Read Chimborazo Highland Quichua NÚMEROS 19 Bible Online

NÚMEROS 19 - Chimborazo Highland Quichua bible

NÚMEROS 19

¹Mandaj Diosca Moisestapish, Aarontapish mandashpaca cashnami nirca:

²“Mandaj Dios ñucatajmi cashna nishpa mandani: Israelcunataca ima mana illaj, ima mana tucushca, shuj cutinllapish yugota manaraj churashca puca vacata apamuchun mandai.

³Chaitaca Eleazar curaman cungui. Paimi carpa huasicunamanta canllaman llujshichishpa, paipaj ñaupajpi huañuchichinga.

⁴Yahuartaca Eleazar cura, paipaj dedota satishpa Dioshuan tupanacuna carpa huasi ladoman tigrarishpa canchis cutin tsirapachun.

⁵Vacapaj aichataca carandij, yahuarndij, majadandij tucuita paipaj ñaupajpi rupachichichun.

⁶Chai q'uipaca curallataj cedro caspita, hisopo ramata, puca linsota japishpa, vaca rupashpa lunyacuj chaupipi shitachun.

⁷Chai q'uipaca cura, paipaj churanacunata tajshashpa paipish armashpa, pai causacushca carpa huasiman tigrachun. Chashna cashpapish paica tutayangacama mapami canga.

⁸Shinallataj vacata rupachijpish, paipaj churanacunata tajshashpa paipish armachun. Paipish tutayangacama mapami canga.

⁹Vacata rupachishca ushpataca, mapa illaj runa japishpa, carpa huasicunamanta caruman ima mapa illajllapi churachun. Chai ushpaca mapa illajllata rurana yacuhuan chagrunapajmi canga. Israelcuna imapi mapayashcata mapa illajllata rurashpa paicunapaj juchamanta cunapajmi canga.

¹⁰Vacata rupachishca ushpata pallajpish paipaj churanacunata tajshachun. Paica tutayangacama maparajmi canga. Cai mandashcaca israelcuna cashpapish, paicunahuan causacuj mana israelcuna cashpapish chashnataj pajtachicuchunlla mandashcami.

¹¹Huañushcapi maijanpish tuparijca, canchis punllacamami mapa canga.

¹²Chai runaca mapayashca quimsa punllapi mapa illajllata rurana yacuhuan mapa illajlla tucuchun. Canchis punlla tucujpipish chai yacuhuan mapa illajlla tucuchun. Chaipimi paica mapa illaj tucunga. Chai punllacunapi chai yacuhuan mana mapa illajlla tucushpaca mapallatajmi canga.

¹³Huañushcapi maijan cashpapish tuparishpa mapayashcamanta mapa illajllata rurana yacuhuan mana mapa illajlla tucujca, Mandaj Diospaj carpa huasitami mapayachin. Chai runataca israelpuramanta anchuchishca cachun. Mapa illajllata rurana yacuhuan paipaj jahuata mana tsirapachishca cashcamanta paica mapami canga. Paica mapallatajmi saquiringa.

¹⁴Maijanpish pai causacushca carpa huasillapitaj huañujpica, cashnami mandani: Mashna chai ucupi cajcunapish, pai huañushcata ricunaman chai carpa huasiman yaicujcunapish canchis punllacama mapami canga.

¹⁵Chai ucupi tiyaj mangacunapish mana tapashca cashpa, mana cashpaca mana alli tapashca cashpapish mapami canga.

¹⁶Huasicuna mana tiyanpi espadahuan huañuchishcapi, huañuna pajtajpi huañushcapi, huañushcapaj tullupi, huañushcata pambashcapi maijan cashpapish tuparijca canchis punllacama mapami canga.

¹⁷Chaita mapa illajllata rurangapajca, juchamanta cushpa vacata rupachishca asha ushpata japishpa mangapi churashpa, chaipica callpacuj yacuta churachun.

¹⁸Chai q'uipaca mapa illajlla runa hisopota japishpa chaita chai yacupi satishpa carpa huasi jahuatapish, chaipi tucui imalla tiyajcuna jahuatapish, chaipi caj gentecunapaj jahuatapish, huañushcapaj tullupi tuparijpaj jahuatapish, espadahuan huañuchijpi huañushca caj huañushcapi tuparijpaj jahuatapish, huañuna pajtajpi huañushca caj huañushcapi tuparijpaj jahuatapish, huañushcata pambashcapi tuparijpaj jahuatapish chai yacuhuan tsirapachun.

¹⁹Mapa illajlla runaca mapayashca runataca mapayashcamanta quimsa punlla tucujpipish, canchis punlla tucujpipish mapa illajllata rurana yacuhuan tsirapachun. Mapayashca runaca canchis punllapi ña mapa illajlla tucushpaca paipaj churanacunatapish tajshachun, paipaj cuerpotapish armachun. Paica tutayaitami mapa illajlla canga.

²⁰Maijanpish mapayashca cashca jahua, mapa illajllata rurana yacuhuan mana mapa illajlla tucujca, Mandaj Diospaj carpa huasitami mapayachin. Chashna cashcamanta paitaca tandanacushca israelcunamanta anchuchishca cachun. Mapa illajllata rurana yacuhuan paipaj jahuata mana tsirapachishca cashcamanta paica mapami.

²¹Chai mandashcaca huahua huahua ruracuchunlla mandashcami. Mapa illajllata rurana yacuhuan tsirapaj runapish paipaj churanacunata tajshachun. Mapa illajllata rurana yacupi maijanpish tuparijca, tutayangacama mapami canga.

²²Mapayashca runa ima charinacunapi tuparijpica, tucui chaicunami mapa canga. Mapayashca runapi tuparijpish tutayangacama mapami canga” nircami.