Read Chimborazo Highland Quichua NÚMEROS 16 Bible Online

NÚMEROS 16 - Chimborazo Highland Quichua bible

NÚMEROS 16

¹Coré runaca gentecunata tandachishpami Moisesta p'iñashpa jatarirca. Paica Rubenpaj huahua huahua Datán, Abiram, On runacunahuan tucushpami tandachirca. Coatca Leví aillumantami carca. Izharca Coatpaj churimi carca. Coreca Izharpaj churimi carca. Datán, Abiram runacunaca Eliabpaj churicunami carca. On runaca Peletpaj churimi carca.

²Paicunaca israelcunapuramanta 250 runacunahuan tucushpami Moisesta p'iñashpa jatarircacuna. Chai runacunaca israelcunata pushajcuna, cunajcunapuramanta cajcuna, tucuicuna alli nishcacunami carca.

³Tucui chaicuna tandanacushpa Moisestapish, Aarontapish p'iñashpa jatarishpami: — ¡Cancunaca yallitajmi tucunguichij, ña chailla saquichij! Tucui israelcunami jucha illajcuna. Mandaj Diosca paicunapaj chaupipimi. Chashna cajpica Mandaj Diospaj tandanacushcacunapaj jahuapica ¿ima nishpataj yallitaj jatun tucushpa mandacunguichijlla? — nircacuna.

⁴Chaita uyashpa Moisesca pambaman tupajta cumurishpami,

⁵Coré runatapish, Coré runahuan tucushpa jatarijcunatapish cashnami nirca: — Mandaj Diosca maijanlla paipaj cashcata, maijanlla jucha illaj cashcataca cayami paipajman c'uchuyachishpa ricuchinga. Mandaj Dios agllashcacunallami paipajmanca c'uchuyangacuna.

⁶Chaimanta caita ruraichij: Coré runapish, Corehuan tucushpa jatarijcunapish, inciensota rupachinacunata cada quiquinpajta apamushpa,

⁷chaipi ninata japichishpa, Mandaj Diospaj ñaupajpi chai nina jahuapi inciensota caya churaichij. Chaipi Mandaj Dios maijantami agllan chaimi jucha illaj canga. Levipaj huahua huahuacuna, ña chailla cachun — nircami.

⁸Moisesca Coré runataca cashnami nirca: — Levitacuna cunanca caita uyaichij.

⁹Israelcunapaj Dios tucui israelcunapuramanta cancunata ch'icanyachishpa paipaj c'uchupi churashpa mandashcaca ¿yangalla cashcatachu yuyanguichij? Mandaj Diospaj carpa huasipi paipajta ruraj cachunca paimi churarca. Tucui israelcunapaj randi Mandaj Diospajta ruraj cachun paimi chashna churarca.

¹⁰Levipaj aillutaca tucuicunata paipaj c'uchupi rurachun churashca jahuachu ¿cura canatapish munanguichij?

¹¹Aaronca ¿pi cajpitaj juchachishpa rimanguichigari? Ashtahuanpish canpish, canhuan tucushpa jatarijcunapish Mandaj Diostamari p'iñashpa rimanguichij — nircami.

¹²Chai q'uipami Moisesca Eliabpaj Datán, Abiram shuti churicunata cayanaman cacharca. Ashtahuanpish paicunaca: — Ñucanchijca chaimanca mana rishunchu.

¹³Lechepish, sacha chuspipaj mishquipish yacu shina llujshicuj llajtamanta ñucanchijta llujshichishpa, cai shitashca pambapi huañuchun pushamushpaca ¿ima mana cashcatachu yuyangui? Chai jahuachu jatun tucushpa ñucanchijta mandasha ningui.

¹⁴Canca lechepish, sacha chuspipaj mishquipish yacu llujshicuj shina tiyan llajtamanca manapish chayachishcanguichu. Allpacunatapish, uva chagracunatapish manapish cunguichu. ¿Israelcunataca ñahui illajcuna shina canta caticuchunllachu munangui? ¡Mana rishunchu! — nircacunami.

¹⁵Shina nijpimi Moisesca paicunahuan achcata p'iñarishpa Mandaj Diostaca: — Ñucaca paicunapaj shuj burrollatapish mana quichushcanichu. Paicunapuramanta maijantapish mana llaquichishcanichu. Chaimanta paicuna cushcataca amataj chasquipaichu — nirca.

