Read Chimborazo Highland Quichua NÚMEROS 14 Bible Online

NÚMEROS 14 - Chimborazo Highland Quichua bible

NÚMEROS 14

¹Chaimi israelcunaca chai tutaca tucui tuta jatunta caparishpa huacarcacuna.

²Tucui israelcunami Moisestapish, Aarontapish juchachishpa tucuicuna cashna nircacuna: “¡Egiptopi huañushca cashparajchari alli canchijman carca! ¡Cai shitashca pambapi huañushparajchari alli canchijman!

³¿Ima nishpataj Mandaj Diosca cai llajtapi causajcunapaj espadapi huañuchunca pushamunchu imatagari? Ñucanchij huarmicunapish, ñucanchij huahuacunapish macanacuipi mishashpa japishcacuna cachunllamari pushamun. Chaipaj randica ¿manachu Egiptoman tigrana alli canman?” nishpami

⁴paicunaca: “Ñucanchijta pushachun shuj pushajta agllashpa Egiptoman tigrashunchij” nishpa, caishuj chaishuj ninacurcacuna.

⁵Moiseshuan, Aaronhuanca tandanacushca israelcunapaj ñaupajpimi cungurishpa pambaman tupajta cumurircacuna.

⁶Canaán llajtata rijsishpa tigramujcunapuramantaca, Nunpaj churi Josuehuan, Jefonepaj churi Calebllahuanmi yallitaj llaquirishpa paicunapaj churanacunata lliquirishpa,

⁷tandanacushca israelcunataca cashna nircacuna: — Purij shinalla ñucanchij ricushca, rijsimushca llajtaca, yallitaj sumaj llajtamari.

⁸Mandaj Dios ñucanchijta munashpaca, paimari ñucanchijtaca chai llajtaman pushanga. Lechepish, sacha chuspipaj mishquipish yacu llujshicuj shina llajtataca paimari ñucanchijman cunga.

⁹Shina cashcamanta Mandaj Diosta c'ariyashpa ama p'iñachichijchu. Chai llajtapi causajcunataca ama manchaichijchu. Paicunataca ñucanchijca tandata micuj shinallami chingachishun. Paicunata ayudajca paicunamanta anchurishcami. Ashtahuanpish Mandaj Diosmari ñucanchijhuanca. Chaimanta ama manchaichijchu — nircacunami.

¹⁰Shina nijpipish, chai tucui israelcunami rumicunahuan shitashun nircacuna. Ashtahuanpish Dioshuan tupanacuna carpa huasipica, Mandaj Diosca paipaj sumaj cashcahuanmi tucui israelcunaman ricurirca.

¹¹Chaipimi Mandaj Diosca, Moisestaca cashna nirca: — Cai israelcunaca ¿maicamataj ñucataca p'iñachicungallari? Paicunapaj chaupipi cai tucui señalcunata rurajpipish ¿maicamataj ñucataca mana cringacunari?

¹²Paicunataca ñucami huañuchij ungüita cachashpa chingachisha. Shina cashpapish canmantami ashtahuan jatun llajtata, paicunata yalli c'ari c'aricunata rurasha — nijpimi

¹³Moisesca Mandaj Diostaca cashna nirca: — Mandaj Dios, cai israelcunataca quiquinpaj tucuita rurai tucuj cashcahuanmi Egiptomanta llujshichimurcangui. Quiquin chashna rurajpica, egipciocunaca chaita yachaj chayashpa,

¹⁴cai Canaán llajtapi causajcunaman huillangacunamari. Canaanpi causajcunaca israelcunapaj chaupipica quiquin Mandaj Dios cashcatami uyashcacuna. Mandaj Dios quiquinca israelcunaman ñahui ñahui ricurishcatapish, quiquinpaj p'uyu israelcunapaj jahuapi cashcatapish, israelcunapaj puntapica punllaca shuj suni p'uyupi, tutaca lunyacuj suni ninapi quiquin ñaupashpa pushacushcatapishmi yachashcacuna.

¹⁵Cai israelcunata shuj runata huañuchij shinalla quiquin tucuita huañuchijpica, quiquin tucuita rurai tucuj cashcata uyaj llajtacunaca cashnami ningacuna:

¹⁶“Mandaj Diosca israelcunataca pai cusha nishca llajtaman mana yaicuchi tucushpamari, shitashca pambapi huañuchishca” ningacunami.

¹⁷Chaimanta cunanca Jatun Dios, imalla cusha nishcataca quiquin nishca shinallataj rurashpa quiquinca tucuita rurai tucuj cashcata ricuchihuai. Quiquinllatajmi cashna nircangui:

¹⁸Yayacunapaj juchamantaca churicunatami quimsa huahua huahuacunacama, chuscu huahua huahuacunacama llaquichini. Juchayujtaca mana juchayujta shinaca manataj saquinichu. Chashna cashpapish Mandaj Dios ñucaca mana utca p'iñarij, yallitaj jatunta c'uyaj cashcamantaca millaita rurashcatapish, c'ariyashcatapish perdonajmi cani nircanguimi.

¹⁹Chashna cashcamanta quiquinpaj yallitaj c'uyaihuan, cai israelcunata Egiptomantapacha perdonashpa pushamucushca shinallataj cunanpish paicuna millaita rurashcataca perdonailla — nircami.

²⁰Mandaj Diosca cashnami nirca: — Ñucaca israelcunataca can nishca shinallatajmi perdonani.

²¹Shina cashpapish ñuca ima shinami causaj Dios cani. Chai shinallatajmi ñuca sumaj cashcapish tucui cai pachapi junda.

