Read Chimborazo Highland Quichua NÚMEROS 12 Bible Online

NÚMEROS 12 - Chimborazo Highland Quichua bible

NÚMEROS 12

¹Mariapish, Aaronpish Moisestaca, Cus llajtamanta caj huarmita paipaj huarmi cachun japishcamantami huashalla cashna rimarcacuna.

²Paicunaca: “Mandaj Diosca Moisesllahuanmi riman. Ñucanchijhuanca mana rimanchu” ninacujtami Mandaj Diosca uyarca.

³Moisesca tucui cai pachapi causaj c'aricunamantaca, paillami yalli alli shungu carca.

⁴Chaimi Mandaj Diosca Moisestapish, Aarontapish, Mariatapish: “Dioshuan tupanacuna carpa huasiman quimsandij richij” nijpi, paicunaca quimsandij rircacuna.

⁵Chaipimi Mandaj Diosca suni p'uyupi uriyamushpa, carpa huasi pungupi shayarishpa Aarontapish, Mariatapish cayajpi ishquindij c'uchuyarcacuna.

⁶Mandaj Diosca paicunataca cashnami nirca: “Cunanca ñuca rimashcata uyaichij. Mandaj Dios huillachishcata huillaj cancunapurapi tiyajpica, paimanca muscuipi shinami ricurisha. Muscuillapimi rimasha.

⁷Ashtahuanpish ñucapajta ruraj Moiseshuanca, mana chashnalla rimanichu. Paica ñuca huasipi imata rurana cashcataca tucuita pajtachijmi.

⁸Paihuanca ñahui ñahuimi rimani. Imatapish mana pacashpa alli entendinallatami rimani. Paica Mandaj Diostaca ima shina cashcatami ricun. Chashna cashcamanta ¿ima nishpataj ñucapajta ruraj Moisesta rimanataca mana mancharcanguichij?” nircami.

⁹Mandaj Diosca, paicunahuanca nina sindirij shina yallitajmi p'iñarirca. Chai q'uipaca rircallami.

¹⁰Mandaj Diospaj carpa huasimanta p'uyu ña rijpica, Mariapica leprami jundarca. Paipaj aichaca rasu shina yurajmi tucurca. Mariata Aarón ricushpaca, leprahuan cajta ricushpami,

¹¹Moisestaca cashna nirca: “¡Aij! ñuca amito, ñucanchijca upa shinamari canta huashalla rimashpa juchallishcanchij. Chaimanta cunanca chai juchataca ama ñucanchij jahuapi churahuaichu.

¹²Mariataca huañushca huahua huacharishca shina cachunpish, mamapaj huijsamanta llujshi pachamanta chaupi aicha ismushca shina cachunpish ama saquihuaichu” nijpimi,

¹³Moisesca Mandaj Diosta caparishpaca: “Taita Dios, cunanca Mariata alliyachichunmi” rogapani nirca.

¹⁴Chaimi Mandaj Diosca Moisestaca: “Paipaj yaya ñahuipi ch'ucashcamantaca ¿manachari canchis punllacunata pingailla cangari? Chaimanta canchis punllacama carpa huasicunamanta llujshichichij. Chai q'uipaca israelcunapajman tigrangallami” nirca.

¹⁵Chaimi Mariataca, carpa huasicunamanta caruman canchis punllacama llujshichishca carca. María paicunapajman tigrangacama israelcunaca mana shujtajman rircacunachu.

¹⁶María ña tigrajpimi, israelcunaca Hazerot pueblomanta rishpaca, Parán shuti shitashca pambapi carpa huasicunata shayachishpa tiyarirca.