¹⁶Chai q'uipami, Moisesca Coré runataca cashna nirca: — Canpish, canhuan tucushpa jatarij tucuicunapish Mandaj Diospaj ñaupajman caya shamunguichij. Aaronpish chaipimi canga.

¹⁷Tucui cancuna cada quiquinpajta inciensota rupachinacunata apashpa, chaipi inciensota churashpa Mandaj Diospajman c'uchuyanguichij. Tucuimantaca 250 inciensariocunami cana can. Canpish, Aaronpish cada quiquinpajta inciensota rupachinacunata apanguichij — nircami.

¹⁸Shina nijpica, tucuicunami inciensota rupachinacunata cada quiquinpajta apashpa chaicunapi ninata japichishpa chai jahuapica inciensota churashpa Moisesndij, Aarondijllataj tucushpa Mandaj Dioshuan tupanacuna carpa huasi pungupi shayarircacuna.

¹⁹Coré runaca Moisestapish, Aarontapish p'iñashpa rimachunmi, Mandaj Dioshuan tupanacuna carpa huasi pungupi tucui israelcunata tandachishca carca. Chaipimi Mandaj Diosca paipaj sumaj cashcahuan tucui israelcunaman ricurishpa,

²⁰Moisestapish Aarontapish mandashpa cashna nirca:

²¹— ¡Tandanacushca cai israelcunamanta anchuichij. Paicunataca ñahui quinllaillapimi tucuchigrini! — nirca.

²²Chaimi paicunaca pambaman tupajta cumurishpa: — Taita Dios, tucuicunaman causaita cuj Dios. ¿Manachu shuj runalla juchallishca canga? ¿Ima nishpataj tucui israelcunahuan p'iñaringuiyari? — nircacuna.

²³Chaimi Mandaj Diosca Moisestaca cashna nirca:

²⁴— Coré, Datán, Abiram shuti runacuna causana carpa huasicuna chaipi caj israelcunataca tucuicunata chaimanta anchuichij nigrichij — nirca.

²⁵Chaimi Moisesca jatarishcahuan Datán, Abiram shuti runacuna maipi canman rirca. Israelcunata cunaj yuyajcunapish catishpami rircacuna.

²⁶Chaipimi Moisesca israelcunataca: — Diosta mana manchaj, cai runacunapaj carpa huasi muyundijpi cajcuna, tucuicuna anchuichij. Paicuna juchallishcamanta paicunahuan ama chingaringapaj paicuna imalla charishcacunapipish ama tuparinguichij — nirca.

²⁷Chaimi Coré runapaj, Datán runapaj, Abiram runapaj carpa huasi muyundijpi causaj israelcunaca tucuicuna anchurcacuna. Datán, Abiram runacunallami paicunapaj carpa huasi punguman llujshishpa paicunapaj huarmicunandij, churicunandij, uchilla huahuacunandij saquirircacuna.

²⁸Moisesca cashnami nirca: — Tucui caicunata Mandaj Dios cachajta ricushpami, tucui cai ruranacunataca mana ñuca munaimanta ruracushcata yachanguichij.

²⁹Tucui runacuna huañuj shinallataj cai runacunapish huañujpica, ñucataca manapish Mandaj Dios cachashcatami yachana canguichij.

³⁰Ashtahuanpish Mandaj Dios pi manaraj ricushcata rurashpa, cai allpa pascarishpa chai runacunata tucui paicuna imalla charishcacunandij millpujpi, paicunaca seolman causaj huashicujpimi, chai runacunaca Mandaj Diosta yallitaj p'iñachishcata yachanguichij — nircami.

³¹Moisés chashna rimashpa tucuchincami chai runacuna maipi shayacun allpaca pascarirca.

³²Chaipimi allpaca paipaj shimita pascashpa Coré runatapish, tucui paihuan cajcunatapish, paicuna imalla charishcacunandij, paicunapaj huasicunandij millpurca.

³³Paicunaca causaj paicuna imalla charishcacunandij seolman huashicujpi allpa tapajpimi, tandanacushca israelcunapaj chaupimanta chingarircacuna.

³⁴Chai runacuna caparirishpa huashicujta uyashpami, chai muyundijpi shayacuj tucui israelcunaca: “Ñucanchijtapish ñataj allpa millpunman” nishpa callparcacuna.

