Read Chimborazo Highland Quichua NÚMEROS 17 Bible Online

NÚMEROS 17 - Chimborazo Highland Quichua bible

NÚMEROS 17

¹Mandaj Dios Moisesta mandashpaca cashnami nirca:

²“Israelcunata mandajcunataca tucuicunata paicunapaj tauna caspicunata apamuchun mandai. Paicunapaj yayamanta ima shina mirarimushca shinallataj tucuimantaca chunga ishqui tauna caspicunata japingui. Chai tauna caspicunapica cada quiquinpaj shuticunata quillcangui.

³Leví aillupaj tauna caspipica, Aaronpaj shutita quillcangui. Israel aillucunata pushajcunaca tucuicuna paicunapaj quiquin tauna caspita charichuncuna.

⁴Chaicunataca Dioshuan tupanacuna carpa huasipi caj, Dioshuan ari ninacushca quillcata huaquichina arca ñaupajpi, ñuca maimantami canman ricurini chai ñaupajpi churangui.

⁵Chaipica maijantami ñucapajta rurachun agllani chaipaj tauna caspipimi sisa huiñanga. Chashna rurashpami, ñuca ñaupajpi israelcuna cancunata p'iñashpa juchachishpa rimajcunataca upallachisha” nircami.

⁶Israelcunaman Moisés chashna nijpica, israelcunata pushajcunaca tucuicunami paicunapaj quiquin tauna caspicunata curcacuna. Paicunaca cada yayamanta ima shina mirarimushcata ricuchij tauna caspitami curcacuna. Tucuimantaca chunga ishqui tauna caspicunami carca. Aaronpaj tauna caspipish, paicunapaj tauna caspicunahuanmi carca.

⁷Moisesca chai tauna caspicunataca, Mandaj Diospaj carpa huasipi, Mandaj Diospaj ñaupajpimi churarca.

⁸Chai cayandij tutamantata Mandaj Diospaj carpa huasiman Moisés rishpaca, Leví aillumanta caj Aaronpaj caspipica, verdijlla ramacuna huiñashcata, sisashcata, retoñashca ramacunapica almendracuna p'ucushcatami ricurca.

⁹Chaimi Moisesca Mandaj Diospaj ñaupajmanta chai tauna caspicunata llujshichishpa tucui israelcunapaj ñaupajman aparca. Chaipi paicuna chaita ricushpaca, cada quiquinmi paicunapaj tauna caspita japircacuna.

¹⁰Mandaj Diosca, Moisestaca cashnami nirca: “Aaronpaj tauna caspitaca Dioshuan ari ninacushca quillcata huaquichina arca ñaupajllapitaj cachun churai. Diosta c'ariyajcunaca chai tauna caspita ricushpa Diostaca mana c'ariyanalla cashcata yuyarinapajmi canga. Chashna rurashpami, ñuca ñaupajpi juchachishpa cancunata rimacujcunataca upallachingui. Chaimi paicunaca mana huañungacuna” nircami.

¹¹Moisesca Mandaj Dios mandashca shinami rurarca. Chashnami rurarca.

¹²Chaimi israelcunaca Moisestaca cashna nircacuna: “¡Ñucanchijca ña huañugrinchijmi! ¡Ñucanchijca ña chingarigrinchijmi! ¡Tucui ñucanchijmi ña chingarigrinchij!

¹³Mandaj Diospaj carpa huasiman maijanpish c'uchuyaj, chaiman maijanpish chayajca huañungallami. Chashna tucushpaca tucuicunamari chingarigrinchij” nircacuna.