²²Chaimanta Egiptopipish, shitashca pambapipish, ñuca tucuita rurai tucuj cashcata, tucui laya señalcunata rurashpa ricuchishca jahua ñuca rimashcata mana uyashpa, ashtahuanpish ñuca rurashcacunata mana cazushpa ñucata p'iñachijcunaca,

²³paicunapaj ñaupa yayacunaman ñuca cushatajmi nishca llajtataca, pi mana ricungacunachu. Ñucata p'iñachijcunaca shujllapish manataj ricungacunachu.

²⁴Ashtahuanpish ñucapajta ruraj Calebllatami caishujcuna shina mana yuyashpa ñucata catishcamanta pai rijsimushca llajtamanca yaicuchisha. Paipaj huahua huahuacunapish chai llajtata japishpa chaipimi causangacuna.

²⁵Pugru pambacunapica amalecitacuna, cananeocunami causancuna. Chaimanta cayaca shitashca pambaman llujshishpa Puca Cuchaman rina ñanta japishpa tigrashpa richijlla — nircami.

²⁶Mandaj Diosca Moisestapish, Aarontapish mandashpaca cashnami nirca:

²⁷— Yallitaj millaita rurana yuyailla caj cai tucui achcacuna ñucata juchachishpa rimashcataca ¿maicamataj uyacushalla? Cai israelcuna ñucata juchachishpa rimashcataca ñami cai tucuita uyashcani.

²⁸Paicunataca cashna ni: Ñucaca causaj Diosmi cani ninmi Mandaj Diosca. Cancuna ima shinami ñuca uyajta rimarcanguichij, chashnallatajmi ñucapish cancunataca rurasha.

²⁹Cancunapaj cuerpoca cai shitashca pambapimi urmanga. Ishqui chunga huatayujmanta huichiman shuticunata quillcashcacuna, ñucata yanganchishpa rimajcunami chashna tucunga.

³⁰Ñuca maquita alzashpa chai llajtapi cancuna causachun cushatajmi nishca llajtamanca, cancunapuramanta shujllapish mana yaicunguichijchu. Jefonepaj churi Calebhuan, Nunpaj churi Josuellahuanmi chai llajtamanca yaicunga.

³¹Cancunaca ñucanchij huahuacunataca macanacuipi mishashpami japinga nircanguichijmi. Ashtahuanpish paicunatami ñucaca chai llajtaman yaicuchisha. Mana alli llajtachu nishpa cancuna mana nishca llajtataca paicunami rijsingacuna.

³²Ashtahuanpish cancunapaj cuerpocunaca cai shitashca pambapimi urmanga.

³³Cancunapaj huahuacunaca cai shitashca pambapimi chuscu chunga huatacunata michishpa puringacuna. Cancuna c'ariyashcamantami paicuna llaquita apangacuna. Cancunapaj cuerpocuna cai shitashca pambapi chingaringacamami chashna puringacuna.

³⁴Canaán llajtataca, chuscu chunga punllacunatami ricushpa rijsimurcanguichij. Chai shinallatajmi chuscu chunga punllamantaca chuscu chunga huatata llaquita apanguichij. Cada punllamanta shuj huatatami llaquita apanguichij. Chaipimi ñucata c'ariyajpica, ima shina llaquichij cashcata yachanguichij.

³⁵Mandaj Dios ñucami chashna rimani. Cai tucuicuna tandanacushpa ñucata c'ariyaj millaicunataca chashnami rurasha. Cai shitashca pambapimi tucuicuna huañushpa chingaringacuna — nircami.

³⁶Canaán llajtata rijsishpa tigrachun Moisés cachashcacuna tigrashpaca, chai llajtaca mana alli llajtami cashca nishpami, tandanacushca israelcunataca Diosta c'amichircacuna.

³⁷Chai llajtaca mana alli llajtachu cashca nishpa huillaj runacunaca, Mandaj Dios llaquita cachajpimi paipaj ñaupajpi huañurcacuna.

³⁸Chai llajtata ricushpa rijsimuchun cachashcapuracunamantaca Nunpaj churi Josuehuan, Jefonepaj churi Calebllahuanmi mana huañurcacuna.

³⁹Israelcunaman tucui caicunata Moisés huillajpica, tucui israelcunami yallitaj llaquilla tucurcacuna.

⁴⁰Cayandij tutamanta utcata jatarishpa urcu puntaman huichiyashpami cashna nircacuna: — Juchallishcanchijmari. Mandaj Dios cusha nishca llajtaman huichiyangapaj, cunantajca ñami caipi canchij — nircacunami.

⁴¹Shina nijpi, Moisesca: — Ima nishpataj Mandaj Dios mandashcata p'aquinguichij. Cancuna cunan chashna rurashcapish mana alli llujshingachu.

⁴²Ama huichiyaichijchu. Mandaj Diosca ña mana cancunapaj chaupipichu. Cancunata p'iñajcunapaj maquipi huañungapajllaca ama huichiyaichijchu.

⁴³Amalecitacuna, cananeocunami cancunapaj ñaupajpi. Cancunaca paicunapaj espadapimi urmanguichij. Cancunallataj Mandaj Diosta mana catishun nishcamanta Mandaj Diosca ña mana cancunapaj chaupipichu — nircami.

⁴⁴Ashtahuanpish paicunaca paicuna nishcata rurashpami, urcu puntaman ashtahuan huichiyarcallacuna. Paicuna rijpipish Mandaj Dioshuan ari ninacushca quillcata huaquichina arcapish, Moisespish carpa huasicuna chaupimantaca mana rircachu.

⁴⁵Chaipimi chai urcupi causaj amalecitacunapish, cananeocunapish uriyamushpa israelcunahuan macanacushpa chugrichishpa mishashpaca, Horma shuti pueblocama catircacuna.