Read Chimborazo Highland Quichua NÚMEROS 13 Bible Online

NÚMEROS 13 - Chimborazo Highland Quichua bible

NÚMEROS 13

¹Mandaj Dios Moisesta mandashpaca cashnami nirca:

²“Canaán llajtata rijsimuchun maijan runacunata cachai. Chaitaca ñucami israelcunaman curcani. Rijsinaman rijcunataca cada ailluta pushajcunata shuj shujta cachai” nirca.

³Shina nijpimi, Moisesca Parán shuti shitashca pambamantaca, Mandaj Dios mandashca shinallataj cacharca. Paicunaca Israel aillucunata pushajcunami carca.

⁴Rijsinaman rijcunapaj shuticunaca caicunami: Rubenpaj aillumantaca, Zacurpaj churi Samúa.

⁵Simeonpaj aillumantaca, Horipaj churi Safat.

⁶Judapaj aillumantaca, Jefonepaj churi Caleb.

⁷Isacarpaj aillumantaca, Josepaj churi Igal.

⁸Efrainpaj aillumantaca, Nunpaj churi Oseas.

⁹Benjaminpaj aillumantaca, Rafupaj churi Palti.

¹⁰Zabulonpaj aillumantaca, Sodipaj churi Gadiel.

¹¹Josepaj churi Manasespaj aillumantaca, Susipaj churi Gadi.

¹²Danpaj aillumantaca, Gemalipaj churi Amiel.

¹³Aserpaj aillumantaca, Micaelpaj churi Setur.

¹⁴Neftalipaj aillumantaca, Vapsipaj churi Nahbi.

¹⁵Gadpaj aillumantaca Maquipaj churi Geuelmi rirca.

¹⁶Llajtata rijsinaman Moisés cachashca runacunapaj shuticunaca chaicunami. Moisesca Nunpaj churi Oseastaca Josué shutitami shutichirca.

¹⁷Moisesca Canaán llajtata rijsinaman cachacushpaca, cashnami nirca: — Caimanta rishpaca, Neguevman huichiyanguichij. Chai q'uipaca chaipi caj urcuman huichiyanguichij.

¹⁸Chaiman chayashpaca, chai llajta ima shina cashcata, chaipi causajcunapish c'ari c'aricuna cashcata, mana cashpaca mana imata ni tucuipajcuna cashcata, ashacunalla cashcata, achcacuna cashcata alli alli ricunguichij.

¹⁹Paicuna causacun allpaca alli cashcata, mana alli cashcata, paicuna causacun pueblocunapish carpa huasicunalla cashcata, mana cashpaca rumicunahuan huasichishca cashcata,

²⁰paicunapaj allpaca alli granota p'ucuj cashcata, mana p'ucuj cashcata, chaicunapica yuracuna tiyashcata, mana tiyashcata alli alli ricunguichij. Ama manchashpa chai llajtapi imalla granocuna p'ucushcatapish apamunguichij — nircami. Chai punllacunaca punta p'ucushca uvata tandana punllacunami carca.

²¹Paicuna rishpaca, chai llajtataca Zin nishca shitashca pambamanta callarishpa, Hamatman yaicuna c'uchullapi caj Rehob shuti pueblocamami rijsishpa ricurcacuna.

²²Neguevman huichiyashpaca, Hebroncamami chayarcacuna. Chaipica Ahimán, Sesai, Talmai shuti runacunami causarca. Paicunaca Anacpaj churicunami carca. Hebrón puebloca Egipto llajtapi caj Zoán pueblota callarichinapaj canchis huata ñaupaman callarichishcami carca.

²³Moisés cachashcacuna Escol nishca yacu huaicucama chayashpaca, chaipimi shuj huangu uvata ramacunandij p'itircacuna. Chaitaca shuj caspipi churashpami, ishqui tucushpa apamurcacuna. Granadacunatapish, higocunatapish apamurcacunami.

²⁴Israelcunaca huangu uvata chaimanta p'itimushcamantami, chai huaicutaca Escol shutita shutichirca.

²⁵Llajtata rijsinaman cachashcacunaca chuscu chunga punllacunapimi tigramurcacuna.

²⁶Paicunaca Parán shuti shitashca pambapi caj Cades pueblomanmi tigrarcacuna. Chaipimi Moisespaj, Aaronpaj, tandanacushca israelcunapaj ñaupajpi chai llajta ima shina cashcata huillashpa, chai llajtapi p'ucushca granocunatapish ricuchirca.

²⁷Paicunaca cashnapishmi nircacuna: — Ñucanchijca cancuna cachashca llajtamanmi chayarcanchij. Chaipica lechepish, sacha chuspipaj mishquipish yacu llujshicuj shinatajmari cashca. Chaipi p'ucushca granocunapish caicunamari.

²⁸Shina cajpipish chai llajtapi causajcunaca c'ari c'aricunamari. Pueblocunapish yallitaj jatunmi cashca. Muyundijta pircashcamari cashca. Anacpaj churicunapish chaipimi causashca.

²⁹Neguev pueblopica amaleccunami causaj cashca. Urcupi caj llajtacunapica heteocuna, jebuseocuna, amorreocunami causaj cashca. Mama cucha c'uchu llajtacunapi, Jordán yacu uripi caj llajtacunapica cananeocunami causaj cashca — nircami.

³⁰Shina nijpipish Calebca, Moisespaj ñaupajpi cajcunata upallachishpami: — Paicunata yalli c'ari c'aricunaca ñucanchijmari canchij. Chashna cashcamanta chai llajtata japingapaj huichiyashunchij — nirca.

³¹Ashtahuanpish Calebhuan huichiyajcunaca: — Chai llajtapi causajcunamari ñucanchijta yalli c'ari c'aricuna. Chashna cashcamanta chai llajtaman huichiyashpapish, manataj mishai tucushunchu — nircacunami.

³²Chai runacunaca paicuna rijsimushca llajtata mana alli nishpami israelcunamanca cashna nircacuna: — Purij shinalla ñucanchij rijsimushca llajtaca, chaipi causajcunatapish millpujllami cashca. Chai llajtapi causajcunapish, jatun runacunamari cashca.

³³Chaipica yallitaj jatun runacunatapishmari ricurcanchij. Paicunaca Anac shuti yallitaj jatun runapaj churicunami. Paicunapaj c'uchupi cashpaca, ñucanchijca langosta c'urucuna shinallami carcanchij. Paicunapaj ricuipipish ñucanchijca, chashnami caj yuyachircanchij — nircacunami.