³⁵Mandaj Diospaj ñaupajmanta lunyacuj nina llujshishpami, inciensota cuj 250 runacunatapish huañuchirca.

³⁶Mandaj Dios Moisesta mandashpaca, cashnami nirca:

³⁷“Aarón curapaj churi Eleazarta cashna ni. Rupashcacunapaj chaupimanta inciensota rupachinacunata apamuchun mandai. Mandaj Diosman ch'icanchishpa cushca cashcamanta inciensariopi caj ushpataca chaimanta chaininijllaman tsirapachun mandai.

³⁸Paicunapaj causai chingarinapajllataj juchallijcunapaj inciensariocunaca, Mandaj Diospaj ñaupajpi chai inciensariocunapi inciensota churashpa rupachicushca cashcamanta ñucapajlla ch'icanchishcami. Chaicunataca tacashpa, ñañujllata rurashpa altar jahuata pegashpa churanapaj rurachun mandai. Chaicunata altar jahuapi pegachishcaca israelcunata yuyachishpa yachachinapajmi canga” nircami.

³⁹Shina nijpica, Eleazar curami inciensota cushpa rupachicushpa huañushcacunapaj chaupimanta bronce inciensariocunata japishpa, altar muyundijta pegachingapaj ñañujllata rurarca.

⁴⁰Chaica Mandaj Diosman inciensota cushpa altarpi rupachinamanca, Aaronpaj huahua huahuacunalla c'uchuyana cashcata israelcuna ricushpa yuyarinapajmi carca. Manapish Aaronpaj huahua huahua cajcuna altarman c'uchuyashpaca Coré runa, paihuan tucushpa jatarijcunandij ima shina tucushca shinallataj tucunata ricuchijmi carca. Eleazar curaca Mandaj Dios Moisesta ima shina mandashca shinallatajmi tucuita rurarca.

⁴¹Chai cayandij punllaca, tucui israelcunami Moiseshuanpish, Aaronhuanpish p'iñarishpa paicunataca: — Cancunaca Mandaj Diospajlla cajcunatamari huañuchishcanguichij — nishpa rimarcacuna.

⁴²Moisestapish, Aarontapish tucui israelcuna muyundijta shayarishpa rimacujpimi, paicunaca Mandaj Dioshuan tupanacuna carpa huasita ricushpaca p'uyu tapashcata, Mandaj Diosca paipaj sumaj cashcahuan chaipi cajta ricurcacuna.

⁴³Chaimi Moisespish, Aaronpish Dioshuan tupanacuna carpa huasi ñaupajman rijpi,

⁴⁴Mandaj Diosca, Moisestaca cashna nirca:

⁴⁵— Cai israelcunapaj chaupimanta anchuichij paicunataca ñahui quinllaillapimi tucuita tucuchigrini — nijpimi, paicunaca pambaman tupajta cumurircacuna.

⁴⁶Chaipimi Moisesca, Aarontaca cashna nirca: — Mandaj Diospaj ñaupajmantaca pai yallitaj p'iñarishpa llaquichina ña llujshimushcamanta huañuica ñami callarishca. Chaimanta inciensota rupachinata japishpa altarpi lunyacuj ninata chaipi japichishpa chai jahuapica, inciensota churashpa israelcuna maipi canman utca rishpa paicunapaj juchacunamanta Mandaj Diosman cugri — nirca.

⁴⁷Aaronca Moisés mandashca shinallatajmi, inciensota rupachinata japishpa israelcunapaj chaupiman callpashpa rirca. Huañuica israelcunapica ñami callarishca carca. Chaimi Aaronca inciensariopi inciensota churashpa, israelcunapaj juchamanta Diosman cushpa rupachirca.

⁴⁸Chai q'uipaca huañushcacunapaj, manaraj huañushcacunapaj chaupipimi shayarirca. Chaimi huañuica pararirca.

⁴⁹Chai huañuipi huañujcunaca, 14.700 gentecunami carca. Coré runahuan tucushpa jatarishpa Diosta c'ariyajpi huañuchishcacunata mana yupashcami chaica carca.

⁵⁰Huañui ña pararishca q'uipami Aaronca Dioshuan tupanacuna carpa huasi punguman Moisespajman tigrarca.