelcunaca, Sinaí shuti shitashca pambamantaca ima shina rina cashcata mandashca shinallataj huashan huashan p'uyuta catishpa rircacuna. Chai p'uyuca, Parán shuti shitashca pambapimi shayarirca.

¹³Israelcunaca, Mandaj Dios Moisesta ima shinalla rina cashcata mandashca shinaca, chaipimi punta cutin ri callarircacuna.

¹⁴Judá aillupaj bandera ucupi caj soldadocunami tucuicuna paicunata ima shina rinata mandashca shinallataj ñaupashpa ri callarircacuna. Judá aillupaj soldadocunataca, Aminadabpaj churi Naasonmi pusharca.

¹⁵Isacar aillupaj soldadocunataca, Zuarpaj churi Natanaelmi pusharca.

¹⁶Zabulón aillupaj soldadocunataca, Helonpaj churi Eliabmi pusharca.

¹⁷Diospaj carpa huasita pascashpa apanallata rurashca cajpica, Gersonpaj huahua huahuacuna, Meraripaj huahua huahuacunami paicuna imallata apana cashcata apashpa catircacuna.

¹⁸Chai q'uipaca, Rubén aillupaj soldadocunami paicunapaj banderahuan paicunata ima shina rinata mandashca shinallataj catishpa rircacuna. Rubén aillupaj soldadocunataca, Sedeurpaj churi Elisurmi pusharca.

¹⁹Simeón aillupaj soldadocunataca, Zurisadaipaj churi Selumielmi pusharca.

²⁰Gad aillupaj soldadocunataca, Deuelpaj churi Eliasafmi pusharca.

²¹Chai q'uipaca, Coatpaj huahua huahuacunami, Diospajlla carpa huasi ucupi imalla tiyajcunata apashpa catircacuna. Paicuna chayanapajca, ñaupashpa rij levitacunaca, ñami Diospaj carpa huasitaca shayachishpa shuyacurcacuna.

²²Chai q'uipaca Efraín aillupaj soldadocunami paicunapaj banderahuan paicunata ima shina rinata mandashca shinallataj catishpa rircacuna. Efraín aillupaj soldadocunataca, Amiudpaj churi Elisamami pusharca.

²³Manasés aillupaj soldadocunataca, Pedasurpaj churi Gamalielmi pusharca.

²⁴Benjamín aillupaj soldadocunataca, Gedeonipaj churi Abidanmi pusharca.

²⁵Chai q'uipaca, Dan aillupaj soldadocunami paicunapaj banderahuan paicunata ima shina rinata mandashca shinallataj tucuicunapaj q'uipa paicunata catishca rircacuna. Dan aillupaj soldadocunataca, Amisadaipaj churi Ahiezermi pusharca.

²⁶Aser aillupaj soldadocunataca, Ocranpaj churi Pagielmi pusharca.

²⁷Neftalí aillupaj soldadocunataca, Enanpaj churi Ahirami pusharca.

²⁸Israelcunaca shujtajman rina tucujpica, paicunata ima shinalla rinata mandashca shinallatajmi, cada quiquin aillupaj soldadocunahuan huashanpura rijcuna carca.

²⁹Moisesca Madianmanta caj paipaj suegro Ragüelpaj churi Hobabtami cashna nirca: — Ñucanchijca Mandaj Dios richun nishcamanmi ricunchij. “Mandaj Diosmi ñucanchijmanca ñucami cancunamanca shuj llajtata cusha” nirca. Mandaj Diosca israelcunapajca allicunata ruranatami ari nishca. Chaimanta ñucanchijhuan jaculla. Ñucanchijpish canhuanca alli cashunllami — nircami.

³⁰Shina nijpi Hobabca: — Ñucaca chaimanca mana rishachu, ashtahuanpish ñuca llajtaman, ñuca familiacunapajmanmi rigrini — nircami.

³¹Ashtahuanpish Moisesca: — Ama ñucanchijllata saquihuaichu. Shitashca pambacunapi ñucanchij carpa huasicunata maipi shayachinatapish canmari alli rijsingui. Canca ñucanchijpajca ñucanchij ñahui shinamari cangui.

³²Can ñucanchijhuan rijpica, Mandaj Dios ñucanchijman cusha nishcata cujpica, canmanpish chaupishunmi — nircami.

³³Israelcunaca Mandaj Diospaj urcumanta rishpaca, quimsa punllacunatami purircacuna. Maipi carpa huasicunata shayachinata mashcashpami, quimsa punllata purishpa Mandaj Dioshuan ari ninacushca quillcata huaquichina arcata israelcunapaj puntapi apashpa ñaupashpa purircacuna.

³⁴Israelcuna puri callarincami, Mandaj Diospaj p'uyuca punllanta paicunapaj jahuata rirca.

³⁵Diospaj arcahuan ña puri callarijpica, Moisesca: “¡Mandaj Dios, jatariyari! ¡Quiquinta p'iñajcunataca caita chaita cachayari. Quiquinta mana ricunachijcunataca quiquinpaj ñaupajmanta callpachiyari!” nijmi carca.

³⁶Diospaj arcahuan shayarijpica, Moisesca: “¡Mandaj Dioslla, cai huaranga huaranga israelcunata tigrarishpa ricuyari!” nijmi carca.